OMalume bayaviva
Izimoto ezithutha izingane zesikole sezifuthwe ngezibalali magciwane ukulungiselela ukuvulwa kwezikole. Inhlanzeko bayibeka phambili oMalume.
Nakuba uMengameli uRamaphosa ethe akekho umzali ophoqelekile ukuyisa ingane yakhe esikoleni uma engakhululekile kodwa isahlukene imizwa yezakhamuzi yehlukene ngokubuyela kwezingane esikoleni.
Ugogo uKhethekile Thwala (71) uthe: “Ngiyakhala ngesinqumo sikaHulumeni sokubuyisela izingane esikoleni. Kungani kuzwiwa ngezingane zethu kungazwiwa ngathi ukuthi kuzokwenzekani uma kuhlangana abantu njengoba namanje kunezindawo ezingenazo izindawo zokuzivikela, izingane nabazukulu bethu bazoba yini? Ngisho kwalezi zimfonyo esizifakile sizithole emgwaqeni asazi noma zinalo yini leli gciwane. Lapha kuzobulawa abazukulu bethu ngoba ezabaholi zifundela emakhaya nasezikoleni ezimba eqolo, zinazo zonke izinto.”
UMnu uMzo Sithole (61) uthe: “Ngijabule ngalokhu ngoba uma zingafundi zizofana nathi, thina saba nenhlanhla sangaba osikhotheni ezinye zingazithola sezingosikhotheni. Inkinga izingane uma zihleli ekhaya umqondo uyama ziphinde zithole nengcindezi kwezasendaweni ngokuthi zifuna ukwenza lokhu okwenziwa yizo. Ngizibona ziphephile uma zisesikoleningoba uma zisemakhaya zinguvanzi.”
UMnu u-Aron Cheza (49) uthe: “Ukuvulwa kwezikole ngibona kungakabi isikhathi esilungile, inkinga kukhona izingane eziluvanzi emigwaqeni emalokishini. Sesiyothatha lokho uHulumeni asithembisa kona ukuthi izingane zizophepha ngoba mina unkosikazi wami unguthisha uma bengabeka impilo yothisha engcupheni kusho ukuthi lapho kuyobe kubulawa wonke umuntu ngoba sizotheleleka sibe baningi.”
UNkk uNonhlanhla Ndlovu (58) uthe: “Ngikhathazekile ngokuvula kwezingane. Bengifisa ziqale kahle ngonyaka ozayo ukuze kubonakale ukuthi zonke lezi zinto ziyahlonishwa yini ngoba lezi zingane zisasidinga ukuthi sizicabangele, angiboni zizoyihlonipha imiyalelo kaHulumeni. Lesi bekuyisikhathi sokuthi impi yalesi sifo siyilwe ngokomoya sikhuleke noHulumeni abone ukuthi isimo siyahlonishwa.”
UMnu uSiboniso Shozi (39) uthe: “Umbuzo omqoka uthi izwe lona likulungele yini? UMengameli ushilo ukuthi kukhulu kuseza. Lesi senzo senzisa izingane zethu izimvu zomhlatshelo. Asazi nokuthi kuliqiniso kangakanani ukuthi lesi sifo asingeni kalula ezinganeni. Angiphikisani nokuthi izingane zibuyiselwe esikoleni kodwa angifisi sizisole uma sezigula.”