Umhlangano oqukethe umhlahlandlela
Ukubhebhetheka kwegciwane iCorona kwaphoqa ukuba ezikanobhutshuzwayo zimiswe emhlabeni jikelele. Kepha amanye amazwe asevumile ukuthi ezikanobhutshuzwayo zibuye, kuleli sekulindwe umhlangano wabaphathi beligi kanye nabakaHulumeni ukuthi uphume nomhlahlandlela.
Sibhekwe ngabomvu isiphetho somhlangano womhlahlandlela wesizini yewezi-2019/20 ozobanjwa iPremier Soccer League, uMnyango Wezemidlalo oholwa uNgqongqoshe uNathi Mthethwa noMnyango Wezempilo ophethwe uDkt uZweli Mkhize.
Okwenza abantu babe magange ngalo mhlangano ukuthi eGermany sekumenyezelwe ukuthi isizini yeBundesliga izoqhubeka mhla zili-15 kwephezulu.
UHulumeni waseGermany nezinye iziphathimandla zakuleliya lizwe zinqume ukuthi amaqembu abuyele ensimini ngoba sekuphilwa ngaphansi kwemigomo yeZinga Lesine (Level 4).
Unobhutshuzwayo ubumisiwe kulandela ukubheduka koKhuvethe (Covid-19) oselubhubhisile emhlabeni.
Ubuholi bePSL bulindeleke ukuthi bethule umbiko wokuthi ocwaningweni abalwenziwe uHulumeni uzobona kufanele yini ukuthi uvunyelwe unobhutshuzwayo ukuthi uqhubeke. Kuthiwa amaqembu angama-32 okuhlanganisa naweGladAfrica Championship, ahlanganise amakhanda ukuzama ukuqhamuka nomhlahlandlela.
Kuhlawumbiselwa ekutheni phakathi kwezinto ezizophakanyiswa ukuthi imidlalo idlalwe ingabukwa yizihlwele. Abadlali bazofakwa izibulalimagciwane, imidlalo ibanjelwe ezinkundleni okungekho qembu elizovuneka kuzona bese kuthi abadlali bahlaliswe ngabodwana emahhotela ukugwema ukutheleleka ngephutha ngaleli gciwane.
Imidlalo yePSL yamiswa mhla zili16 ngenyanga edlule kanti kuningi ukukhuluma osekuvelile kubalandeli abafisa ivalwe isizini ngenxa yezizathu eziningi.
USihlalo wePSL, uDkt u-Irvin Khoza, usanda kumemezela ukuthi bazolandela umyalelo Womnyango Wezempilo yize iFifa isikwazile ukukhipha umyalelo wokuthi amasizini kumele asongwe ekupheleni kukaNhlaba.
IFifa ibuye yaqhamuka nesu lokuthi abadlali abebezophelelwa yizinkontileka zabo ngoNhlangulana balulelwe njengoba amasizini engakaphothulwa.
Nokuvulwa kwewindi ngeke kube sekupheleni kukaNcwaba. Lezi zincomo zenziwa ngemuva kokuhlangana kwabantu ababemele abadlali, amakilabhu nososeshini bamazwe ngamazwe.
Imvamisa amasizini aphela ngosuku lokugcina kuNhlangulana.
Lapha eNingizimu Afrika bekumele umdlalo wokugcina ube mhla ziyisi-9 kwephezulu. Njengamanje ili-111 imidlalo engakadlalwa okubalwa nemibili okungowandulela owamanqamu nowamanqamu yeNedbank Cup.
Okuphathisa ngekhanda izikhulu zePSL ukuthi ukuqhubeka nokuhlehliswa kwemidlalo kuzozifaka enkingeni ngezindaba zezinkontileka zabadlali nendaba yokuthi imaphi amaqembu azokhushulwa nalawo azogencwa yizembe.
IPSL izoba nomhlangano nje, iSouth African Football Association (SAFA), engamele ibhola ezweni, imemezele ukuthi ngokwayo kuzoze kudlalwe uma izwe seliseZingeni Lokuqala likathaqa (Level 1).
Ngaphambi kokumiswa kwemidlalo, iKaizer Chiefs ibihamba phambili ngamaphuzu amane ilandelwa iMamelodi Sundowns. KuGladAfrica Championship i-Ajax Cape Town izihola phambili ngamaphuzu ayisi-7 kanti iMoroka Swallows elele isibili isethubeni lokudla umhlanganiso.
UNgqongqoshe uMthethwa unxuse ukuthi iSafa nePSL behlise imimoya bavumelane ngokumele kuqhubeke ebholeni lakuleli.
Nokho akubona bonke abantu baseGermany abakujabulele ukubuya kwemidlalo. Abanye bagxeke osopolitiki abasebenzisa ithuba lokukhankasela izinhloso zabo.
Bathi njengoba kumiswe ukucula kwabantu bebaningi kwavalwa namashashalazi (Theatre), lokho kukucacisa ngokusobala ukuthi ukusondelana kwabantu akudingeki ngalesi sikhathi.
Bathi kungcono emdlalweni efana nokugwedla, ukuqukula izinsimbi negalofu lapho ukusondelana kwabantu kungandile.
Amaqembu akuBundesliga athola ingxenye eningi yemali ngokudayisa amalungelo okuzikhangisa ngokusakazwa kwemidlalo yawo.
Inkinga enkulu ikubaxhasi abangazimisele ukuqhubeka nokukhipha imali ekubeni izinto zimile. Ukuvezwa kwemidlalo kuthelevishini, idlalwe emisakazweni ibuye ivezwe emaphephandabeni kungenisa imali yokukhangisa kubaxhasi.
E-England khona abantu bamagange ngoba akukho okucacayo ukuthi sekungaqhutshekwa. EFrance, iParis StGermain isiqokwe njengompetha beLigue 1 kanti eHolland naseBelgium kumiwe ukudlala.