Ukhuvethe luphazamise izinhlelo emaQadini
Isimo sikathaqa, imvalelwakhaya, esiqhubekayo ezweni sishaye kwezwela esizweni samaQadi esidumile futhi esinomlando onzulu esizweni sikaPhunga noMageba.
Ngesikhathi elaboHlanga liyokotha iNkosi yamaQadi, iNkosi uMqoqi kaMzonjani kaNdodembi, kaMandlakayise, kaMqhawe, kaDabeka, kaDube kaSilwane Ngcobo ekomkhulu layo eShayamoya, eMzinyathi, enyakatho yeTheku, lithole ishudu lesizwe ligcwele lichichima. Ziningi izinhlelo ezikhona zokuthuthukisa isizwe sikaVemezitha kodwa ezivinjwe umkhuhlane owehlele izwe.
Umlando usilandisa ukuthi iNkosi uDube kaSilwane Ngcobo weNdlu yasemaQadini, ayigcinanga ngokuba yisandla sokuphosa eSilweni uShaka kaSenzangakhona, umbumbi wesizwe samaZulu, kodwa yayingumngani owethembeke kakhulu. Ngesikhathi sekubulawa iLembe (iSilo uShaka) ngetulo elenziwa nguMntwana uMkabayi kaJama, kwabekwa uDingane esihlalweni soBukhosi KwaZulu.
Nguyena uMntwana uMkabayi owatshela uDingane ukuthi angeke abuse ngokunethezeka KwaZulu uma kusekhona abangani nezingwazi zeSilo uShaka, ngakho akazizingele zonke azise kwagoqanyawo. UDube kaSilwane Ngcobo noZihlandlo kaGcwabe Mkhize babengeke basale kulabo okwakufanele babulawe ngoba babengabangani beLembe abakhulu futhi belihlabanela ezimpini.
Isizwe samaQadi sasakhe eNkandla ngenkathi kubulawa iLembe sakhelene namaChube (isizwe saKwaShezi). ISilo uDingane sathumela ukuthi amaQadi awalethe izigxobo esigodlweni saso eMgungundlovu, esasiphakathi kwemifula uMkhumbane neNzololo, eMahlabathini. Ngesikhathi efika amaQadi elethe izigxobo lezo zokubiya isigodlo, iSilo uDingane sathi asikhonjiswe uDube kaSilwane, iNkosi yawo. Kungaleyo nkathi-ke amabutho eSilo uDingane adumela khona iNkosi uDube yamaQadi ayibulala.
Isizwe samaQadi saphoqeleka ukuthi siyifulathele iNkandla, sewuka njalo sazesawela umfula uThukela ngowe-1832.
INkosi uMqoqi kaMzonjani ikhala ngokuthi lapho kwatshalwa khona iNkosi uDube kaSilwane eNkandla alikho idlinza, into ekhona isivivane nje samatshe. Isizwe sisezinhlelweni zokuyokwakha idlinza elifanele iqhawe lamaQadi.
Ohambeni lwawo efuduka ebheke eningizimu amaQadi, afika azinza endaweni okuyiKwaMaphumulo njengamanje isaphathwe yisizwe sakwaQwabe. Leya ndawo abazinza kuyo isengaphansi kwamaQadi nanamhlanje, kunenkantolo yeNkosi uMqoqi nakhona.
Umuntu wokuqala owahola amaQadi aze ayofika eThekwini, emtateni, nguMadlukwana kaSilwane Ngcobo. UMadlukwana wayebambele uDabeka indlalifa nenkosana yeNkosi uDube kaSilwana uBukhosi. UDabeka wayemncane esele eNkandla ekhaya konina. Kube sekusuka amadoda aKwaNgidi (oHlomuka) nawakwaGoba (oJangaza) besuka eMzinyathi ngoba bezalana nabaKwaNgcobo, bahamba bayolanda uDabeka inkosana yamaQadi eNkandla, ekhaya konina.
