Imibhikisho yaseHong Kong
Izakhamuzi zaseHong Kong zithi umthetho wokuvikela uqonde ukucindezela bona. Amaphoyisa asebophe abalinganiselwa emakhulwini.
Kuthiwa kakhokhe nezindleko zecala yize azikhalela wathi uhlwempu
Kulabo abamzondayo liphume nobovu. Lokhu kulandela isinqumo seNkantolo yasePitoli nevune labo ababethi kathathwe njengomqondisi kanye nomuntu ongathembekile nongafanele ukuba nesikhundla ezinkampanini.
Loyo nguNks uDuduzile Cynthia Myeni obenguSihlalo weSouth African Airways SOC Limited.
Kuleli cala okaMyeni ubehudulelwe enkantolo yinhlangano i-Organsiation Undoing Tax Abuse kanye ne-African Airways Piloto’s Association ( SAAPA).
Njengobufakazi lezi zinhlangano zombili zenza isethulo enkantolo nesabe sibeka izinsolo zokuthi uNks uMyeni waguqula izivumelwano zokusebenza ngemizuzu yokugcina nokwenza iSAA ilahlekelwe yizigidigidi.
Uma lesi sicelo samukelwe yinkantolo okuyosho ukuthi umumangalelwa ngeke abe ngumqondisi wano yiyiphi inkampani iminyaka eyisi-7.
UNks uMnyeni waphikisana nalokhu. Nokho iNkantolo imlahle ngecala. Lesi sinqumo simfaka enkingeni okaMyeni njengoba sizomvala ekuthenini ahlale emabhodini ezinkampani kubalulwa nezakhe.
Okwamanje ubehlala ebhodini lakwa Centlec nehlizekela ngogesi komasipala.
UMehluleli uRonel Tolmay uthe yize emgwebile kepha unalo ilungelo lokucela ukuba lokhu kubuyekwe nokuyinto angayenza eminyakeni emithathu nokumele aveze ukuthi useguqukile.
Ekhipha isigwebo esingamakhasi ayi-144 uthe okaMyeni owathi akanamali wabe esho okungeyikho njengoba ayehlala kumabhodi amaningi ehola itshe lemali.
Kwa SAA nje kuthiwa wabe ehola izgidi ezi-R 4.3 njengomqondisi kanti eMhlathuze Water wabe ethola R 3.5 wezigidi.
Ngalokho uthe kakhokhe zonke izindleko zecala. UMehluleli uthe uveze ukuthi ungumuntu ongathembekile ekusebenzeni kwakhe kwaSAA kanti futhi wenze okufanayo nasenkantolo ukuba ngumkhohlisi.
Lolu daba lwasuka ngonyaka wezi2015 beli lokhu lihlehla ngenxa yezizathu ezahlukene ezibandakanya nesicelo sakhe okaMyeni ukuba lihlehliswe.
Kwenzeka konke nje lokhu iSAA isobishini, empeleni iyadiliza futhi iyavala nokuyinto inkantolo ethi okaMyeni ube yingxenye yokwenza lesi simo. Kuze kube uyagwetshwa okaMyeni ube mile ekutheni umsulwa nokuthi unyundelwa ngabantu abangamfuni nabanenxa ngokusondelana ( ngokomsebenzi) naloyo owayenguMengameli wezwe uZuma.
OkaMyeni unguSihlalo weJacob Zuma Foundation kanti ubengomunye wabaqondisi amagama nezenzo zabo ezide zilunjaniswa namachilo asabizwa ngokuthi wukugwamandwa kwamandla ombuso.
Yize siye koloba engakaphawuli okaMyeni ngesinqumo kepha akukho ukungabaza ekutheni lolu daba lungahle luhunyushwe ngezindlela ezahlukene kusuka kulabo abathi okwenzeke kuye kusho okukhulu okuzayo kuKhomishini kaZondo kanjalo nakuZuma.
Kanti abanye bangahle bamfake ohlwini lwabahlukunyezwa ngoba behambisana noZuma okuyinto evame ukuhlukanisa imibono ezweni.
OkaMyeni uzinze kwaZulu-Natal kanti uyaziwa kakhulu kumalungu kaKhongolose njengoba ubesengubuso bukaZuma ezinhlelweni zosizo ngaphansi kwe Jacob Zuma Foundation.