Ubona unobhutshuzwayo ungaba yisisekelo sebhizinisi
Abadlali bakanobhutshuzwayo banephupho elifanayo lokudlala emaqenjini aphesheya kwezilwandle kodwa umdlali waseNtuzuma ogijima eqenjini lesigaba esingakhokhelwa ufisa ukuthola iqembu elizomholela kahle ukuze avule ibhizinisi lakhe.
Nakuba uMenzi Chili naye kuyisifiso sakhe ukudlala phesheya kwezilwandle, kodwa uthi okusemqoka manje ukuthola ikilabhu enkulu ezomkhokhela kahle okungabe idlala ku-Absa Premiership okuyiligi enkulu eNingizimu Afrika noma kuGladAfrica Championship.
Lo mdlali oneminyaka yobudala engama-27 odabuka eNtuzuma, eThekwini, ukusho lokhu ngesikhathi enengxoxo ekhethekile neBAYEDE.
“Iminyaka yami isangivumela ukuthi ngidlale kuligi enkulu kuleli i-Absa Premiership. Ungabuza noma imuphi umdlali kungabe odlala ku-ABC Motsepe okanye kuGladAfrica Championship uzokutshela ukuthi ufisa ukugijima kuSishayelwe
Absa Premiership. Ithemba ngisenalo lokuthi kusengenzeka.
Kuyongijabulisa ukuthi ngidlale esigabeni lapho engizothola khona imali enkulu ukuze ngikwazi ukuvula ibhizinisi lami okuyisifiso sami esikhulu,” kusho uChili.
Le nsizwa enomoya ozothile itshele leli phephandaba ukuthi iqale unobhutshuzwayo ineminyaka yobudala eyisi-8. Ngakwezemfundo iqale amabanga aphansi eGobhogobho Primary, yadlulela eDr Macken Primary yabe isisonga e-Avoca Secondary School. Zonke lezi zikole ziseThekwini.
Izindaba zikanobhutshuzwayo ezithinta uChili oteketiswa ngelikaDeco, ziphethwe uRoger Mathaba.
Amaqembu aseke agijima kuwona ekukhuleni kwakhe iHome Boys, iGem Stars, iRipple Effect, iSisonke FC, iMaritzburg United, iRoyal Eagles ngesikhathi iqala ukubonakala ebholeli lakuleli idlala kuNational First Division (NFD) esiyaziwa ngeGladAfrica Championship, uMthatha Bucks, iMilford FC neRainham Sporting okungamaqembu agijima ku-ABC Motsepe League ngaphansi kwesifundazwe iKwaZuluNatal, iCoastal Union kanti manje udlalela iGreenWood Park (GWP) Friends nayo egijima ku-ABC Motsepe League.
Lo mdlali useke walithola ithuba lokudlalela iqembu okungelona elalapha eNingizimu Afrika njengoba eke wagijimela elaseTanzania. Leli phephandaba limbuza ngobunzima abhekana nabo ngesikhathi eseTanzania nangempilo yakhona uthe: “Ukuba buqamama nasekhaya kuyinto enzima kunoma yimuphi umuntu, ngisho kuthiwa ukhona lapha eNingizimu Afrika kwesinye isifundazwe.
ETanzania ngifika ngashaywa ulimi lwakhona nesimo sezulu, kodwa ngoba ngingumuntu osheshayo ukubamba izinto ngakwazi ukuthi ngigcine ngifana nomuntu wakhona. Isikhathi engisihlale khona ngingasho ngithi ngisithokozele futhi kwaba khona engakufunda.”
Kubadlali bakanobhutshuzwayo bakuleli, uDeco uzifela ngoTeko Modise, uThemba “Mshishi” Zwane. Phesheya kwezilwandle uthanda uLionel Messi wase-Argentina nathi akekho umdlali oyofana naye.
Umthombo weBAYEDE ongashayi eceleni uhoshe ukuthi lo mdlali kungenzeka ngesizini yangowezi-2020/21 adlale e-Egypt.
“UDeco mancane amathuba okuthi agijime lapha eMzansi ngesizini ezayo, kukhona iqembu elimfunayo e-Egypt,” kusho umthombo.
Yize iBAYEDE iwethemba umthombo wayo kodwa ithe ayizibuzele kuyena uDeco ogila izimanga esiswini.
“Lowo okutshelile ukutshele iqiniso kodwa ngicela ukungakuniki imininingwane ephelele. Soxoxa kahle uma sekukhona into ebambekayo, okwamanje ngisewumdlali weFriends,” kusho uDeco. KuFriends uDeco ugijima noThabani Mthembu oseke wadlalela iSupersport United neqembu lesizwe, uXolani Nguse obevimbela iCape Umoya odlala kuGladAfrica Championship noMfundo Mdluli oke wadlalela uThongathi FC.
IBAYEDE iphinde yakhuluma noSipho Ndlovu oke wadlala noDeco imbuza ngalo mdlali. “Unekhono eliyisimanga uma engathola ithuba kunoma iliphi iqembu ku-Absa Premiership angafike adlale kahle. Umzimba wakhe uyamvumela, uma lisezinyaweni ibhola ugcina ngokulibuka ngeke ulithole. Uhlezi eyinto eyodwa futhi uyabahlonipha kakhulu abantu,” kusho uNdlovu.