UDabeka ufike amaQadi esezinzile, eThekwini, amlobolela abafazi waganwa wabekwa waba yiNkosi yesizwe. Umuzi weNkosi uDabeka wokuqala waba lapho osekuyiMorningside njengamanje. Isifunda esikhulu samaQadi kubusa iNkosi uDabeka, kwakuseMkhuphulangwenya.
Sisuka ezansi nomfula uMngeni sedlule eNtabantuzuma (eNtuzuma), sidlule la osekuyiClermont khona namhlanje, sifike emzini omkhulu weNkosi uDabeka, eThembeni.
Umuzi waseThembeni weNkosi uDabeka washiswa nguSir Benjamin Pine, wakha elakhe inxuluma khona wathi kusePinetown. INkosi uDabeka yehlela osebeni lomfula uMngeni. Ingxenye enkulu yesizwe samaQadi iseNdwedwe, nenye ingxenye yaKwaNgcobo (isizwe saKwaNyuswa neNdlu yaKwaNgongoma, KwaMavela.)
Lezi zinto yizona ezisezinhlelweni zesizwe samaQadi zokuthi zivuselelwe. INkosi uDabeka ihambile yaya eNkandla isikhulile, ithi iyolanda uyise uDube ngehlahla lomphafa lapho akhothamela khona. Ithe ifika eNkandla iNkosi uDabeka, abantu bakhona bacabanga ukuthi izophanga indawo. Bayithumelele ngohlanya lwaKwaNtombela, ukuthi luyigwaze, luyibulale. Isigwaziwe iNkosi uDabeka, kuthiwa yaphimisa amathe yafa, nohlanya lolo olwayigwaza lwafa ngaso leso sikhathi. Selihlonziwe idlinza leNkosi uDabeka eNkandla kodwa alikho esimweni esifanelekile. INkosi esesihlalweni samaQadi ithi isizwe siphezu kwezinhlelo zokulivuselela iliba leNkosi uDabeka, lembulwe kabusha.
INkosi uMqhawe kaDabeka ibuse eMaQadini KwaZulu kubusa iSilo uCetshwayo. Yayicebe ngendlela eyisimanga iNkosi uMqhawe, izinkomo zayo zibulala inyoka emzileni. Indawo ehlala abadla izambane likampondo, eMhlanga, eDurban North , eLa Lucia, eLa Mercy kwakungamadlelo ezinkomo zeNkosi uMqhawe.
Kunecala enkantolo eNkulu eThekwini isizwe samaQadi sibanga umhlaba nomphakathi wamaNdiya otshale izimoba ngasemathuneni eTafuleni. Isizwe samaQadi sithi abaseNdiya bafika bezohlahla umoba KwaNkosibomvu (oThongathi) ngoLwezi we-1860, isizwe samaQadi sekukudala sabakhona ngakho angeke aboMdabu baseNdiya bathi bangabanikazi bomhlaba. Udaba beluzongena eNkantolo ngomhla ziyisi-6 kuNhlaba (ngoLwesithathu).
INkosi uMqhawe kaDabeka ithenge amapulazi ali-14 ayebizwa ngokuthi yiNoordgedagt phakathi koMgungundlovu neBulwer. Leyo ndawo kuthiwa kuseNcwadi njengamanje phezu komfula uMlambomunye. INkosi uMqoqi inenkantalo nesizwe sayo kuleyo ndawo, ingaphansi kwamaQadi. INkosi ithi leya ndawo izoqanjwa ngamanye amakhosi asemaQadini noma iNkosi uMzonjani, uNdodembi, uMandlakayise okanye yena uMqhawe uqobo lwakhe.
AmaWeseli (Methodist Church of Southern Africa) ayesuka edolobheni iVerulam phesheya kwezilwandle akhonza esizweni samaQadi, endaweni okuthiwa yikwaPikinini. Yizona zonke izinhlelo ezizoheha abantu nokuvuselela umlando ngesizwe saMaQadi ezibanjwe yimvalelwakhaya.