Cabangisisa: Indlela ebukeka iyinhle emehlweni kodwa…!
Kuleli sonto omunye wabahlobo bami uthole umyalezo ophuma kwelinye lamabhange amakhulu elamboleka imali eminyakeni eyedlule ethenga umuzi. Lo myalezo bewumnika ithuba lokuphefumula angasikhokhi isikweletu izinyanga ezintathu ezilandelanayo kusukela ekupheleni kwale nyanga ephezulu. Ngithole ukuthi baningi abanikwe leli thuba ngamabhange, bezwelwa ngesikhathi kungasetshenzwa kuhleziwe emakhaya kubalekelwa iCOVID-19.
Uma uyibheka le nto ungayihlaziyi kuyinto enhle futhi emnandi ukunikwa ithuba lokungakhokhi nje ngenye inyanga uthathe imali obewuzokhokha ngayo isikweletu wenze okunye okuyisidingo. Isikweletu siyinkinga eyenza umuntu onaso ahlale efisa ukuthola ithuba lokuphefumula noma ehlukane naso kuphele lapho. Ngakho-ke igcagcele esokeni kwabanye abazobona ithuba lokuphefumula. Kuhle noma sewuzibona uwele ngelibanzi ungakhohlwa wukufundisisa lo mbhalo wasebhange ngokuphelele, ufunde yonke imigqa uyizwe kahle. Kunendawo ethi, ‘kodwa sizoqhubeka sifake inzalo eyejwayelekile emalini ebolekiwe inyanga nenyanga njengokujwayelekile’. Ngamanye amazwi kuzokweluleka isikhathi sokukhokha isikweletu ngezinyanga ezintathu. Kusho ukuthi ibhange lizoyifaka inzalo yalo esikweletini esiphelele. Ngemuva kwezinyanga ezintathu kunemali osuke sewuyongile ebeyizongena enzalweni ukuba kawukhokhanga.
Sengizwile ukuthi akusilona leli bhange lalo mlisa kuphela elenza lolu zwelo kodwa futhi kunamagalaji adayisa izimoto, nezitolo ezikweletisayo ezithumelele abathenga ngezikweletu kuzo umyalezo ofuze lona otholwe wumhlobo wami. Okuhle ngalo myalezo uyamnika umuntu ithuba lokukhetha ukuthi uyahambisana nokungakhokhi izinyanga ezintathu noma akakuvumi lokhu kuxegiselwa. Lokhu kuqondene nesikhathi umhlaba nezwe lethu elidlula kuso, lapho amabhizinisi evalile, abanye bengasebenzi futhi bengezukuhola kule nyanga, mhlawumbe nezayo. Abanye kosomabhizinisi abanasiqiniseko sokuthi bayophinde bayivule nini iminyango yamabhizinisi abo, bahwebe ngokujwayelekile. Iqiniso lithi, kukhona amabhizinisi asevalwe unomphela ngenxa zesimo somnotho, nokuthi amanye abevele edonsa kanzima kungakabi khona imvalelwakhaya (Lockdown). Ngenxa yalokho abasebenzi abanasiqiniseko ukuthi kuyothi kuphela imvalelwakhaya bayokube besenayo yini imisebenzi.
Kulesi sikhathi imiqondo yabanye abangabasebenzi ididekile ngoba babheke isikhathi abangasazi kanti abanye abazukuhola kuze kuphele amasonto amathathu, nangaphezulu ngenxa zokuthi ivalile inkampani. Uma amabhange eveza ithuba lokungasikhokhi isikweletu, abanye bazosizakala ngoba bazokube bengaholi kulesi sikhathi, kodwa kube kubhekeke bakhokhe izikweletu ezibamele inyanga nenyanga.
