Injeje eyaba yizikhuphekhuphe zomzabalazo
Kulolu shicilelo sibheka izikhuphekhuphe zomzabalazo waboHlanga u-Andrew Zondo noSolomon Mahlangu abebekhunjulwa kulezi zinsuku. Ngaphakathi sibuka umlando wabo ojulile kanjalo nomnikelo wabo emzabalazweni wethu sonke.
Ekufikeni kwakhe uZondo wacashiswa eLamontville, ehlala nabanye ababesebenza umshoshaphansi neMK.
USolwazi uFatima Meer (ongasekho), wabhala incwadi esihloko sithi “The Mis-Trial of Andrew Zondo”.
Lapha uSolwazi uMeer ukhala ngokuthi abubangabikho ubulungiswa ecaleni eladonsa amehlo omhlaba likaSibusiso Andrew Zondo, owayezalwa ngumfundisi waKwaMashu.
UZondo wayeyisosha loMkhonto Wesizwe (MK), uphiko lwezempi lwe-African National Congress (ANC). Watshala ibhomu eSanlam Centre, eManzimtoti, ogwini oluseningizimu yeTheku mhla zingama-23 kuZibandlela ngowe-1985.
Kwafa abantu abahlanu kuqhuma lelo bhomu kwalimala nabanye ababeyothenga sekusondele uKhisimusi.
UZondo waboshwa eLamontville lapho ayecashiswe khona, lathethwa icala lakhe lamlahla.
Wabe esegwetshwa intambo wanqunywa ngoMandulo ngowe-1986 ePretoria.
UZondo wayengaguli ekhanda, ukutshala kwakhe ibhomu eToti kwakuyingxenye yomzabalazo wezikhali owawufuqwa yi-ANC.
Indaba kaZondo ihamba kanje: IMK yasungulwa mhla zili-16 kuZibandlela ngowe-1960 (ilanga lamaqhawe ngokwe-ANC). Minyaka yonke iMK, yayigubha leli langa ngokuthi itshale amabhomu eNingizimu Afrika, ilwa noMbuso wabandlululo.
Mhla zili-15 kuZibandlela ngowe-1985, ibutho leMK langena eNingizimu Afrika ngomngcele waseZimbabwe. Lelo butho lalikhuzwa nguMthetheleli Mncube waseSoweto, eGauteng.
Langena epulazini iChatsworth Game Farm, endaweni engamakhilomitha angama-30 eningizimu yedolobha iMusina, eLimpopo, ngasemngceleni waseZimbabwe.
Ibutho likaMncube lagqiba ibhomu kuleli pulazi elithandwa yizivakashi ngoba zibuka khona izilwane zasendle nezinyamazane.
Ibhomu lagqitshwa emgwaqeni owubhuqu phakathi epulazini.
UMnu uFrederick Johannes van Eck wayeshayela imoto ehamba nomndeni wakhe bebuka izilwane nezinyamazane kuleli pulazi kanti kuzoduma izulu kuqhuma ibhomu bafa bonke abelungu uVan Eck nomndeni wakhe kukhona nezingane.
Ukuhlaselwa kweChatsworth Game Farm kwashukumisa izwe ngoba nosigaxamabhande bombutho wezokuvikela bafika beyobona okwakwenzekile.
I-ANC eLusaka yakhipha isitatimende yathi uphiko lwayo lwezempi olwatshala lelo bhomu.
Kulapho-ke iSouth African Defence Force (SADF) yathatha isinqumo sokuphindisela ngokuhlasela izinkambu ze-ANC ekudingisweni.
ISADF yagasela eMaseru, eLesotho, ifuna izindlu ezazihlala amalungu e-ANC. UPat Hlongwane, i-Askari, nguyena owakhombisa amaBhunu izindlu okwakuhlala kuzona i-ANC eMaseru.
Kwabulawa amalungu e-ANC mhla zingama-20 kuZibandlela ngowe-1985 edutshulwa yiSADF.
