Akubanga yisasasa ukwehla kwentengo kaphethroli izimoto zimile
Umnotho awuzange ume ngokuvalwa kwezitolo namanye amabhizinisi. Ukufika kwento okade babeyifisa abantu, ifike ngesikhathi bengenakuyamukela ngentokozo kuyalinciphisa isasasa layo. Kuthande ukuphathisa ngenhliziyo ebuhlungu ukubona intengo kaphethroli yehla kodwa abantu bengavunyelwe ukusebenzisa izimoto. Akuzwelanga ukwehla kwentengo abantu bebe bengakwazi nokudumisa imoto iphume ngesango. Into enhle kumele ijatshulelwe, kodwa akukho kujabula okutheni uma ingenalusizo lwalutho kuwe ngaleso sikhathi. Sigcina kule nkundla izwe belisagqenywe engeqiwa ntwala ngokwehliselwa ezingeni likavobo ngabeMoody’s, abeFitch kanye nabeStandard & Poor’s. Lithe lisopha kwatheleka ubhubhane lokhuvethe lwavala amabhizinisi kwaba yiswinswi emnothweni. Abantu bapake izimoto zokuthutha nezokuhamba kwathula emigwaqweni yaseNingizimu Afrika. Kusabhekwe lesi sibhicongo intengo kawoyela yehle ngokushesha yafinyelela ezingeni eliphansi. Kube ngesinye sezizathu ezenze kwehla intengo kaphethroli nodizili ngendlela engakaze ibonwe. Ziyaqhubeka izimakethe zemali zidlala umdlalo wazo wokwehla nokwenyuka.
NgoMsombuluko zizine kuNhlaba 2020
Kubi erandini kulesi sikhathi ngoba liyaqhubeka linyinyeka usuku nosuku uma liqhathaniswa nezinye izimali.
Kuvulwe NgoMsombuluko idola lilingana namarandi ali-18,88 okukhombisa ukuthi irandi lehle ngamasenti angamashumi ayisikhombisa nesihlanu kulokho elaliyikho kuvalwa izimakethe ngoLwesiNe olwedlule.
Upondo waseBritain nawo ukhuza phezulu ngoba kuvulwe ulingana namarandi angama-23,53.
IYuro nalo lilandela emgudwini wezinye izimali ezimise kabi irandi ezimakethe. Kuvulwe ngoMsombuluko iYuro lilingana namarandi angama-20,66. Irandi lehle ngamasenti angama-95 kulokho elaliyikho ngoLwesine kuvala izimakethe.
NgoLwesibili ziyisi-5 kuNhlaba 2020
Uma sibheka ukuthengwa kwezimoto kubonakala kwehle ngamaphesenti angama-98,4 enyangeni edlule uNdasa. Abanye bathi abathengi bebevaleleke emakhaya, futhi bengasiboni isidingo sokuthenga imoto engezukuhamba. Kukhombisa indlela imvalelwakhaya (lockdown) ewulimaze ngayo umnotho.
Kuvukwe ngoLwesibili idola lase-USA lithanda ukwehla kulokho ebeliyikho ngayizolo. Kuvulwe lilingana namarandi ali-18,46.
Irandi likhombise ukubuyelwa ngamandla ekuseni ngoLwesibili lakhula ngamasenti angama-51 kulokho ebeliyikho ngayizolo. Kuvulwe uPondo waseBritain ulingana namarandi angama-23,02.
IYuro likhombise ukwehlulwa yirandi ngoba belilingana namarandi angama-20,14.
NgoLwesithathu ziyisi-6 kuNhlaba 2020
Idola lase-USA likhombisa ukuthi liyalidudula irandi. Kuvulwe idola lilingana namarandi ali-18,38 okungconywana kunangayizolo.
Kuvulwe ezimakethe uPondo waseBritain ulingana namarandi angama-22,86 okuthokozisayo uma irandi likhombisa ukuba namandla.
Irandi likhombise ukuba namandla kuvukwa ngoLwesithathu. Kuvukwe iYuro lilingana namarandi ali-19,91. Okuthanda ukungathokozisi wukuthi intengo kawoyela iyakhuphuka okungase kwenze intengo kaphethroli nodizili yenyuke enyangeni ezayo uNhlangulana.
NgoLwesiNe ziyisi-7 kuNhlaba 2020
Irandi likhombise ukuzabalaza kanti abahlaziyi abaningi bebengalinikezi ithemba ngendlela isimo somnotho esiyiyo. Kuvukwe ngoLwesine likhombisa ubungcono kunento ebeliyiyo emasontweni amathathu edlule.
Kuvule izimakethe zemali ngoLwesiNe idola lase-USA lilingana namarandi ali18,68. Kuthanda ukungabi kuhle ngoba lehlile kulokho ebeliyikho lethembisa ngoLwesithathu.
Uma liqhathaniswa noPondo waseBritain likhombise ukusindwa irandi, ngoba bekudingeka amarandi ahlangane abe ngama-23, 05 ukuze alingane noPondo.
NeYuro alizibekile phansi lingafuni ukusala ezimalini zamanye ezisempini nerandi, kuvule izimakethe lithe ukudlondlobala lalingana namarandi angama-20,16.
Okuthokozisayo nokuletha ithemba ngukuthi amabhizinisi ayaqala ayasombuluka manje emva kokuvala thaqa ngenxa zoKhuvethe, okukhomba ukuthi iningi lizozibuyekeza izindlela zokwenza ibhizinisi limelane nesikhathi esikuso.