Iyabongeka into eyenziwa ngamabhange kulabo abawakweletayo, ngoba kukhombisa ukuzwelana nabo. Nokho kuhle ukuxwayisa nokunxusa labo abazokube beqhubeka behola ngesikhathi imisebenzi ivaliwe, ukuba bangayemukeli le ndlela yozwelo lwezinyanga ezintathu, kodwa baqhubeke bazimpintshe bakhokhe isikweletu ngokujwayelekile.
Kumele singakhohlwa wukuthi ibhange lisebhizinisini lokubekela imali kanye nokuyeboleka abantu abayidingayo. Njengebhizinisi imali liyenza ngokuzalanisa imali ebolekiwe likwazi ukuma njengebhizinisi elisebenza imali. Uma kwelulwa isikhathi umuntu ayibolekwe sona imali, lithola inzuzo ethe xaxa ibhange kunaleyo ebelizoyenza uma sifinyezwa isikhathi.
Kuyimvelo yomuntu futhi yinto ejwayelekile neyamukelekile ukuthi umuntu ayithande futhi imhehe into ezomjabulisa manje kunaleyo ezomjabulisa ngakusasa. Ikusasa lithathwa njengento ekude futhi ongenasiqiniseko sayo. Ngokuthanda ukuzijabulisa manje iningi lenza izinqumo ezingacatshangisiswanga zacutshungulwa inzuzo noma ukulahlekelwa eziza nako.
Loshwele onikezwe abakweleta amabhange ungicabangise izindlela ibhange elenza ngayo inzuzo. Inzuzo yebhange ivela kuleyo mali abayibekela labo ababeka imali yabo kulo. Kwamanye ama-akhawunti inzuzo liyenza usuku nosuku ibhange, kanti kwamanye inzuzo liyenza njalo ngenyanga. Ibhange lisuke lingephuli mthetho ngokukhokhisa inzalo lowo esuke limbekele kumbe limuboleke imali. Kunemithetho elawula lokho evikela abanikazi bebhange futhi ivikele nalabo ababeke futhi baboleka izimali ebhange. Into ebalulekile wukuqikekela ukuthi akekho olahlekelwayo kulobo buhlobo phakathi kwebhange nomuntu.
Ngaso sonke isikhathi ibhange lizama ukwenza inzuzo enkulu ngendlela esemthethweni futhi evunywe yilowo ozokhokha imali. Ngokunjalo-ke nalowo osuke ebeke imali kumbe eyibolekile ebhange kumele akwenze umsebenzi wakhe ukuyigada imali yakhe. Akumsizi umuntu ukuthatha imali ayiphonse ebhange, angabe esayilandela abheke ukuthi ilondolozeke kahle yini, futhi bese evuma konke akutshelwa yibhange ngaphandle kokukuhlolisisa.
Iningi laboHlanga likhule laphila ngaphansi kwesimo sokwethemba konke, ikakhulukazi okubhalwe ngesilungu. Umuntu angashona emgodini ngoba izwi liphume ngesilungu, noma lowo olikhiphile engowebala elimhlophe. Lokhu engikushoyo angikusho ngokuba ngibukela phansi ukujula kokucabanga kwaboHlanga. Ngikusho ngenhloso yokuthi kumele sihlale sikhumbuzana ukuthi kumele sikuhlaziye konke okubekwa phambi kwethu ngaphambi kokukusebenzisa. Akusikho konke okuyosisebenzela. Umhlaba nesikhathi esiphila kuso sibuka cishe yonke into ngehlo lenzuzo. Noma iyinhle kangakanani into, futhi ilethwa ngesitsha esihloniphekile, kumele sicwaningisise ukuthi esizokugwinya ngeke yini kusiphedukele esiswini, singasenakukukhipha.
Ngiyakhuthaza ukuthi ongakasenzi isinqumo mayelana nokuqhubeka akhokhe noma emukele lo nyangantathu osasipho, kumele asenze ngokuhlakanipha. Okunye okukhuthazwayo kulabo abanezikweletu, ngukukhokha okuthe xaxa ukuze isikweletu sehle ngokushesha.