Ugxilise iHockey kwaboHlanga
Akaze ayidlale iHockey kodwa ugila izimanga kulo mdlalo ongajwayelekile ezindaweni zakobantu
UNgubane wenze okungajwayelekile ngaphansi kwezimo ezinzima ikakhulukazi zobandlululo wathuthukisa umdlalo weHockey. Wenze umehluko omkhulu emiphakathini yase-Inanda, eNtuzuma naKwaMashu hhayi ngeHockey kuphela kodwa ngisho nangokunakekela abasweleyo.
Umsunguli ophinde abe usihlalo weINK Hockey, uNkosinathi Ngubane, uthi useqede iminyaka engama-26 ekulo mdlalo futhi ziningi izigameko asehlangabezane nazo. Ngokusho kwakhe esinye sazo ukubandlululwa kwaboHlanga.
“Abamhlophe abakakwamukeli ukuthi umdlalo ungadlalwa nangaboHlanga. Kwala noma sebenikwe imigomo inhlangano ephethe lo mdlalo kuleli, iSouth African Hockey Association (SAHA), ukuthi baguqule imithetho emidala kodwa kufane nokuthi bathela amanzi emhlane wedada,” kusho uNgubane.
IBAYEDE imbuze ukuthi ngabe wakucabanga kanjani ukuqala lo mdlalo ongajwayelekile ezindaweni zakobantu.
“IHockey ngayiqala ngowe-1993 ngisafundisa eZwakele Primary School Emawoti (Inanda), kulo nyaka ngizobe ngihlanagnisa iminyaka engama-27 ngaqala lo mdlalo ezindaweni zaboHlanga. Konke kwaqala egunjini
lokufundela ngenxa yokungabi nazo izinkundla zalo mdlalo, njengothisha ngakhiphela phandle izinsiza ngaqala ukufundisa abafana abayisi-9 emva kokuba ngithole uqeqesho esigabeni sika Level 0,” kusho uNgubane.
Emva kwalokho ngowe-1999, wathola ithuba lokuba usekela mphathi ePhikiswayo Primary School eLindelani waqhubeka nakhona wafundisa izingane ngalo mdlalo. Ngonyaka wezi-2004 waya kofundisa esikoleni esiseNtuzuma iBonisanani Primary School nasabambe khona kuyimanje, wayevele esaziwa ukuthi unekhono ekuqeqesheni intsha iHockey.
Okuwubufakazi balokho ukuthi izikole zabamhlophe zamabanga aphansi zasezisihlonipha.
“Wonke umuntu wangicela ukuba ngiqhubeke nokuqeqesha, ngabe sengibona ithuba lokusungula iqembu i-INK Hockey nezodlala ngaphansi kweFederation. Ngafaka isicelo kuKZN
Hockey Association basamukela saba ngabokuqala ngqa emlandweni walo mdlalo ukuba iqembu laboHlanga abadlala kuligi. Leli qembu lisungulwa nje linabadlali base-Inanda, eNtuzuma, KwaMashu (INK) yingakho sayibiza nge-INK Hockey Club. Inhloso enkulu ukuqhakambisa ikhono abantwana bethu abanalo, sibaqoqe bangabi luvanzi bagcine sebenza izinto ezizobafaka ezinkingeni, okunye okubalulekile ukuguqula impilo yabo bafane nezinye izingane eziphokophela impilo engcono” kulandisa uNgubane.
Ngenxa yokukhula kweqembu uNgubane ngokubambisana nabanye bazithola sebenabadlali abavela kwezinye izindawo okungasibona abangaphansi kwe-INK kuphela, kepha kukhona abavela eMlazi, eMandeni, eNewcastle, ePort Shepstone nakwezinye izindawo.
Amaqembu e-INK Hockey ahlukene izigaba ezine, kunelabadala labesilisa nabesifazane eligijima kuPremier League, elabancane labesilisa nabesifazane elidlala esigabeni sesine elingene ngowezi-2019 nelamantombazane kuphela nalo eligijima esigabeni sesine kwelikhulu.
