Isu lokungqimuza ukudonsa kanzima kosomankomane
Sekwajwayeleka ukuthi osomankomane babayizinkanyezi zezwe uma bengqimuzana kuthi lapho sebewagaxe emgibeni amagilavu kube ukuphela kwabo nokunakwa kwabo , kodwa lokho kungase kuguquke emveni kwesiphakamiso sokusungulwa kwesikhwama esizobabhekelela.
ihlombe isiphakamiso sokusungulwa kwesikhwama esizobhekelela osomankomane uma sebewagaxe emgibeni amagilavu.
Ngaphambi kokusabalala koKhuvethe (Covid-19) lowo owayengumpetha womhlaba, uChris Eubank, uthinte abaningi ngesikhathi ephonsela inselelo izinhlangano eziqhathayo iWorld Boxing Council (WBC), iWorld Boxing Association (WBA), i-International Boxing Federation (IBF), iWorld Boxing Organisation (WBO) ne-International Boxing Organisation (IBO) ukuba zixhase lesi sikhwama ngemali.
Okuthinta kakhulu inhliziyo ka-Eubank ukubona inqwaba yosomankomane ababeshaya isibhakela esinenkosi phakathi sebeshayekile emqondweni.
U-Eubank, owahlula uThulani “Sugarboy” Malinga empini yeWBO Supermiddleweight ngowe-1992 e-England, ekhuluma neGlobal Boxing News uthe: “Ibuhlungu le nto yokubona ozakwethu bejabulisa izindimbane zabalandeli bamankomane kodwa ngokuhamba kwesikhathi babonakale sebedabukisa. Abanye babo ubathola sebengasakhumbuli lutho, okuyinto efana neva elihlaba lizwele kimina njengomuntu owayekuzwa ukushisa kwaseringini. Abanye balahlwa ngisho nayimindeni yabo ngoba sebethathwa njengento engelutho. Ingakho sengifinqe imikhono ngale mizamo yokusungula lesi sikhwama. Nginethemba lokuthi lezi zinhlangano iWBC, iWBA, i-IBF, iWBO ne-IBO zizosilalela isicelo sami,” kusho u-Eubank.
UDingaan “Rose of Soweto” Thobela, owanqoba isicoco seWBC Supermiddleweight, eseWBO neseWBA Lightweight, uthe umqondo ka-Eubank uphusile.
“Ngesikhathi ngisalwa iWBO neWBA yayidonsa imali ethize emalini engangiyilwela. Ngangikholwa ukuthi bayangibekela kanti angibuzanga elangeni. Ngazama ukuxhumana neBoxing South Africa (BSA) ukuthi ingilwele kodwa kwanhlanga zimuka nomoya. Kumqoka ukuthi usomankomane abuzisise ngezinkontileka azisayinayo uma ezolwa,” kusho uThobela.
ULehlonolo “Hands of Stone” Ledwaba naye uhambe emazwini kaThobela.
“Ngiwushayela ihlombe lo mbono kaChris. Ngikhumbula ngilwela ibhande le-IBF, kunemali ababengibambela yona okwathi sengizikhohlelwe bangibuyisela yona,” kusho uLedwaba owaphucwa uManny “Pacman” Pacquiao eLas Vegas, e-USA, isicoco seJunior Featherweight ngowezi-2001.
Isikhulu esiphezulu seBSA, uTsholofelo Lejaka, sithe lesi sikhwama singaba wusizo kodwa kungaba nezingqinamba.
“Umbono omuhle impela kodwa njengoba lapha eNingizimu Afrika izimpi zigqoza kangaka nje, izoqhamukaphi imali yokuxhasa lesi sikhwama? Lapha ekhaya sinesikhwama esikwazi ukusiza usomankomane uma edlula emhlabeni noma elimala eringini. Uma eshonele eringini ikhona imali etholwayo esiza ezindlekweni zomngcwabo,” usho kanje.
Sekubonakale kaningi osomankomane beshona sebedla imbuya ngothi futhi alukho usizo abalutholayo enhlanganweni engamele isibhakela kuleli. Lesi sikhwama asikwazanga ukusiza umndeni kaPeter “Terror” Mathebula oshone ekuqaleni kwalo nyaka esehlwempu yize adumisa iNingizimu Afrika ngokuyinqobela isicoco somhlaba okokuqala. UMathebula wabuya nesicoco seWBA Flyweight ngokuxebula uTae-Shik Kim waseKorea eLos Angeles ngowe-1980.
UMzuvukile Magcwaca, owayengumpetha weWBF, i-IBF neWBA International Bantamweight, kuthiwa udonsa kanzima ngemuva kokudutshulwa ezinyaweni. Njengoba athola ukulimala ngaphandle kweringi ngeke aluthole usizo lwalesi sikhwama.