IZINDABA EZIMFISHANE
Imali yakuleli isiyagula
Izimakethe zomhlaba zisadunguzela kulandela ukuqubuka kwegciwane iCorona. Irandi lehlile uma liqhathaniswa nedola lase-USA, nalo eliqhugayo. Intengo yezinto ezweni intekenteke, ngenxa yesimo esimazonzo esidalwe ukuqubuka kwegciwane elibhubhisayo.
Ukwehla kwemalimboleko
UMphathi weBhange-ngodla, uMnu uLesego Kganyago, wehlise imalimboleko ngephesenti izolo (ngoLwesine). Isuke ku 6,25% yafikelela ku 5,25% . Lokhu ukuchaze ngokuthi kuzokwethula umthwalo emahlombe, abantu abaningi. UMnu uKganyago, uthe iCOVID-19, izokhinyabeza ukukhula komnotho emhlabeni wonke esigabeni sokuqala sonyaka.
Kufufusa isiteleka
Isiteleka esihlongozwa yiNational Education and Health Allied Workers Union (NEHAWU) sangomhla zingama-30 kuNdasa, singashaya kuzwele emnothweni wezwe. Le nyunyana ithi izoba nokhukhulela ngoqo wezimashi nesitekela ngoba ukhala ngokungenyuswa kwamaholo ezisebenzi zikaHulumeni. Isimemezelo lesi esenziwa nguNgqongqoshe Wezezimali uTito Mboweni ngenkathi ememezela isabelomali.
Umxhaka wosomabhizinisi abasafufusa
UNgqongqoshe Wezamabhizinisi asafufusa uKhumbudzo Ntshavheni uthi kukhona imali ebalelwa esigidigidini esisodwa ebekwe eceleni ukusiza osomabhizinisi abasafufusa. Uthe lokhu kudalwa ukuthi iCOVID-19 ishaye kwezwela kubona. Uthi uHulumeni uyabethemba abakulo mkhakha ngoba basebenza ngabantu basemazingeni aphansi.
Ubaqinise idolo osomabhizinisi
UMcwaningimabhuku Omkhulu uMnu uKimi Makwetu uthi ukuxashazwa kwezimali okungenasidingo kungagwemeka koMasipala uma nje bengaba nendlela elandelekayo yokusebenza. Ubekhuluma nosomabhizinisi eSandton eGoli ngesikhathi kunesidlo sasekuseni. Ubebamisa isibindi ngoba bayesaba futhi banokungabaza ngesimo somnotho saleli lizwe.