Ichilo ngomgolo wezijumbana
Ngalesi sikhathi izwe libhekene nobhubhane lwekhuvethe (Covid-19), kukhona asebethole ithuba lokuzihlomulisa nokuqinisa imikhankaso yamaqembu abo ezepolitiki ngezijumbana zokudla okunikwa imiphakathi.
Selokhu luqalile uhlelo lokuhlinzekwa kwabantu ngokudla, zilokhu zanda izikhalo ngomgolo wezijumbana esikhathini esiningi okukhonjwa osopolitiki ngenjumbana. Leli hlazo alenzeki endaweni eyodwa kuphela kepha ezweni lonke. Lokhu kudla kufanele engabe kondla abaswele ngalesi sikhathi sobunzima kodwa kuyadumaza ukuthi kwezinye izindawo akufinyeleli kubona kunalokho kuphelela emakhanseleni athile nabangani bawo.
Amaqembu epolitiki asesebenzisa lokhu ukufeza izinhloso zawo njengoba kuleli sonto kuvele izinsolo zokuthi kukhona elivinjelwe ukusabalalisa ukudla eGcilima, ogwini oluseningizimu yeKwaZulu-Natal. UMengameli uRamaphosa usekuvezile ukukhathazeka kwakhe ngalo mkhuba wexwayisa ngokuthi abayobanjwa beba izijumbana zokudla bayojeziswa kanzima.
“Izifundazwe eziningi sezithole imibiko ngabantu abanonya, abanye babo okusolwa ukuthi bayizikhulu zikaHulumeni, abafihla noma badayise izijumbana zokudla ezibekelwe abantu abaswele noma bakunike abangani nemindeni yabo,” kusho uRamaphosa.
Ufunge wagomela ukuthi uyobathathela izinyathelo ezinqala abenzi balokhu uma kutholakala ubuqiniso kulezi zinsolo. Nakuba kunjalo, ogombelakwesabo abasishayimkhuba lesi sexwayiso kunalokho izakhamuzi eziswele zikhala nsukuzaphuma ngendlala nokushaywa indiva.
Okhulumela iqembu elibusayo kuzwelonke, uMnu uPule Mabe, unxuse izinhlaka ze-African National Congress (ANC) ukuba ziziphenye lezi zinsolo bese ziwathathela izinyathelo ezinqala lawo malungu ayo ayotholwa enecala. Uthe lokhu akungagcini ngomkhonyovu wezijumbana zokudla kodwa kubhekwe bonke labo abephula umthetho kathaqa.
“Amakhansela e-ANC kumele abonakale elula isandla emiphakathini angazami ukuzihlomulisa ngenkohlakalo,” kusho uMabe. Sekunesiphakamiso esivela ezakhamuzini ukuba uhlelo lokusatshalaliswa kwezijumbana lusingathwe yizinhlangano ezingenzi inzunzo lususwe kosopolitiki.