EThekwini ngaleyo nkathi kwakukhona ibutho leMK elalisebenza umshoshaphansi elalaziwa ngokuthi yiButterfly Unit, likhuzwa nguSibusiso Robert “Sihle” Mbongwa (ongasekho) wasesigcemeni sakwaM KwaMashu. IButterfly yayisiqalile isebenza umshoshaphansi itshala amabhomu eThekwini, inezitshudeni zaseWentworth eMedical School.
Kwezwakala eNingizimu Afrika ukuthi iSADF ishaye yabhuqa eMaseru, kwashuba ezweni.
UMbongwa wathumela uDkt uSibongiseni Dhlomo, esafunda eMedical School, ukuthi ayolanda uZondo eSwazini owayeseqeqeshiwe e-Angola waba yibutho leMK ngokugcwele.
Ekufikeni kwakhe uZondo wacashiswa eLamontville, ehlala nabanye ababesebenza umshoshaphansi neMK. ULulamile “Comrade Tallman” Xate waseCala, e-Eastern Cape, owayesehlala eThekwini, nguyena owanika uZondo umyalelo wokuthi abheke indawo ayezotshala kuyona ibhomu kuphindiselelwe ukuhlaselwa kwe-ANC eMaseru.
Ibhomu lohlobo lweLimpet Mine uZondo walinikwa nguThembinkosi Jerry Mofokeng waseMatatiele owayehlala eLamontville nowagcina esephenduke ufakazi wenkantolo sekuthethwa icala likaZondo.
UZondo eyotshala lelo bhomu eToti wayehamba naye uMofokeng.
Abanye ababesebenza noZondo okunguStanley Sipho Bhila noPhumezo Ngxiweni, benqaba ukuba ngofakazi benkantolo ecaleni likaZondo.
UBhila wabulawa ngamaphoyisa eMbumbulu, amphosa eweni kwathi uNgxiweni wadutshulwa ngamaBhunu eVerulam wagqitshwa ezimobeni ngasoThongathi.
Kuqhuma ibhomu eToti nje, ngomhla zingama-23 kuZibandlela ngowe-1985, uMkhuzi wamaphoyisa kuzwelonke, uLe Grange, wayeseThekwini eyochitha amaholidi khona. Waziyela mathupha eToti maqede wabiza isithangami nabezindaba.
Wathi akukho phoyisa elizoba sekhefini eThekwini, akuthungathwe abatshale ibhomu eToti.
NgoKhisimusi wangowe-1985, kwashaqwa amalungu ebutho leButterfly. UMkhuzi walo uMbongwa, uDkt uVeejay Ramlakan, uDkt uDhlomo, uMapiki Dhlomo, uDuduzile Charity Buthelezi, uQonda Msomi, uXate noJude Fanscis bathathwa bayiswa eCamperdown, endaweni eyayisaVlaakplaas, lapho kwakusocongwa khona izishoshovu zepolitiki.
Isitatimende esakhishwa nguMengameli we-ANC wangaleso sikhathi, uMnu u-Oliver Reginald Tambo, sasingacacisi noma uyasigxeka yini isenzo sikaZondo. UTambo wathi abantu bayabulawa eNingizimu Afrika bengenze lutho.
Basocongwa ezindaweni ezahlukene kungekho zizathu.
UZondo wayemelwe wuqweqwe lommeli, u-Advocate Louis Skweyiya.
USolwazi uMeer uthi uZondo wayesemncane etshala leli bhomu futhi wayelandela umyalelo we-ANC, inhlangano okwakwaziwa ukuthi ilwela inkululeko.
UMehluleli uLeon, uyise kaTonny Leon okewaba ngumholi weDA kuzwelonke, wagweba uZondo izigwebo zentambo ezinhlanu eNkantolo eNkulu yaseScottburgh, ogwini oluseningizimu yeTheku.
Amathambo kaZondo alandiwe ePretoria angcwatshwa kabusha eRed Hill, eThekwini. Kunesikole eLovu, eningizimu yeTheku, esiqanjwe ngoZondo kanye nomgwaqo eManzimtoti.