ZINQUNYWA AMAKHANDA ....
EZIKANOBHUTSHUZWAYO
Kungakapheli isikhathi esingakanani iMamelodi Sundowns ivuselele inkontileka kaHlompho Kekana ongukaputeni wayo ngeminyaka emithathu, phakathi nesonto kuvele ukuthi iphinde yavuselela eka-Anele Ngcongca. UNgcongca ofike kumaBrazillians ngonyaka wezi-2016, uvuselele inkontileka yakhe ngonyaka owodwa. Kule sizini usedlale imidlalo eli-18 okubalwa emithathu yeTelkom Knockout, emibili yeNedbank Cup kanye neli-13 ye-Absa Premeirship. Lo mdlali odlala emumva unamava ayisimanga njengoba eke wadlala naphesheya kwezilwandle kanti uke waba seqenjini lesizwe, iBafana Bafana, amahlandla angama-53.
IKaizer Chiefs imise zonke izinkulisa zayo ngenxa yokubheduka kweCoronavirus. Amakhosi athathe lesi sinqumo emuva kokuthi inhlangano ephethe unobhutshuzwayo kuleli, iSouth African Football Association (SAFA), ithe akumiswe zonke izinhlelo zikanobhutshuzwayo kuleli okubalwa i-Absa Premiership kuze kufike emazingeni aphansi. Leli qembu ligodukise abadlali balo kusukela kwabaka-Under/13 kuya kwabadlala kuMultichoice Diski Challenge (MDC).
AmaZulu FC alwela ukuvika izembe ku-Absa Premiership, abuyelwe abadlali bawo ababili abesebehlale isikhathi eside belimele. Labo badlali uCharlie Hlalele oyihlikihla esiswini kanye no-Andre de Jong ongumgadli. UHlalele uhlale izinyanga eziyisi-9 engabonakali enkundleli kanti uDe Jong ezine. “Ngijabule kakhulu ukubuyela ekuziqeqesheni neqembu, besekuyizinyanga eziyisi-9 selokhu ngigcine ukudlala kanti lokhu bekungikhathaza impela,” kusho uHlalele.
USuthu emdlalweni walo wokugcina lumangaze abaningi lwehlula iKaizer Chiefs ehlezi esicongweni selogi ngegoli elilodwa eqandeni nelavalelwa phakathi uBongi Ntuli. Kuyimanje luhlezi endaweni ye-15 kulogi ngamaphuzu angama-24. Lusalelwe imidlalo eyisi-6. Luzodlala neBaroka FC, iBidvest Wits, iBloemfontein Celtics, iBlack Leopards, iStellenbosch neHighlands Park.
EZOMBHOXO
Yize iStormers, okuyiqembu laseWestern Cape, iyiqale kahle imidlalo yeVodacom Super Rugby, kubukeka ibhekene nengwadla yokulinyalelwa abadlali bayo abamqoka. Emdlalweni wokugcina leli qembu belibhekene neSharks nalapho liguqe ngamaphuzu angama-24 kwali-14. Lilinyalelwe abadlali ababili uSteven Kitshoff noHerschel Jantjies owadlala indima enkulu ekutheni aMabhokobhoko adle umdlanganiso kweyeNdebe YoMhlaba eJapan nyakenye. Abanye abadlali abalimele kuleli qembu uBongi Mbonambi, uPieter-Steph du Toit kanye nokaputeni walo uSiya Kolisi.
EZOKHETHO
Njengoba kulokhu kuqhubekile ukuhlehla kwemiqhudelwano emikhulu emhlabeni ngenxa yeCoronavirus, sekuphinde kwahlela ukhetho lweSouth African Confederation and Olympic Committee (SASCOC). Lolu khetho bekumele lube mhla zingama-28 kwephezulu, kodwa seluhlehliselwe usuku olungaziwa. Kuke kwaba nomsindo kulolu khetho ngenxa yokungafakwa kukaMengameli we-Athletics South Africa (ASA), uMnu u-Aleck Sikhosana. Ngokungafakwa kwakhe inhlangano ayiholayo i-ASA ikubeke kwacaca ukuthi izomulwela njengoba eshaywe ngesithende kwabagaqele esobuholi.