Injula yobu-Afrika
Sethula ingosi entsha kaNgqondobukhali nosibukela emuva naphambili ngenhloso yokuhlelembela imiqondo yethu ekwazini ubuthina. Kulokhu ubuka okungaba yimibuzo nezimpendulo ngesikhathi sokhuvethe.
Kwathi ukuba uNkulunkulu adale umuntu, wayesemlawula ukuba ethe izilwane nezitshalo nakho konke okunye amagama. Umuntu-ke wetha amagama izingane zakhe, izigameko zemihla nemihla, njengezibhicongo ezike zimhlasele.
USolwazi u-OEHM Nxumalo, umbhali wezincwadi, usonkondlo, umtoliki ngokukhuluma nangokubhala, nomlobi wezichazamazwi ebambisene nabanye useqambe iCorona Virus wathi uKholisekile.
Echaza ngokuthi ulakhe kanjani leli gama uSolwazi Nxumalo uthe uthathe u“co” kaCorona wathi ngu‘kho’. Wayesethatha u “s” kaVirus, wawufanisa no“s” kaKholisekile. Igama lesiZulu elithi ukholisekile lisho ukuthi unento embi, ebuhlungu, elusizi, ekuficezele, ungazi ukuthi ungayiqhathulula kanjani. Ukubhebhetheka kukaKholisekile kuyahambelana nalezi zincazelo. Uqhubeke wachaza uSolwazi uNxumalo ukuthi igama lingasuselwa emlandweni, esicini, ekusukeleni kwesenzeko noma emphumeleni elinawo noma kumuntu ophathelene nesenzeko esichazwayo.
Amanye amagama aqanjwa kusukelwa emsukeni walo kwezinye izilimi. Igama elithi udokotela lisukela ku“dokter”, elithi impesheni lisuselwa kwelithi “pension”, elithi thisha lisuselwa ku“teacher”, kanti yena wayesuselwa esiGrikini egamini elithi “deiknunai” elisho ukukhombisa (show) no “deigma” elisho u“sample”. Kakuphoqekile ukuba igama litolikwe lisuselwa kolunye ulimi uma ulimi olufisa ukubeka umqondo walelo biza lunalo olwalo.
Njengoba siyaye sibone ezichazamazwini, kwesinye isikhathi igama elilodwa lichazwa ngamabizo amabili noma amathathu. Wonke amagama aye athi kawasondelane, kodwa umuntu ofisa ukulisebenzisa uyaye athathe elingcono abona ukuthi likusho ngqo lokho afisa ukukusho.
USolwazi Nxumalo unothando olukhulu lwamagama esiZulu. Nawa amanye amagama asawatolika ezisukela yena phansi kungashongo muntu, futhi engekho emihlanganweni ake aba kuyo etolikayo. Uthi angalitolika noma angalibumba igama bese eshayela ongoti besiZulu esethathisa kubo. Iziboniso: value – ulungonhle. Intelligence – ubunsengetshe. Workshop – inkuthazakwenza. Strategy – iqhingakwenza/isukwenza. Vision – umbonotalagu. Responsibility – isibophezelo. Memory – inkumbulonde – lecture – inkulumosethulo. Email addressikhelilunyazi. Concept – umqondomsuka. Knowledge – ukwazi. Information – ulwazi. DNA – ulibofuzo.
Ngesinye isikhathi uyaphenya kongoti acacelwe kahle ukuthi yini lena ayitolikayo. Isib. leli gama nje elithi DNA wasizwa nguDkt uMkhonza waseFilidi noDkt uZwide Nxumalo waseNgoje, bamchazela ngezikhathi ezahlukene ukuthi buyini lobu bulwembu obuchazwa ngeleDNA. Kuleli kwatholakala ukuthi noMnu uMbongeni Khuzwayo naye watolika kanje bengazange bakhulume futhi ongekho owayeseke walibona elomunye.
Ukuze abantu bezwe, babe nomuzwa wegama nomlayezo obekwa kubo, kufanele okushiwoyo bakuzwe nangolimi lwabo.
Uma umlayezo osemqoka okufanele abantu bawulalele ngokuphuthuma, uyagunguluza uma ungezokufinyelela kubo ngolimi lwabo. Ulimi lwabo lunomsindo, kwakhele kulo izakhi eziphathelene nezisho nezaga ezithile – okusheshe kushaye ngaphakathi kumuntu. Isiboniso nje: igama elithi uKholisekile liqhweba umoya nomongo walokho okuqubukayo emagameni asondelene njengosizi, isimilamongo, sakubona sakubeletha, isinama, ukukhala, ukweswela, isililo.
Kukude lapho ephuma khona uSolwazi Nxumalo mayelana nokuqanjwa kwamagama ezinto noma ezenzeko. Sikhetha nje okuncane kulokho abambe kukho iqhaza mayelana nokuthuthukiswa kolimi lwesiZulu. Waba semakomidini amaningi aqamba amagama ezifundo ezahlukene ezifana nezibalo, ezezwe nezalo, ezempilo, isayensi ngisho nezingcezu zenkulumo zesiZulu. Lawa makomidi kwakuyiZulu Language Committee, iZulu Langauge Board, iRadio Bantu Terminology Committee, kanye namakomidi ahlukene abeholwa yinyuvesi yaseKZN. Lawa makomidi ayeqamba amagama ezifundo ezahlukene njengosaykholoji, sosiyoloji, sayikhathri, ezenhlaliswana, ifiziksi, ezombusazwe, ezempilo, nomethamethiki. Waba semakomidini eDayosizi yaseThekwini YamaKhatholika eyayitolika izincwadi zenqubo yenkonzo ezahlukene, ekomidini YamaKhatholia okuhumusha iBhayibheli, eKomdini yeBible Society yokuhumusha iBhayibheli.
“Kusiza ngani ukuthi izinto zibizwe ngamagama olimi lwabantu lwendalo?” Lo mbuzo uqondiswe kuyena uSolwazi Nxumalo ikakhulukazi mayelana noKholisekile. Uthe: “Uma uMengameli wezwe ememezela inhlekelele yalesi sifo, kufanele akhulume ngalo ulimi oluziwa yizinhlanga eziningi. Kodwa ukuze akhulume isiZulu, isiSuthu, isiVenda, isiTsonga nesiXhosa, abe nomuzwa owanele mayelana nalokho okusuke kushiwo, kufanele wonke umnyombo walokho okushiwoyo akuzwe futhi ngolimi lwakhe. Uzwa kushiwo kuye, kuphathelene naye nomuzwa wakhe. Uzwa emithanjeni yakhe kukhona okuthi akasabele, akalalele, akalawuleke. Uzizwa enesibophezelo sokwenza njengoba kushiwo.”