Impi ayibhekiswe obhubhaneni iCOVID-19
Umbutho kaPoqo iPan Africanist Congress (PAC) of Azania ifisa ukuthatha leli thuba yenabe ngezimvo zayo ngodaba lweCOVID-19 esiqagulwe inhlangano yezempilo yomhlaba (World Health Organization) njengobhubhane olubhekene nomhlaba wonke. Sizobuka izinyathelo esezithathwe yizwe kuze kube manje kanjalo nesifisa kwenziwe ukuya phambili ukuvikela abengabadi kulolu bhubhane lweCOVID-19.
Umbutho kaPoqo yize wazi kahle ukuthi lolu bhubhane alukasondeli ndawo ezifweni esezithathe imiphefumulo eminingi yama-Afrika efana nesifo sofuba, isandulela n g cula zi( H I V ), ushukela (diabetes) kanjalo nomalalelaveva (malaria fever) kodwa sikholelwa ukuthi noma iCOVID-19 ingakatheleli abantu abaningi abangama-Afrika futhi besebencane abasashonile ngeke sibe budedengu sithi ayingasukunyelwa. Ukungasukunyelwa kwayo kungayenza ibhebhetheke kuhle komlilo wequbula otshanini obomile. Kungaleso sizathu umbutho kaPoqo uhambisene nesinyathelo sikaMengameli sokuzama ukwehlisa izinga lokubhebhetheka kwalolu bhubhane. UPoqo akafuni nokuthi kulahleke ngisho owodwa umphefumulo womAfrika yingakho siseka konke onhloso yakho kuwukuvikela impilo yama-Afrika.
Umbutho kaPoqo ukholelwa ukuthi uHulumeni walusukumela emva kwesikhathi lolu daba lweCOVID-19 yize umhlaba wazi ngalolu daba kusukela ngoMasingana wezi-2020 ngesikhathi iChina ihlaba umkhosi wokuthi ibhekene nomkhuhlane ohlasela ukuphefumula. Inhlangano yezempilo yomhlaba yaxwayisa amazwe omhlaba ngawo uMasingana ukuthi awathathe izinyathelo ahlole futhi aqaphele bonke abantu abavela ngaphandle ikakhulukazi labo abavela ezindaweni eseziyisizinda salo mkhuhlane. Kuwukubona kwethu njengePAC ukuthi uHulumeni wethu wehluleka ukuthathela phezulu lezi zexwayiso. Amazwe athatha izinyathelo masishane akwazi ukuzivikela kulolu bhubhane ngesikathi.
Umbutho kaPoqo ukholelwa ukuthi izwekazi i-Afrika ngenxa yokuswelakala kwezinsiza zezempilo, imitholampilo nezibhedlela ngeke lakwazi ukumelana nokubhebhetheka kwaleli gciwane leCOVID-19 ngendlela okwenzakala ngayo eNtshonalanga, e-Europe nase-Asia. Uma leli gciwane linikeza ubunzima amazwe anenkindlane yemali, imitholampilo nezibhedlela ezisezingeni lomhlaba koba inkinga enkulu uma livunyelwa lithole ukuzinza ezwenikazi i-Afrika.
Siwumbutho wePAC sivumelana noHulumeni kulezi zinto ezilandelayo:
Ukuthi impilo yabantu inikezwe ukubaluleka ngaphezu kwemali.
IKwaZulu-Natal ibe isifundazwe sokuqala ukuba nezizinda zokuvalelwa (Quarantine Centres) asezifundeni.
