Umlungisi uzithela isisila ngabanye
Ngonyaka wezi-2015 leli phephandaba lama lodwa ngesikhathi imilomo ivunana ezweni ngento abezindaba nabanye osopolitiki ababeyakhe bayibiza ngokuthi ukwexwaya abokufika (xenophobia), besho khona ukuthi izinxushunxushu ezabe zikhona zabe ziyizinkomba zokuthi abakuleli bazonda abokufika. Okwaze kwasenza sasolwa yingenxa yegama lethu nokwathi uma siphunga izinkulumo ezinjalo “sivikela ISILO” ngalesi sikhathi esabe sisolwa ngokuthi siphake impi yokuba kuliwe nabokufika. Sekuwumlando ukuthi uphenyo olwenziwa yiKhomishini Yamalungelo Esintu kuleli kanye neKomiti lePhalamende lakhipha oMdala phambili. Okwashiwo yiSILO ngesikhathi kunembizo eMoses Mabhida ngalolu daba kwamangaza njengoba nembala selizihlonza emuva kweminyaka emihlanu sakusho.
Enkulumeni yaso iSILO saxwayisa ngokuthi ukungaxhumani nokungazani phakathi kwabokufika nabakuleli ngelinye ilanga kuyokwenza baphinde babhekane ngeziqu zamehlo. Sexwayisa ngokuthi abaholi bakuleli bangalenzi iphutha lokuthambisa isandla kulabo abayizigilamkhuba ngoba kuthiwa ngezangaphandle besaba ukugxekwa.
La magama abuye aba liqiniso ngonyaka owedlule negsikhathi abanye bokufika eGoli bebhozomele amaphoyisa akuleli nabegcina umthetho. Lokho kwadala iziqubu ezingezinhle abanye baze baphinda lona igama leli ixenophobia. Nalapho iSILO sikhuzile ukuthi akuqine umthetho sabe sesixwayisa ngokuthi uZulu awuziqhelelanise nale mikhuba ebigilwa eGoli ngoba sithi sekukhona abafuna ukuninda uZulu bethi nguye othela abantu ngensilane le eGoli. Okwenzeka eGoli kwaholela ekutheni noMengameli wakuleli uRamaphosa azithole eseyoxolisa eZimbabwe nokwanenga abantu abaningi ababesho khona ukuthi isenzo sikaRamaphosa sitshengise ubuvaka.
Muva nje okwenzeka eKapa lapho iqulu labokufika libonakale lizama ukusobozela amaphoyisa nalabo abasebenza enkantolo, kuvuse imibuzo ekutheni engabe abanye bokufika kuleli bazibona bengobani. Yibo laba abalume isandla esibaphakelayo ngesikhathi bengqimuza umfundisi webandla elibakhoselise edolobheni laseKapa. Uma sizwa kuthiwa bathi kabafunwa kuleli ngakho elakuleli alibafudule libayise entshonalanga ko-Australia. Konke lokhu kwenziwa ngabantu abathi baphuma emazweni abavela kuwona ngesamagundwane, bashiya izigidi zabantu zibhekene nonya lohulumeni babo. Yibo futhi laba abangabanga nasibindi sokumelana nohulumeni babo asebezwakala benequnga kuleli balwe nanamaphoyisa.
Ngalesi sikhathi abanye bezosaba ukulikhipha lime elokuthi abanye bokufika bayashinga, njengelaboHlanga sisho njalo. Sithi umlungisi uzithela isisila. Sinxusa ukuba abaphethe bakhumbule amazwi eSILO; mabaqinise umthetho kunoma ngubani ngisho nalabo bangaphandle ngoba uma kuqhubeka kanje, zizobuya iziwombe zokubhekana ngeziqu zamehlo abakuleli sebenengwa ukuthi benziwa amathimboxo ngabanye abantu ekubeni bona bewugcina umthetho ezweni labo. Laba abaseKapa abashingayo ababoshwe baphindiselwe emakubo, ukuze bangoneli iningi labokufika abamukelayo ukuthi iNingizimu Afrika yikhaya kude nekhaya labo lokuzalwa.