Imikhiqizo mbumbulu
Kubukeka impi yokhuvethe isiveze esinye isitha njengoba sekuvele ukuthi usunezimpande ezinabile umkhuba wokudayiswa kwemikhiqizo mbumbulu. UMnyango nsuku zaphuma ubopha, ushaqe uphinde uvale amabhilidi abenzi bobubi obuyingozi emphakathini.
Kule ngosi yezomnotho sikesabuka imboni yezithako zamafutha athize, sabheka futhi nobumqoka bale mboni eNingizimu Afrika ikakhulu kulesi sikhathi sokwesweleka kwemisebenzi. Ngesikhathi sibheka lokhu nje, izwe nomhlaba bekungakakhungathwa ukhuvethe (COVID-19) olukhona kuyimanje. Lesi sigameko salolu khuvethe sesenze kwabhimba kakhulu kwezomnotho. Lolu khuvethe selufana nokuhuqa usawoti esilondeni esivele sibhibha.
Kulesi sikhathi iNingizimu Afrika idinga umsindisi kwezomnotho ngaphezu kwakuqala. Nxa siphonsa amehlo emuva, ngowezi-2008 ngesikhathi sokuwa kwezimakethe zomhlaba, leli nalo lathinteka kakhulu njengoba lalahlekelwa imisebenzi eyisigidi. Ngokwemibiko yoMnyango Wezezimali eNingizimu Afrika, uqagule ukuthi ngenxa yalesi simo, leli zwe lingahle lilahlekelwe yimisebenzi cishe eyizigidi ezinhlanu. Lokhu kusho isibhicongo esikhulu ezweni esedlula ngisho ukhuvethe lolu. Ngendlela lesi simo esimazonzo ngayo, kumele ngabe kuyimanje kuyasetshenzwa ubusuku nemini kuzanywa ukuveza ikhambi lokutakula leli kulesi simo. Yisikhathi lesi sokwamukela imibono emihle nezosiza elakuleli ukuthi litakuleke kulolu bishi.
Namuhla sizothi janti kafushane mayelana nesihlahla sezimanga, esibizwa ngokuthi uhalibhoma. Lesi sihlahla esisanhlaba sizimilela ezindaweni eziningi eNingizimu Afrika, ngisho ususigawulile salala phansi, simane sizihlumele kungabi ndabazalutho. Siyakwazi futhi nokuthi sitshalwe njengazo zonke izihlahla. Yize sithatha isikhathi eside ukukhula ngokwemvelo, nokho siyakwazi ukutholakala ngembewu esenza sikwazi ukusheshe sikhule izinyanga ezimbalwa nje.
Kulabo abakhula belusa bazokhumbula ukuthi lesi sihlahla sikwazi ukwakha ngisho isitshwebhu ngamaxolo aso. Empeleni abantu abaningi abazi ukuthi lesi sihlahla esezimanga kwazise sikwazi ukwenza imikhiqizo eminingi ehlukahlukene. Ngaso kungondliwa imindeni eminingi kakhulu, kwakhiwe izimboni ezingasukumi phansi. Kepha konke lokhu kwenzeka ngobuchule nobungoti obujulile bokukwazi ukusihluza ngendlela efanele.
Lesi sihlahla esiba sambhoshongwana esincike enhlabeni, sinamaxolo angama-70 ahlukene izigaba eziyisikhombisa, lokhu kusho ukuthi sivunwa kasikhombisa ngonyaka. Nansi eminye yemikhiqizo engakwazi ukuvela emaxolweni alesi sihlahla.
Iphepha elivela ekwalukweni kwamaxolo aso, uketshezi oluhlukene kabili, okuyisiphuzo sotshwala (tequila) nojusi, siphinde sakhe amakha amaningi okugcoba afana noketshezi oluthakwa bese luyasiza ekugcobeni umzimba.
Lesi sithako sisiza ukwenza isikhumba sibe sihle, selaphe ngisho izifo okungase kuba zikhona emzimbeni.
Isihlahla semvelo lesi esikwazi ukususa ngisho umbandama namanye amashashazi emuntwini. Sikwazi ukwakha ngisho insipho eqeda ukuluma komzimba, izikhwama, izingubo zokugqoka. Sisodwa nje lesi sihlahla siphethe umnotho ongasukumi phansi.
Nxa sesigxotshiwe, yahluzwa yonke le mikhiqizo, kugcina sekutholakala ngisho nomquba ongasiza ukunothisa umhlaba ukuze kutshalwe.
Lilonke leli, bambalwa abantu abangasho ukuthi banobuchule bokukwazi ukuthaka isihlahla esinjena eNingizimu Afrika ngaphandle kwale nsizwa eyaqeqeshwa eCanada, uMnu u-Angel Jele.
Le nsizwa engeyokudabuka kwaHlabisa, isizakhele udumo ngenxa yobunyoninco noqeqesho olunzulu lokukwazi ukuthaka lo muthi.
Simbuza ngaleli khambi elibaluleke kangaka okaSomkhanda, ukubeke kwacaca ukuthi ngalesi sihlahla angaguqula isimo sezomnotho wasemakhaya maqede kwakheke imisebenzi engakaze ibonwe.
Yisikhathi lesi sokuthi sisebenzise amakhambi, nezihlahla zethu ukuzakhela umnotho, singathi njalo sincike kwezinye izizwe ukusifukula.