UGeorge Mnyaluza Pemba umdwebi ngempilo yakwaNtu
UNgqondobukhali, osikhumbuza ngezolo, aleluke ngenamuhla aphinde asilunguzise kokuzayo konke ngeso lwesikonkolo yethu, sethula ingosi yakhe
Iqiniso labadala labe lithi leso naleso sizukulwane sinezigameko zaso. Kulezi zigameko kukhona izifundo. Inhloso yezifundo lezi akukhona ukusabisa kepha wukufundisa isizukulwane leso kanye nalezo ezizayo. Indaba lapha iba sekutheni ngabe abantu labo noma isizukulwane leso sinazo yini izindlebe zokulalela. Sinabo yini abaholi ababonayo nesizwe esiqaphelayo.
Kulezi zinyanga ezimbili isizukulwane sethu sivelelwe ngokukhulu nokungakaze kucatshangwe. Lokhu kuholele ekutheni kwenzeke izinto eziphazamise umgqigqo wempilo. Kubantu ababuka eduze lokhu yisinengiso esizodlula. Kepha kulabo ababuka ngelibanzi lesi kube yisikhathi sokujula, sokuba nemibuzo ngenhloso yokuthola izimpendulo. Imibuzo lena ingaqhamuka ngokuba umuntu aqaphele okwenzekile.
Lapha kithi kuqale ngokuthi emahoreni nje ambalwa kuqale umthetho wokumiswa konke ezweni kwazimbuka umuthi omkhulu obungumthunzi kithi nobuhlotshiswe ngezithelo zolwazi olujulile lwasendulo nelalabo abafabengafi. Kudlule emhlabeni ubaba uCredo Vusamazulu Mutwa.
Kubantu abanganaki lokhu bekungasho lutho kepha kulabo abanakayo kube nesililo sokuthi kanti impela sesisala nqunu ngezikhathi ezinzima kangaka. Nakhu sekuhamba nonompendulo bethu, amanxusa asixhumanisa nendulo. Njengoba inxeba lisashisa nje kusazoba lukhuni emzimbeni (aboHlanga) ukuzwa ubuhlungu bokushiywa ngonjengoMutwa.
Okunye okuqaphelekile ngalesi sikhathi wukuthi abantu baphoqeleke ukuba bahlale ezindlini. Esimnweni esejwayelekile lesi yisikhathi obekumele sibe mqoka ngoba ngezizathu ezehlukene abantu abasahlali emakhaya. Abasaxoxi ngezidla umuzi. Abasabonisani ngokumele kwenziwe lapha ekhaya. Okubafikele lokhu bexabene, ukuba ndawonye bekubaphoqa ukuthi babe ndawonye baze bakhumelane umlotha. Ikhaya umsamo wethu, yilapho abadala balayikhaya abaphilayo nalabo abangasekho behlala khona. Uma abalapha ekhaya bekhona bonke, kuchwaza komunye yinkonzo ejulile leyo. Akudingi uze uwise isilwane ukuze kube nenhlokomo ekhaya, ukuba khona kwamalungu omndeni kukodwa kunobungcwele obumangalisayo. Ngalesi sikhathi kumnandi emzini yabamnumzane ngoba amakhosana, amadodana namadodakazi nabazukulu bakhona emagcekeni.
Okunye okwenzekalile ngalesi sikhathi wumuzwa wokwesaba. Ngabe ukwesaba nokwethula kuyinto embi yini? Ngokujulile cha akusiyo ngoba umuntu ongesabi lutho nongesabi muntu unobungozi. Ukwenza kwethu bese kuveza ukuthi asesabi lutho. Asesabi abazali bethu benyama. Asesabi abantu esiphila nabo. Asesabi ngisho labo esingababoniyo. Empeleni bese singesabi ngisho ukuba sodwa ngaphandle kosiko nosikonkolo lwethu.
Bese siqhelelene noMvelinqangi singababoni nalabo abayizidalwa abathunywe nguye kithi sibetha amagama. Manje siyesaba. Phela ukube asesabi ngabe abantu abaphuthumi izimfonyo ukuze baphephe. Khona lapho babodwa nabasaba ukuthi uyothi ungakafiki umkhuhlane bebe sebebhuqwe yindlala. Bukhona ubufakazi bokuthi kumuntu, umuzwa wokwesaba wenza umuntu aqhelelane nechilo.
Okunye okuvelile ngalesi sikhathi yiqiniso lokuthi sonke isintu siyadingana. UMvelingqangi akadalanga umuntu oyikho konke. Kunalokho wenza ukuthi zonke izilwane kubalwa nalesi esingumuntu zibe nesidingo sokuba zixhumane nezinye. Zingaka nje ehlathini izilwane esinye siphila ngesinye. Kanjalo nakubantu umuntu upheleliswa ngomunye. AbeNguni bona basho kangcono ukuthi ‘umuntu ngumuntu ngabantu’. Namuhla yonke imikhakha, ohulumeni namazwe bayasebenzisana.
Okokugcina okube yisifundo wukwazi ukuthi uMvelingqangi uyikho konke nokuthi angenza noma yini ngesikhathi sakhe. Namuhla sonke isintu sibukela kuye, sinxusa kuye ukuba asivikele kulokhu okukhulu, okungaqondakali nokwesabekayo. Uma ubuka ngelijulile impendulo ithi konke okwenzakalayo bekuyizithunywa nje zokusisondeza esiqwini esinguMvelinqangi - Thokoza!