Umhlahlandlela ngesibhakela
Ingunguluzane enguLoyiso Mtya ibona inkinga yesifo ukhuvethe sizokwenza uguquko oluningi esibhakeleni sakuleli. Izinkinga zesibhakela ubona zingasombululwa nangokuguqula indlela okuqhathwa ngayo izimpi. Ubona iBaby Champs ingaba yisixazululo kulesi simo.
Sekusele izinsuku ezingaphansi kwama-65 kushaye umnqamlajuqu obekwe iFifa wokuthi amaligi awaqhubeke nemidlalo njengoba kusabhidlange ukhuvethe emhlabeni jikelele.
IPremier Soccer League (PSL) izithola impintshekile ukuthi iqhamuke nomhlandlandlela njengoba ebukeka emancane amathuba okuthi isizini izosongwa ngomhla zingama-31 kuNtulikazi.
Ngokubona kwesinye isikhulu esimnkantshubomvu ekuphathweni kwebhola, iPSL kuzomele iqhamuke nesisombululo esingeke sikhalise abanye.
Lesi sikhulu sithi: “Njengoba amaqembu akuPSL neGladAfrica Championship esedlale imidlalo engama-22, kuzomele kuphakanyiswe ukuthi imidlalo ayigcine kwengama-25 kunenjwayelo engama-30.
Lokho kusho ukuthi iqembu ngalinye lizodlala imidlalo emithathu ukuze kusongwe isizini. Ukhumbule ukuthi kusaneNedbank Cup okumele kuqedelwe imidlalo yayo.”
Siqhuba lesi sikhulu, sithe amaqembu azophoqeleka ukuthi enze izivumelwano zesikhashana nabadlali bawo abazophelelwa yizinkontileka ngoNhlangulana.
“Ayikho enye indlela iPSL engenza ngayo ngoba phela abadlali bayadingwa kakhulu ngamaqembu kulesi sikhathi esinzima sesizini. Uma ubheka e-England kudingidwa indaba yokuthi isizini yakhona iphele okungcono ngoNcwaba. Amakilabhu akhona anikwe umnqamulajuqu womhla zingama-23 kuNhlangulana ukwenza izivumelwano zesikhashana nabadlali.”
Okubhekwe kakhulu nokungenzeka ukuthi iPSL iphoqeleke ukuthi iqede isizini bese imemezela onqobe isicoco.
Noma imemezele ukuthi le sizini into efana nengekho, kuzomele kuqalwe phansi yonke imidlalo.
Kodwa amaqembu anjengeMamelodi Sundowns alandela ezithendeni iKaizer Chiefs phezulu kulogi engafaka enkantolo i-iPSL efuna ubulungiswa.
Ngokunjalo ne-Ajax Cape Town esethubeni
lokudla umhlanganiso kuGladAfrica Championship ingakhala ezimathonsi uma kungathiwa akuqalwe phansi kwazise ichithe imali eningi ilungiselela ukubuyela esigabeni esiphezulu.
Ayisaphathwa eyamaqembu avika izembe okuzothi uma isizini ivalwa ingakapheli imidlalo, engakhala ngokuthi bekumele idlalwe imidlalo azihlulekele wona.
Kunethimba elihlanganiswe amalungu ePSL neSafa ukuhlanganisa amakhanda ngenhloso yokuqhamuka nesisombululo.
Leli thimba linoMato Madlala oyiBamba leSikhulu Esiphezulu kuPSL, uDkt uThulani Ngwenya oyiSikhulu Esiphezulu Sezokwelapha (Chief Medical Officer) kuSafa, uPoobalan Govindasamy oyilungu leSafa National Executive Committee, uDkt uLervasen Pillay oyiNhloko Yezokwelapha kuPSL noJose Ferreira oyilungu lePSL Exco.
Khonamanjalo, uSihlalo weSafa, uMnu uDanny Jordaan, uthe inhlangano eyengamele unobhutshuzwayo e-England, i-English Football Association (FA) isiveze ukuthi ingafisa ukwelekelela ukuze ibuyele ensimini i-Absa Premiership.
Uthe uSihlalo weFA, uMnu Greg Clarke, encwadini ambhalele yona udalule ukuthi bangathanda ukugcina ubudlelwano babo nezinye izinhlangano zikanobhutshuzwayo ukuze kutholwe isisombululo ezinkingeni ezifanayo ababhekene nazo.
“Ubudlelwano iSafa nabo neFA busuka kude fut sekunezikhathi eziningi lapho sesekana khona. Mina noClarke sijwayele ukuhlangana ezingqungqutheleni zeFifa sibhunge ngezinto ezisithintayo,” kusho uJordaan.
Uqhube wathi: “ISafa ilamukela ngazo zombili ithuba lokufakana imilomo nenhlangano yebhola yaseEngland iisipiliyoni sayo esizosisiza kakhulu emizamweni yethu yokuthola isisombululo ezinselelweni zeNingizimu Afrika.”