Kunesidingo sokuhlonishwa kwababhali
Mhleli
Ngifisa ukuthatha leli thuba ke ngibonge inhlangano iMavuso Foundation eke yahamba izingxenye zezwe likaMthaniya igqugquzela ukufundwa kwezincwadi zesiZulu futhi ihlonipha nezinqalabutho kulo mkhakha. Kulezi zingqalabutho ngingabala uSolwazi uSibusiso Nyembezi, uDkt uWallet “Bhambatha”Vilakazi nabanye. Ziningi kakhulu izingwazi engifunde izincwadi zazo ezingasekho emhlabeni nezisadla anhlamvana. Ngingabala nje uSol uCT Msimang, uSol uLF Mathenjwa, uSol uM.A Maphumulo, uDkt uLTL Maboea, uDBZ Ntuli nabanye.
Kodwa incwadi kaBB “Nonkamfela” Ndelu ethi “Mageba Lazihlonza” yangihlaba umxhwele ngoba yayibhalwe ngesinono, kusetshenziswe ulimi olunonophele olwalukhulunywa abantu bangaleso sikhathi.
Njengoba le mpi yayigxile esigamekweni somlando wempi yaseNdondakusa, uzibona usuyibuka ngamehlo le mpi nezigameko zayo nesililo seNgonyama yaKwaNodwengu ikhalela abaNtwana bayo abasala kule mpi. Siyabonga kule nhlangano futhi sikholwa ukuthi kancane kancane iyoze ibahloniphe bonke ababhali bokuqala besiZulu.
- nguPhila N.Mthethwa Empangeni