UMokoena nekhasi elisha kuChippa, kodwa….
Uma itekisi ligingqika kuvame ukuthi kulimale umshayeli noma abagibeli. Isenzo somqeqeshi uRhulani Mokoena sokuxosha abadlali abahlanu abayizinsika kuChippa United, singafaniswa nalesi sibonelo.
Kuchwaze izinkundla zokuxhumana ntambama izolo ngesikhathi kuputshuka umbiko othi iChippa isikhulule uKurt Lentjies, u-Andile Mbenyane, uThabo Rakhale, uLehlogonolo Masalesa noDiamond Thopola.
Laba badlali bathathwa njengabadala kule kilabhu yasePort Elizabeth kanti ukuchithwa kwabo sekusele imidlalo emihlanu kusongwe isizini, kwenyuse izinhlozi kwabaningi.
Abalandeli bokuqina bamaChilli Boys bangenwe ingebhe kwazise iqembu labo lingelamanye avika izembe njengoba elele endaweni ye-13 namaphuzu angama-26.
Phakathi kwezizathu okuthiwa zibekwe nguMokoena kuSihlalo weqembu ngokwenza izincomo zokuthi bachithwe laba badlali, ukuthi abasazinikele ngokwanele.
Kuthiwa uMbenyane osuka ehlathini neChippa, osehlale iminyaka elishumi noseke waba ukapteni, ubengafiki njalo ejimini.
“Isenzo sikaMbenyane sidumazile kwazise ungumdlali omdala nokumele abe isibonelo kubadlali abafikayo nabancane. URhulani akawubambi umshini ingakho engananazanga ukumfaka umgxala. Nalaba abanye abadlali kube khona ukushayisana kwemibono wase ebona ukuthi kungcono kuhlukwane kusesekuseni,” kusho umthombo.
UMpengesi ucashunwe ekhuluma nabezindaba ephuma emhlangweni wePSL izolo ekuqinisekisa ukungaziphathi kahle kukaMbenyane.
“U-Andile uyazi siyamthanda kodwa indlela aziphatha ngayo muva nje iyadumaza. Yonke le minyaka ubephethwe kahle kuChippa kufana nekhaya lesibili. Besilindele akhuphule amasokisi asuse iqembu endaweni ebucayi elikulo kodwa waqoma ukuphuma eceleni njengojosaka,” kusho uMpengesi.
Lesi sikhulu esivamise ukungananazi ukuxosha abaqeqeshi sithe sizohlala phansi nalaba badlali abathintekayo ekuxoshweni kudingidwe ngezindaba zezinkontileka abasenazo nekilabhu.
UMokwena uxosha abadlali nje, akukapheli nenyanga eqashiwe ukuvala isikhala esivuleke ngokuxoshwa kukaNorman Mapeza waseZimbabwe. Emdlalweni wakhe wokuqala wathola iphuzu elimqoka ebambela ekhaya iBidvest Wits (0-0) eGoli. Uthushuka kuChippa, besekuphele izinyanga engabonakali ebholeni ngemuva kokuduba i-Orlando Pirates, eyaqasha uJosef Zinnbauer waseGermany owafika umkhumbi ucwila.
Kuzo ezithinta abadlali, sekuvele ukuthi uMusa Nyatama uzophinde asebenzisane noMokwena ayenaye kuPirates. Njengamanje uNyatama unomshado wesikhashana neHighlands Park emthathe ngesikhathi ekhululwa iPirates ngoMasingana.