Isifundazwe saseChina sesibeke imigomo
Beijing:
Isifundazwe esiseningizimu neChina iGuangdong sesibeke imigomo emisha esihlose ngayo ukulwisana nokucwaswa kwabamnyama ikakhulukazi ama-Afrika kuleya ndawo.
Kule migomo emisha amabhizinisi okubalwa kuwo izindawo zokudlela kanye nakwezokuthutha ayalelwa ukuthi aphathe abantu bokufika kanye namaShayina ngendlela efanayo.
IPhini likaNdunankulu wesifundazwe uZhang Xin lithe: “Le migomo ibheke kabanzi izikhalo ezivela kubantu bakuleli nabangaphandle, iphinde igqamise ukuphathwa ngokulingana kwabantu kanye nokulandelwa komthetho.”
Lesi sinyathelo siza emva kokuthi kuqubuke umsindo ngenxa yezinsolo zokucwaswa kwabantu abavela e-Afrika abahlala emadolobheni afana neGuangzhou kulesi sifundazwe ngenxa yeCoronavirus.
NgoNdasa amadolobha amakhulu eChina aqinise imigomo yokunqanda ukubhebhetheka kwalesi sifo emva kokukhuphuka kwesibalo sabantu abangena kuleliya zwe beneCoronavirus.
Abantu abavela ezwenikazi i-Afrika babe sebekhala ngokuthi imigomo le ikhetha iphela emasini ngokukhipha bona inyumbazana.
Ezigamekweni ezibikiwe, abantu abaningi babe sebehlolelwa isifo ngaphambi kokuthi bavalelwe ezindlini noma bayohlaliswa emahhotela izinsuku ezili-14 yize bengatholwanga nalo igciwane.
Kube sekusabalala namavideo ezinkundleni zokuxhumana ekhombisa aboHlanga bexoshwa ezindaweni zokuhlala, emahhotela nasezinxanxatheleni zezitolo.
Lezi zigameko zidale uqhekeko ebudlelwaneni phakathi kwe-Afrika neChina.
Abaholi base-Afrika bazigxekile lezi zigameko benxusa iBeijing ukuthi ithathe izinyathelo.
Ngesikhathi amazwe afana neNingizimu Afrika ekhiphe izitatimende ezigudla iguma, iNigeria, iGhana, i-Uganda neKenya abizele emhlanganweni amanxusa aseChina kula mazwe ukuze azwakalise ukukhathazeka kwawo.
Ngisho neMelika nayo ikhiphe isexwayiso iqwashisa aboHlanga bakuleliya zwe ukuthi bagweme izindawo lapho kwaziwa khona ukuthi bazocwaswa eChina. Abantu baseChina bona basole abantu abamnyama ngokungafuni ukulandela imithetho emisha yokunqanda ukusabalala kweCoronavirus.
Emva kokuphika kaningana abaholi becula iculo lokulandela umgomo wokungahambisani nokucwasa, kubonakele ukuthi isithunzi seChina siyangcoliseka ngokunjalo nobudlelwano bayo ne-Afrika.
Kube sekuba nemihlangano kanye nezingxoxo ngocingo phakathi kwabaholi banhlangothi zimbili. Ukubekwa kwemigomo emisha eGuangdong kukhombisa ukuthi iChina iyavuma ukuthi kukhona ukucwaswa kwabantu abamnyama kuleliya zwe.
Okhulumela amanxusa asemazweni ase-Afrika eGuangzhou, u-Alima Danfakha Gakou, uthe bayasamukela isinyathelo sikaHulumeni waseGuangdong sokulwisana neCoronavirus nokugcina abantu bephephile.
Iyisishiyagalolunye imikhakha eyalelwe ukuthi ilandele imigomo emisha yokulwisana nokucwaswa kwabantu abamnyama. Phakathi kwayo kubalwa ezokuvakasha, ezemfundo kanye nezikhungo zezempilo.
“Nanoma imuphi umuntu noma ibhizinisi akukwazi ukunqabela abantu bangangeni emahhotela noma ukuthi baqashe izindawo zokuhlala ngenxa yobuzwe noma ibala labo,” kusho umbhalo onemigomo.
Kanti yonke le mikhakha ebaliwe kumele iphinde ibe nenombolo yocingo eyisipesheli lapho abantu bokufika bezokwazi ukusizakala khona.
Kusazobonakala ke ukuthi lesi sinyathelo sizosiza yini ukwenza gcono isimo nobudlelwano phakathi kweChina ne-Afrika.