Ikhambi lokugomela iCoronavirus belingakatholakali
INingizimu Afrika ingelinye lamazwe ahlaselwe uKhuvethe (COVID-19) oluhlasele umhlaba wonke. Babalelwa ezi-7 220 abantu ababanjwe yilesi sifo eNingizumu Afrika, kulabo sekushone abali-138. Ngokwenhlangano iWorld Health Organization (WHO), alikakabi bikho ikhambi lokwelapha noma umuthi wokuvikela lesi sifo. Inhloso yalo mbhalo akusikho ukuncoma noma ukugxeka amakhambi ahlongozwayo, kepha ukupha abantu ulwazi ukuze bezokwazi ukuzithathela izinqumo.
Abantu abaningi abanakho ukucaciseleka kahle ngamakhambi okuvikela nawokwelapha izifo. Abanye baye babone kufana, lokhu kunobungozi ngoba uma uHulumeni engabacaciseli ngeke banqabe imithi yokugoma kuphela, bazogcina sebenqaba namakhambi okwelapha. Lokhu kuyosibeka kwenkulu inkinga ngoba kuyobanzima ukusiza abantu abangasathembi lutho eqhamuka ezibhedlela ezilapha lesi sifo. Kunemibiko eminingi esike yavela ngaphambilini ngamakhambi okwelapha nawokuvikela isifo seCoronavirus, yize singakabuboni ubufakazi bokusebenza kwala makhambi, abantu baveze ukujabula kakhulu ezinkundleni zokuxhumana ngawo.
Ukwenziwa kwemithi yokwelapha
Kubalulekile ukuthi sazi ukuthi imithi yokwelapha neyokugoma yenziwa kanjani, nezinyathelo ezithathwayo ukuqikelela ukuphepha kwalabo abayiphuzayo. Yonke imithi yokwelapha neyokugoma, kubalulekile ukuthi idlule kosolwazi bacwaninge kabanzi ukuphepha kwayo ngaphambi kokuba ithathwe iziguli. Uma ngabe osolwazi sebegculisekile ukuthi iphephile futhi isebenza kahle ukwelapha noma ukuvikela, bakhipha imvume egunyaza inkampani ewakhiqizayo ukuthi isingawakhipha. Kunezigaba eziningi zokucwaninga ikhambi lokwelapha.
Isigaba sokuqala esokubuyekeza imibhalo yangaphambilini ephathelene nesifo okubhekwenwe naso. Kwesesibili isigaba ososayensi basebenza egumbini lokucwaninga (labhorethri), behlola amakhemikhali angenziwa ukwelapha, ekugcineni bawenze umuthi omusha. Lesi sigaba sesibili sisodwa kujwayeleke ukuthi sithatha iminyaka emine kuya kwemihlanu. Uma ngabe abacwaningi sebegculisekile ukuthi kungenzeka ukuthi bayalithola ikhambi, baye basebenzise ubuchwepheshe bamakhompyutha nezilwane ukubheka ukusebenza nokuphepha kwalowo muthi.
Uma ngabe umuthi usuphasile ekuhlolweni ezilwaneni kuye kudlulelwe kubantu abangaguli abali-10 kuya kwabali-100, kusuke kucwaningwa ukuphepha kwalowo muthi. Uma uphephile, kudlulelwa esigabeni esilandelayo sokubheka ukuthi inani elingakanani lalowo muthi elizokwazi ukwelapha leso sifo, kulesi sigaba, umuthi unikezwa abali-100 kuya kwabangama-500 abanalesi sifo esisuke silashwa. Esigabeni sokugcina kuye kube neziguli ezisuka e-1 000 kuya ezi-5 000, lapho ucwaningo lusuke lubheke ukuphepha, ukusebenza kahle kanye nokulinganiselwa okujwayelekile kwengozi yomuthi. Uma sezihlangene zonke lezi zigaba ziye zithathe iminyaka eyisishiyagalolunye. Zonke lezi zigaba kumele zigunyazwe i-Ethics Committee okuyiyona eqikelela ukuphepha kanye nokuvikelwa kwamalungelo alabo abasuke bebandakanyeka kulolu cwaningo.
