Ukugubuzeleka kwerandi kuthotshwa yintengo kawoyela
Kunzima ezweni lonke ngoba impi yeCOVID-19 ihlasele, futhi ayikhethi. Le COVID-19 iyawunyakazisa umnotho kuwo wonke amazwe lapho seyifike khona. Nakhona lapha eNingizimu Afrika ilethe ukungethembeki kwesimo somnotho, lwalimala uzinzo, irandi lazithola lishayeka uma liqhathwa nezimali zakwamanye amazwe.
NgoMsombuluko zili-16 kuNdasa 2020
Likhombise ukuthola amandla irandi ngempelasonto, kwavulwa ezimakethe ngoMsombuluko idola lase-USA lilingana namarandi ali-16,37, okungcono kunalokho okwavalwa kuyikho ngoLwesihlanu.
Lithande ukuqina irandi kuvulwa uma siliqhathanisa noPondo waseBritain.
Kuvulwe uPondo waseBritain ulingana namarandi angama-20,21. Noma lisephezulu, kunikeza ithemba ukuthi uthe ukuthamba uPondo kunangesonto eledlule.
IYuro linyakaziswe yirandi lehla lapho belikhona ngoLwesihlanu. Kuvukwe ngoMsombuluko iYuro lilingana namarandi ali-18,25.
NgoLwesibili zili-17 kuNdasa 2020
Kuthanda ukuba nzima entengweni yegolide ngoba yehlile yabangaphansi kwamadola ayi-1 500, okungekuhle kwabahweba ngegolide.
Liphinde lathi ukwehlelwa ngamandla irandi. Kuvukwe idola lase-USA lilingana namarandi ali-16,52. Kungenzeka ukuthi lokhu kwenziwe yisimemezelo sikaMengameli uMnu uTrump sokuthi uHulumeni wase-USA uzowesekela umnotho kulesi sikhathi esinzima okudlulwa kuso.
Liphinde laveza izimpawu zokuqina irandi. Kuvulwe ezimakethe uPondo waseBritain ulingana namarandi angama-20,17, okungconywana kunangayizolo.
Kuvulwe iYuro likhombisa ukudlondlobala lilingana namarandi ali18,41.
NgoLwesithathu zili-18 kuNdasa 2020
Kuvulwe ezimakethe idola lase-USA lilingana namarandi ali-16,56.
Liyaqhubeka nokukhula irandi. Kuvulwe ngoLwesithathu uPondo waseBritain ulingana namarandi angama-20,06.
Kuvulwe ngoLwesithathu likhombisa ukuthola amandla irandi. IYuro kuvukwe lilingana namarandi ali-18,25.
NgoLwesine zili-19 kuNdasa 2020
Ekuseni ngoLwesiNe idola kuvukwe lilingana namarandi ali 17,47, okukhombisa ukwehla kwamandla erandi.
Uma kuqhathaniswa irandi noPondo waseBritain, likhombise ukusimama irandi. Kuvukwe uPondo waseBritain ulingana namarandi angama-20,06.
Kuleli sonto iYuro lilokhu liqhubekile nokudlondlobala. Kuvule izimakethe iYuro lilingana namarandi ali-19,01.
Phezu kwaso sonke isimo somnotho esingesihle, ukusabalala kwegciwane iCorona Virus nokungethembeki kwerandi uma libhekene nezimali ezisezimakethe, kuyayithoba inhliziyo ukuthi inani likawoyela lehlile laze lafinyelela kumadola ase-USA angama-30,33. Lokhu kusibeka ethembeni lokuthi intengo kaphethroli nodizili izokwehla ngamasenti angama-25 mhla lulunye enyangeni ezayo.