Uhlelo lokulekelela abangasebenzi nabadla imbuya ngothi. Akekho umuntu omele alale engadlile ngoba engasebenzi. Sifisa lokhu kuqhubeke emva kweCOVID-19
Ilokhu okulandelayo esingeneme ngakho ezinhlelweni zikaHulumeni zokulwa neCOVID-19:
Lolu daba lasukunyelwa sekuhambe isikhathi okwasibeka esichengeni
Inani labantu abathelelekile nasebeshonile liphezulu KwaZulu-Natal
Ukuziphatha koNgqongqoshe bezokuphepha abakhuluma engathi sekuphakwe impi ebhekiswe kubantu bakithi kanti impi ibhekiswe kuCOVID-19
Ukuhlukunyezwa komphakathi ngamaphoyisa namasosha
Ukubekwa engcupheni kwempilo yezisebenzi zezempilo ngokungahlinzekelwa ngezevatho ezifanele ukumelana naleli gciwane emitholampilo nasezibhedlela zikaHulumeni nakwabazimele
Ukuqhubeka koMkhandlu weTheku ufudula ngenkani abantu abahlala emijondolo (Ekuphumuleni nase-Azania)
Ukungavikeli ngendlela abantu abasemajele njengoba leli gciwane seliqalile ukuhlasela izisebenzi zasemajele nababoshiwe
Ukuyekelela izisebenzi zasezitolo zingavikelekile
Ukungabi nohlelo oluqondile kwezokuthutha ukuvikela abantu nabashayeli
Ukuthi amabhizinisi amancane abantu bakithi azithola evaliwe kusebenza awongxiwankulu kuphela
Imizamo yamazwe asentshonalanga okufuna ukuzohlola amakhambi abo la besebenzisa abantu bakithi njengamagundane
Esikuzwe kuMengameli kokuthi kuzoyofunwa imali kosathane i-IMF neWorld Bank
Umbutho kaPAC ukholelwa ukuthi kubalulekile ukuthi ezinhlelweni zikaHulumeni zokulwa nalolu bhubhane lwegciwane lweCOVID-19 impilo nezidingo zabantu abadla imbuya ngothi, abangasebenzi, izingane nabadala zithathelwe phezulu. Umbutho kaPoqo uyayamukela imitheshwana kaHulumeni onhloso yayo ukulekelela abantu bakithi ukuthi bavikeleke kuleli gciwane. Le mitheshwana yakhelwe ezinhlelweni ezibonakele zisebenza emazweni anjengeChina, iSouth Korea, iMalaysia, iTaiwan namanye ekwehliseni izinga lokutheleleka nelokuthi abantu babulawe ilolu bhubhane. Lapha singavumelani khona noHulumeni indlela imitheshwana iphoqwa ngayo ngamaphoyisa namasosha.
Siphakamisa lokho okulandelayo njengezindlela zokulwisa igciwane leCOVID-19 nokuvuselela ukusebenza komnotho esifundazweni nasezweni ngokubanzi:
Ukuhlinzekelwa kwazo zonke izisebenzi zezempilo nalabo ekungeke kwaphileka ngaphandle kwabo ngezivatho zokuzivikela kulolu bhubhane
Ukuhlolwa kwazo zonke izisebenzi zezempilo neziguli ezisezibhedlela nalezo ezifikayo ukubalekela ukuthi izibhedlela zibe amaziko aleli gciwane
Ukuphoqa zonke izinkampani ukuthi zihlinzekele abasebenzi bazo ngezivatho zokuvikela kuCOVID-19 ngaphambi kokuthi ziqale emsebenzini
Ukuhlola zonke izisebenzi zasemajele kanjalo nalabo abagcinwe emajele ukuze amajele angagcini eyisizinda seCOVID-19
Ukuhlinzekela abezothutho ngezivatho zokuzivikela kanjalo nokokuvikela umphakathi ekuthelelekeni beya noma bebuya emsebenzini
Uhlelo oluqondile lokuvulwa kwezikole namanyuvesi kodwa olungeke lubeke impilo yezingane zesizwe engcupheni; sikholelwa ukuthi izingane okumele zibekwe eqhulwini yilezo ezifunda umatikuletsheni, ibanga leshuminanye kanye nabebanga leshumi
Sifisa ukuthi konke ukususwa kwabantu ngendluzula ezindaweni abahlala kuzo (evictions) kumiswe kuze kudlule leli fu leCOVID-19, akekho umuntu ongamele angabi nendawo yokufihla ikhanda ngalesi sikhathi esinzima kanje ezweni
Siyalwamukela usizo lokusiza abahlwempu, sifisa engathi lungakhushulwa ikakhulukazi lelo lwabangasebenzi luye e-R1 500 luqhubeke nangemva kweCOVID-19
Sinxusa uHulumeni angaboleki imali ku-International Monetary Fund (IMF) nakuWorld Bank ngoba sobe sesizibophe kuyo ngamaketanga ezikweletu thina nezizukulwane eziningi ezizayo
Sinxusa uHulumeni angavumeli amazwe asentshonalanga kanjalo neBill Gates Foundation ukuthi isebenzise amaAfrika njengamagundane okuhlola imithi yokuvikela iCOVID-19
Sinxusa ukuthi bonke abantu bakithi abangabadayisi emakhoneni emigwaqo nasemarenke nakwezinye izindawo bakwazi ukuqhubeka badayise benze imali njengoba kwenza izitolo ezinkulu
Sinxusa bonke abantu baKwaZulu-Natal ukuthi bahloniphe imigwaqo eshaywe inhlangano yezempilo yomhlaba (WHO), imitheshwana kaHulumeni nezwi likaMengameli lokulwa neCOVID-19. Asigezeni izandla, sisebenzise imithi yokuhlamba izandla, uma sikhwehlela noma sithimula sikwenze endololwaneni egotshiwe.
Asisukumeni silwe nalolu bhubhane sizonqoba uma simunye! Izwe lethu!
UNdebele unguSihlalo wePan Africanist Congress (PAC) KwaZulu-Natal