Isikhathi semvalelwakhaya asibe ngesomndeni nokufundisana
Isimemezelo sikaMengameli wezwe “sokuvala” izwe izinsuku eziyishumi nanye kulethe ukwesaba kwabaningi. Abazali abaningi bakhala ngokuthi abazi ukuthi bazozigcina kanjani izingane zimatasa, nabo uqobo lwabo bangagcini bezulelwa yikhanda. Nakuba lesi kuyisikhathi esinzima, bukhona ubuhle obungaphuma kuso. Okokuqala nje, lesi kungaba yisikhathi esisichitha nemindeni yethu, nokuyinto esingasayenzi kakhulu manje ngenxa yokuba matasa obusizungezile. Ukuba sekhaya izinsuku ezingaka kungasiholela ekutheni thina kanye nalabo abasizungezile sizifundise namakhono amasha.
Nakuba kungebe yimpoqo, kodwa ukupheka nokubhaka kungamakhono anconywayo ukuthi siwafundise izingane zethu. Lokhu kuzenza zibe nokuzethemba kanye nokuzimela empilweni. Isiphi isikhathi esingcono ukwenza lokhu ngaphandle kwamanje? Izingane zikwazi ukwenza izinqumo ngekusasa lazo emva kokuzama izinto eziningana empilweni. Kungenzeka nje ukuthi ingane yakho iyogqcina ingumpheki noma ngumbhaki okhethekile ngelinye ilanga, nokuyoba yindlela yokuphila kuyo. Ukupheka nokubhaka kungaba yizinto abaqala ukuzifunda ekhaya, bagcine sebezipholisha nje ebudaleni babo.
Izingane zingakuthokozela ukuba yingxenye yekhishi kulezinsuku, njengoba zizobe zihlezi emakhaya nje. Njengomzali, ungenza uhlelo lapho uzozimbandakanya ekuphekeni kanye nasekubhakeni kwakho. Kubalulekile nokho ukuthi uhlele izinto enizobe nizenza ngokweminyaka yenu. Lokhu kuzokwenza ukuthi izingane zingabi nengcindezi kodwa zikuthokozele ukuba sekhishini, zifunda. Inhloso ukuthi zikuthokozele ukuba sekhishini, kungabi ngathi zisesikoleni. Ngizokusiza ukukunikeza amaqhinga okufundisa izingane ngokwehlukana kweminyaka yazo.
Abangaphansi kweminyaka emithathu
Qinisekisa ukuthi konke okungabalimaza abafinyeleli kukhona – imikhiqizo yokuhlanza endlini, uketshezi, izinto ezishisayo njalonjalo. Uma kukhona ozokusebenzisa ngesikhathi nifundisana, qinisekisa ukuthi abakwazi ukufinyelela kukhona, kodwa banikezelwa nguwena. Nazi ezinye zezinto abangazithokozela:
Bangasondeza zonke izithako ozozidinga ekuphekeni nasekubhakeni Bangawasha izitshalo uma nipheka Bangagoqoza bahlanganise izithako. Qinisekisa ukuthi akukho okushisayo. Bangahlobisa amakhekhe Baqulele izithako ezitsheni ukuze zikalwe esikalini.
Abaneminyaka ephakathi kwemi-3 nemi-5
Ukusika izithako ezidinga ukusikwa njengebhotela njalonjalo. Qinisekisa ukuthi basebenzisa imimese kaplastiki ukwenza lokhu.
Ukuxuba izithako endishini ngesipuni noma ngesandla.
Ukuxova inhlama. Ukurola inhlama, bayihlukanise ngokusebenzisa izitsha zikaplastiki.
Abeneminyaka ephakathi kwemi-5 neyisi-7
Ukuqoba izithako ngokusebenzisa ummese omncane. Sekuyisikhathi sokuqala ukufunda ukusebenzisa izitsha ezahlukene zasekhishini.
Ukusika ngokusebenzisa isikelo. Ungathola isikelo esincane esilingene ukusetshenziswa yizingane.
Ukugretha. Bangaqala bafunde ukugretha izaqathi nokunye. Qinisekisa ukuthi izandla zingasondeli kakhulu kuyona igretha.
Ukukala izithako. Ngokwenza lokhu, bazofunda ukusebenza ngezinombolo, nokuyitho abayifunda nasesikoleni.
Abaneminyaka ephakathi kweyisi-8 neyisi-11
Izingane esezikule minyaka, sezikulungele ukusebenza zigxile ekhishini, ngakho sebengaqala ukubandakanywa kakhulu.
Bangaqala bafunde indlelakwenza baqoqe izithako, njengokwendlelakwenza.
Bangacwecwa izithako ngokusebenzisa ummese omncane. Baqaphe uma benza lokhu.
Sebengasebenzisa iwhisk ukuhlanganisa amaqanda kanye nezinye izithako.
Bangaqala basebenzise izinto ezifana namaketela ukubilisa amanzi, imicrowave ukufudumeza, ukushisisa uhhavini, nokunye.
Bangavula amakani okudla. Sebengenza amasaladi ngokwabo, beqashiwe nokho.
Le ndlelakwenza esizocobelelana ngayo namhlanje enye ezizoyithokozela kakhulu ukuyenza izingane.