Ucwaningo iSolidarity Trial
INingizimu Afrika iyingxenye yamazwe enza ucwaningo ngamakhambi amane okungenzeka alaphe lesi sifo. Lolu cwaningo lwaziwa njengeSolidarity Trial luholwa iWHO. Lolu cwaningo lufake la makhambi; iRemdesivir, iChloroquine noma iHydroxy Chloroquine, iLopinavir ehamba neRitonavir kanye ne-Interferon Beta-1a. Lolu cwaningo lwenziwa emazweni amaningi ahlukene. La makhambi abevele ekhona esetshenziselwa ukwelapha nokudambisa izifo eziningi ezahlukene okubalwa kuzo umalaleveva kanye nesandulela ngculazi. Kumele uHulumeni abachazele kabanzi abantu ngalolu cwaningo ukuze kungabi bikho ukusola. Uma bengachazelwa kahle abantu ngalolu cwaningo, abanye bazogcina bewanqaba nawo la makhambi yize kunobufakazi bokuthi ayasebenza.
Ukuthembeka kukaHulumeni
Njengamanje izwe lethu lisempini, kuliwa neCOVID-19, uma sisempini, kubaluleke kakhulu ukuthi sethembane, ikhalulukazi sethembe laba abasiholayo. Kuningi abantu abakushoyo ezinkundleni zokuxhumana ngendaba yamakhambi okuvikela nokulapha iCoronavirus. Yize singakugqugquzeli ukuthi uHulumeni aphendule yonke into eshiwo ezinkundleni zokuxhumana, lokhu sibona sengathi kumele angenelele eze nezincazelo ezizogculisa isizwe ngale mishanguzo. Sekuvele imikhankaso eminingi egqugquzela abantu ukuthi bangayithathi imithi yokugomela isifo iCOVID-19 mzukwane isitholakele ngoba abanye bethi kungenzeka ibe nobungozi. Yize le nkulumo yandile, asikakabuboni ubufakazi obufakazela ubungozi bemithi yokwelapha noma yokuvikela iCOVID-19.
Ubungozi obukhulu obukhona obokuthi noma angatholakala amakhambi okuvikela lesi sifo, kuyoba nzima ukugculisa abantu bakithi ukuthi ngempela leli khambi liyasebenza. Lokhu kuyobeka ingcindezi enkulu ezisebenzini zezempilo, okuyizona okumele zinike abantu la makhambi. Kuzogcina sekunzima nokufundisa abantu ngalesi sifo uma sebeze bakholwa ukuthi lesi isifo esakhiwe. UHulumeni kumele ayicacise le nto ngoba uma eqhubeka eyiziba izodala umonakalo omkhulu, abantu bazokholwa ilokhu abakuzwayo ngalaba abangahambisani nala makhambi. Abantu ngeke bamthembe uHulumeni, nakho konke akushoyo. Leli ithuba lokuba abaholi bafundise abantu ngocwaningo olwenzekayo emhlabeni ngalesi sifo bese beyaveza ukuthi lusithinta kanjani thina lolu cwaningo. Uma silwa nobhubhane, kubaluleke kakhulu ukuthembana.
Abalaphi bendabuko
Uma ngabe sisempini, kubalulekile ukuthi sisebenzise zonke izikhali esinazo ukuze sinqobe. Akufanele sishiye ngaphandle abelaphi bendabuko ngoba abantu angeke bayeke ukuya kubona. Kumele sizibuze ukuthi iyiphi indima engagadulwa ngabelaphi bendabuko ekulweni nalesi sifo. Kumele kube khona izindlela zokusebenzisana nokulalela imibono yabo, sikwazi ukufunda kubona nabo bafunde lokhu abangakufunda.
Ukuze sinqobe lesi sifo, kumele sithole umuthi wokuvikela noma wokuselapha kodwa okubaluleke kakhulu ukuthi abantu bonke bakithi bangabi nokungabaza nokungayithembi le mithi. Njengoba kunogcwaningo olubheka amakhambi okwelapha lesi sifo, kubalulekile ukuthi bonke abantu bakithi bazi ngawo, baphinde baqaphele nosomathuba abazofuna ukuzuza ngalesi sifo ngokusabalalisa amakhambi angahloliwe. Ubuholi bukaHulumeni abungalandeli ngemunva, akube yibo obusiholayo nobusifundisa kabanzi ngokwenzekayo.