Izizinda zokuqeqesha abalimi zimikhakhaminingi
Ngokuya inani labantu likhula umthwalo wokufukula ezomnotho uya ngokuya ukhula nakwezolimo. Ukuthuthukiswa kwamakhono kwezolimo kufanele kuthathwe njengotshalomali olubalulekile ekuthuthukisweni kwezwe ngakwezomnotho.
Njengoba uHulumeni wesifundazwe iKwaZulu Natal usuqale umkhankaso, Inkunzi Isematholeni, kubalulekile ukuthi intsha ibe namakhono azoyilekelela ukuthi ibambe iqhaza elikhulu kwezolimo.
Izinto ezinqala ekutheni umlimi akwazi ukuphumelela ubuchwepheshe, ukuhlela, ezokuxhumana nokukwazi ukuguqula nesimo. Ubuchwepheshe besimanjemanje bunomthelela omkhulu kwezolimo, okwenza kubaluleke ukuthi abakulemboni bafunde ngabo. Umlimi noma lowo osebenza kule mboni kufanele aqonde kabanzi ngezigaba ezihanjwa wumkhiqizo ukusuka ensimini kuya etafuleni. Ngaleyo ndlela uyohlale njalo ehambisana nezidingo zemboni. Umlimi ngeke aphumelele uma engakwazi ukuxhumana nabo bonke abakhona kulo msebenzi obalulekeke kangaka, isibonelo: abezempilo, abathutha impahla, njalonjalo
UMnyango Wezolimo Nokuthuthukiswa Kwezindawo Zasemakhaya unezizinda ezimbili zokuqeqesha kwezolimo, okuyi-Owen Sithole College of Agriculture kanye neCedara College of Agriculture.
ICedara College of Agriculture yakhiwe emhlabeni owathengwa uHulumeni waseNatal ngowe-1902. ICedara College iyinhlokohhovisi yamakholeji womabili.
Izifundo zokuqala kwaba ezamahlathi, ezezitshalo, ezobisi, ezempilo yezilwane, ezamakhemikhali, izibalo, ukuphatha amabhuku, ukusikwa kwamapulazi, ezezilwane nezezinhlanzi. Lezi zifundo zisekhona yize ezinye seziyingxenye yezinye.
Kusukela ngowe-1998 abafundi sebekwazi ukukhetha umkhakha abafuna ukugxila kuwona phakathi kowezezilwane nowezezitshalo.
Akudingeki ukuthi onentshisekelo yezolimo aze abhalisele idiploma yeminyaka emithathu. Uyakwazi ukwenza izifundo zesikhashana eziqondene nalokho anentshisekelo kukho noma azibandakanye kukho. Isibonelo ukuthi ungabhalisela lezi zifundo ezilandelayo: Ezokufuya izimbuzi Ezokufuya izinkukhu zenyama Ezokufuya izingulube Ezokufuya izinkukhu zamaqanda Ezezinkomo zenyama. Ezokulima imifino Kukhona nezifundo ezifundiswa ngokucela kwalabo abazidingayo. Lapha singabala izibonelo ezifana nalezi:
1. Ukuthatha izithombe
2. Ukudla kwamahhashi
3. Ukuphatha izinyamazane
4. Izinkukhu zesintu I-Owen Sithole College of Agriculture (OSCA), eyayaziwa ngeCwaka Agricultural College yakhiwa ngowe-1968. Ngowe 1985, iCwaka yaguqulwa igama yethiwa ngeNkosi eseyakhothama, uSigidisabathembu Owen Lancelot Sithole, owaba yiKhansela lokuqala noNggqongqoshe wokuqala Wezolimo kuHulumeni waKwaZulu.
Ngenxa yesimokade sezulu sendawo ekwakhiwe kuyo i-OSCA, epulazini lakhona kutshalwe kakhulu izitshalo ezifana namalentshisi, ubhanana, umango, ukwatapeya, umoba nokotini. Kuleli kolishi kukhona nezingulube, izinkomo, ikakhulukazi ezamaNguni, kanye nezinkukhu.
NeCedara College of Agriculture inemfuyo enjengezimbuzi, izimvu, nezinkomo. Kutshalwa izitshalo ezifana nommbila nemifino.
Konke lokhu okutholakala kula makolishi womabili kusetshenziselwa ukuqeqesha abafundi.