Ingcindezi isize ama-Afrika abuyela emphakathini
IChina igcine ibadedele abantu abavela e-Afrika abebekhishwe emphakathini yize bengazange bathintane nabantu abaneCoronavirus esifundazweni iGuangdong eningizimu neChina. Iningi labantu base-Afrika lihlolelwe iCoronavirus labe seliyalelwa ukuthi lihlale ezindlini lingaphumi, ngesikhathi abanye begqunywe emahhotela yize imiphumela ithe abanalo igciwane.
Ngikhulume nabaseNingizimu Afrika ababili abebekhishwe emphakathini emasontweni amabili edlule bengazelele ukuzwa ngabo ukuthi baphumile yini. UQinisile Mnguni (igamambumbulu) osebenza edolobheni iGuangzhou, uthe usheshe wadedelwa ngoLwesihlanu (17 Mbasa 2020) zingakapheli izinsuku ezili-14.
“Bafika ebusuku ngo-11:50 basitshela ukuthi sesikhululekile,” kusho uQinisile. Uthe babuya ngakusasa ekuseni wahlolwa base bekhipha nekhamera phambi komnyango ebifakelwe ukuqapha ukuthi akaphumi endlini.
Omunye waseNingizimu Afrika, uNoluthando Gumede (igamambumbulu) oseFoshan, uthe udedelwe emva kokuhlala izinsuku eziyisikhombisa ehhotela. “Yebo, ngikwazile ukufika ekhaya kanti sengibuyele nasemsebenzini,” kuchaza uNoluthando obezwakala ukuthi ujabulile.
Uthe omunye wabangani bakhe yena ukhishwe emva kwezinsuku ezintathu.
Ukukhishwa kwabantu emphakathini kuqale ekupheleni kukaNdasa ngesikhathi iChina iqinisa imigomo yeCoronavirus ngenkathi izama ukunqanda ukubhebhetheka kwalolu bhubhane okubonakala selufika nabantu abebehambele kwamanye amazwe emadolobheni afana neGuangzhou, iBeijing neShenzeng.
Nokho eGuangzhou nakwamanye amadolobha angomakhelwane, abantu base-Afrika babone ukuthi lo mkhankaso ubhekiswe kubona bodwa hhayi bonke abantu bokufika. Kubonakala sengathi izinyathelo zikaHulumeni zibe nomthelela wokuthi abantu abavela ngaphandle bathathwe njengengozi, ikakhulukazi aboHlanga. Abanye babika ukuthi bayexwaywa kanti abanye bayababalekela uma behlangana nabo endleleni.
Izinkundla zokuxhumana zaseChina sekube izindawo ezigcwala imibono engemihle ngaboHlanga. UQinisile uthe endaweni lapho abezivocavoca khona bamthumelele umyalezo besula ubulungu bakhe kula masonto adlule.
Uthe incazelo ayithola yaba ukuthi, ‘isibalo esikhulu sabantu abafika eGuangzhou beneCoronavirus esabantu abavela e-Afrika’ ngakho bayazivikela. “Yize ungakaze uphume eGuangzhou kodwa abantu base-Afrika bayayithanda imicimbi, ngakho-ke amalungu avela e-Afrika awasavumelekile. Sizokubuyisela imali yakho,” kusho umyalezo uQinisile awuthola kwabasendaweni yokuzivocavoca yakhe.
IChina ithole ukugxekwa okukhulu emva kokuthi kusabalale amavidiyo ezinkundleni zokuxhumana akhombisa abantu bekhishwa ezindlini lapho behlala khona, emahhotela nasezindaweni zokudlela emasontweni adlule.
Lokhu akuyinikanga neze iChina isithombe esihle emhlabeni, yize abakhulumela uHulumeni bezamile ukuziphika izinsolo zokucwaswa kwamaAfrika. Bezwakalisa ukukhathazeka, abaholi kanye namanxusa ase-Afrika banxuse uHulumeni waseChina ukuthi uluphenye lolu daba njengoba amaAfrika kubonakala ehlukunyezwa yize ewuthobela umthetho. Kanti kubonakala ingcindezi igcine ithela izithelo ezinhle njengoba sebebuyiselwe emphakathini. Abaholi baseChina bathe bayaqhubeka nokuxoxisana nabaholi base-Afrika ngodaba lwaseGoungzhou.
“Iningi labantu base-Afrika abahlala eGuangzhou babuyele emakhaya ngesikhathi beqhubeka bethobela imigomo yaseChina yokunqanda ukubhebhetheka kobhubhane,” kusho okhulumela uMnyango Wezangaphandle, uZhao Lijian.
Ngesonto eledlule, uNgqongqoshe Wezangaphandle eChina, uWang Yi, uxoxe ngocingo noSihlalo we-African Union Commission, uMoussa Faki Mahamat, iphini lakhe lahlangana namanxusa amazwe ase-Afrika angaphezu kwama-20 ukudingida udaba lomkhankaso wokulwa nokhuvethe eChina, ngokusho kwabezindaba bakuleliya lizwe.