Igciwane linyakazisa ubudlelwano bomqashi nomqashwa
Ukuhluka kwemiqondo phakathi komqashi nomqashwa bekuyinto eyamukelekayo futhi enganakekile ngenxa yokuthi zombili izinhlaka ziyadingana. Kodwa ukubheduka koKhuvethe sekwenze kwabonakala lugqama lolu qhekeko.
Kuyaziwa futhi kuyinto eyamukelekile ukuthi ubudlelwano bomqashi nomqashwa busekelwe ukungethembani uma sekucatshangelwa izinhloso zohlangothi ngalunye. Inhloso enkulu yomqashi ukwenza inzuzo nomsebenzi ngezindleko ezincane. Kanti eyomqashwa ukusebenzela impilo yakhe nalabo abondlayo, ngokuphepha ukuze angakhubazeki. Kuyiqiniso ukuthi ziyalumbana lezi zinhloso okuyinto eyenza ukuthi baphilisane babekezelelane umqashi nomqashwa ngoba bebona ukuthi alukho uhlangothi olungafeza ezalo izinhloso ngaphandle kokubambisana nolunye: umqashi uyamdinga umqashwa, kanti nomqashwa uyamdinga umqashi ekufezeni izinhloso zabo ezahlukene. Ikakhulukazi ngalesi sikhathi sobhubhane olungakhethi bala nasikhundla samuntu, badingana ngokwadlulele abasebudlelwaneni bokuqasha.
Kodwa ubhubhane iCovid-19 lugqamisa ukwehlukana nokuzicabangela kwalolo nalolo hlangothi yize umthetho wezokuphepha emsebenzini unemibandela ecacile mayelana nezibopho zomqashi nomqashwa kwezokuphepha emsebenzini. Lokhu kucace emacaleni amabili aphuthinyiswe eNkantolo Yezabasebenzi ngalesi simo seCovid-19. Elokuqala ngelifakwe yinyunyana iNEHAWU ilwela ukuqikelela ukuvikelwa kwezisebenzi ezenza imisebenzi ebalulekile ebucayi ephathelene nezempilo ngalesi sikhathi sobhubhane iCovid-19. Elesibili yicala le-AMCU ebilwela ukuthi izisebenzi zasezimayini nemiphakathi ezisuka kuyo kuvikeleke ngokwedlulele futhi okuqondene nemboni yezimayini.
Ecaleni leNEHAWU elinguNombolo J 423/20 elahlulelwa mhla zili-11 kuMbasa 2020, inyunyana ibimangalele umqashi okuwuMnyango Wezempilo kuzwelonke nakuzona zonke izifundazwe. Kafuphi, inyunyana ibikhala ngokuthi umqashi uyehluleka ukuqikelela ukuphepha kwabasebenzi bezempilo ngokubanikeza izevatho ezanele zokuvika iCovid-19 ngenkathi besemisebenzini yabo. Esephendula umqashi, uyigculisile iNkantolo ukuthi yena ukwenze konke okusemandleni ukuqikelela ukuphepha kwezisebenzi ezenza umsebenzi wezempilo obalulekile nobucayi kuzwelonke nakuzona zonke izifundazwe.
Okunye, inyunyana ibifuna ukubandakanywa ngumqashi ezinhlelweni zokuqikelela ukuphepha kwezisebenzi. Nakulokho futhi iNkantolo yemukele incazelo yomqashi ukuthi empeleni kwakungamampunge okwakushiwo yinyunyana.
Okokugcina, inyunyana ibifuna ukuthi umqashi anqindwe amandla okujezisa izisebenzi azenqabayo ukusebenza ngoba zesabela impilo yazo. Yakubeka kwacaca iNkantolo ukuthi kayikwazi ukuthatha leso sinqumo ngoba kwakungenabufakazi bokuthi kukhona osebhekene nokuqondiswa ubugwegwe ngenxa yokwenqaba ukusebenza ngoba esabela impilo yakhe. Kuleli cala, kubonakele ukuthi inyunyana yabe icabangela ilungelo labasebenzi ngaphansi koMthetho Wezempilo Nokuphepha Emsebenzini uNombolo 85 we-1993 eyayicabanga ukuthi akalibhekelelanga umqashi.
Kodwa iNkantolo yayichitha inyunyana ngokwehluleka ukuletha ubufakazi bezikhalo zayo. Yize kubonakala ukuthi ibenehaba nokuxhamazela inyunyana ekufakeni leli cala, ekugcineni litshengisa ukucabangela ilungelo nezifiso zezisebenzi okuyilungelo layo ukukwenza.
Elesibili yicala le-AMCU imangalele uMnyango Wezimayini nomhloli wezokuphepha ezimayini. Leli cala uNombolo J427/20 linqunywe yiNkantolo Yezabasebenzi mhla lulunye kuNhlaba kophezulu. Inyunyana ibikhala ngokuthi imibandela yezokuphepha emsebenzini eshaywe nguHulumeni ngaphansi koMthetho Wezinhlekele (Disaster Management Act) okuqondene nobhubhane lwe covid19; kayenele ukubhekelela ngokukhethekileyo izisebenzi zasemayini njengokulawula koMthetho Wezokuphepha Ezimayini (Mines Health & Safety Act). Ngokubona kwenyunyana ukuphepha ezimayini kwehluke kakhulu kokwenjwayelekile, futhi kusebucayini obedlulele ngenxa yeCovid-19; okudinga ukuba kusetshenziswe uMthetho
Kuningi ukuxakaziseka kobudlelwano bokuqashwa okwenziwa udungunyane lweCovid19.
Wezokuphepha Ezimayini ngoba wona unezibophezelo ezaluswa futhi kujeziswe ukwephulwa kwazo, nguMhloli Omkhulu wezokuphepha ezimayini ngaphansi kweSigaba 9 salo Mthetho. Kanti imibandela yokuphepha ngaphansi koMthetho Wezinhlekele yona ingeyomphakathi wonke futhi ukwephulwa kwayo akujeziswa kanzima njengalokhu kwenzeka uma kwephulwe imibandela yoMthetho Wezokuphepha Ezimayini.
Ngalesi simangalo inyunyana ibifuna ukuthi iNkantolo ilawule uMhloli Omkhulu wezokuphepha ezimayini ukuthi akhiphe imibandela yezokuphepha eqondene nezimayini njengoba sichazile ngenhla, ukuvikela izisebenzi emkhuhlaneni iCovid-19. UMnyango wona ubukuphikisa lokhu ngesizathu sokuthi izinhlelo zezokuphepha ezikhishwe ngaphansi koMthetho Wezinhlekelele zanele.
UMnyango ubusho nokuthi futhi ubhubhane iCovid-19 aluqondene nje nezisebenzi kuphela kodwa lungolwesizwe sonke, ngakho angeke kwasetshenziswa umthetho oqondene nezimayini kuphela.
Kodwa iNkantolo ivune inyunyana kuleli cala. Kafuphi izizathu zeNkantolo ngezokuthi ubhubhane lolu lubopha ngabhandelinye umphakathi nezisebenzi emsebenzini kalukhethi muntu. Ukuphepha komphathi wonkana, kuxube nokwezisebenzi, emsebenzini. Ukuvikela izisebenzi ngokwasemsebenzini eziwenzayo kakushayisani nokuvikela umphakathi wonkana. Esesibili isizathu seNkantolo ngesokuthi izinhloso zoMthetho Wezokuphepha Ezimayini ziyamphoqa uMhloli ukuthi ethathe izinyathelo ezibalwe yinyunyana esimweni seCovid-19 ngoba zona zinamazinyo okujezisa lowo ozephulayo. Ngakho-ke ukwenqaba koMhloli wezokuphepha ezimayini ukukhipha izilawulo ngaphansi komthetho wezokuphepha ezimayini kuyisinqumo esingaphusile okumele sibuyekwezwe, sichithwe yiNkantolo. Inyunyana yethule ubufakazi bochwepheshe bezempilo nabezokuphepha emsebenzini ukutshengisa ukuthi basengozini engakanani abasebenza emigodini ezimayini. Izibonelo ukuthi basebenzela endaweni eminyene, kabakwazi ukushiya isikhala phakathi kwezisebenzi ukugwema igciwane leCovid-19. Kunobufakazi bodokotela ukuthi izifo eziphathelene nofuba luzihaqa kakhulu nakalula izisebenzi zasezimayini. Lokhu kuzenza zehluke izisebenza ezimayini, okudinga futhi ukuvikeleka okuqondene nazo. Obunye ubufakazi ngobethulwa yinhlangano emele umphakathi lapho zisuka khona izisebenzi zasezimayini okutshengise ngokusobala ukuthi kufanele mazivikeleke ngokwehlukile esizweni sonkana.
Kuningi ukuxakaziseka kobudlelwano bokuqashwa okwenziwa yudungunyane le covid19.