Iqembu labaneminyaka eli-12 labesilisa ngonyaka wezi- 2014 laya komela elakuleli e-Austria, emqhudelwaneni obizwa nge-United World Games nalapho lahlulwa khona iGermany ngama-3/2 kowamanqamu. Iqembu labesilisa elabadala labhekana neNamibia ku-Indoor Hockey lahlulwa ngamathathu eqandeni, lowo kwabe kuwumdlalo wokuqala wamazwe. Iqembu elidala labesilisa ngonyaka odlule lidlale emqhudelwaneni iKC March Gold Tournament ePort Elizabeth laphuma endaweni yesithathu.
Linqobe iligi kulandelana ngowezi-2017 nangowezi-2018 ukuze lifinyelele kuPremier League nokuyiligi enkulu. Ngonyaka ophelile ezikaMbomvu zinqobe iligi ku-Indoor Hockey zakhushulelwa esigabeni esilandelayo okuyiPremier League.
Abaqeqeshi baleli qembu eligila izimanga
Kwabesilisa uHarold Siyaya weqembu elikhulu noZamokuhle Ngubo yena oqeqesha abancane. Kwabesifazane kuqeqesha uPraise Mgenge noNhlanhla Nyawo.
Abadlali asebake baphumelela
USihle Ngubane (19): Umele iKwaZulu-Natal Schools Hockey kusukela kwabaneminyaka eli-12 kuya kwabaneli-18. Wabuye wadlalela iNingizimu Afrika kuSchools kwabaneminyaka engaphansi kweli-16 kanye nabanengaphansi kweli-18. Ekuqaleni konyaka ubizwe ekhempini yeNingizimu Afrika kwabaneminyaka engaphansi kwengama-21.
Ngekhono lakhe eliyisimanga waze wathola ingqayizivele yethuba lokufunda esikoleni somtakabani iGlenwood Boys High School engakhokhi ngisho uzukwa. Nonyaka uphinde wathathwa iPretoria University (TUKS) nakhona ufunda ngomfundaze ngenxa yawo lo mdlalo.
UNduduzo Mchunu:
Naye wamela iKwaZuluNatal Schools Hockey kusukela kwabaneminyaka eli-12 kuya kwabaneli-18. NgoNhlolanja wathola ithuba lokuthi ayodlala phesheya kwezilwandle, kuyimanje uzinze khona. Lo mdlali wafunda eBonisanani Primary School, wathola umfundaze eNorthwood Boys High School eDurban North.
Izifiso zikaNgubane
“Ngiyafisa ukulibona lidlondlobala kakhulu kunakuqala leli qembu. Ngifuna libalwe namaqembu amakhulu lapha eNingizimu Afrika silibone liyodlala nasemazweni aphesheya. Sifisa ukuba nenkundla yethu lapho sizokwazi ukuqeqesha khona abadlali bethu ku-Astro Turf (okuyinkundla yeqophelo eliphezulu). Okukhulu kakhulu ukuthi sithole uxhaso, siyacela uMnyango Wezemidlalo ukuthi usakhele izinkundla zalo mdlalo emalokishini nokulekelelwa ngezinto zokuthutha abadlali,” kusho uNgubane.
Isibalo sabadlali
Banabadlali abangama-60 kwabadlala emaqenjini amakhulu, bese beba ngaphezu kwama-200 abancane.
Ukhuvethe ngabe lubaphazamise kanjani?
UNgubane uthe “ICorona isiphazamisile kakhulu, uhlelo ebesinalo ukuthi sikhuphulela iqembu labesifazane esigabeni esilandelayo. Zonke izinhlelo zethu ebesinazo zibhuntshile kepha siyethemba ukuthi ngonyaka ozayo sisazokwazi ukuqhubeka nazo.
AmaMini-Hockey Festival besiwahlelele amaqembu amancane esiyaye sixhaswe kuwo uMasipala waseThekwini awasezukuba khona ngenxa yalolu bhubhane lweCovid-19. Sikwazile nokho ukulekelela abadlali abangama-50 ukuthola ukudla. Lolu hlelo belungoLwesine olwedlule eBonisanani Primary School.”
Umlando omncane ngoNgubane
Ukhulele esigcemeni sakwa-D KwaMashu, wafunda eGugulethu nasePhumelela Primary School waqeda amabanga akhe eNhlakanipho High School, wenza izifundo zakhe zokufundisa eNtuzuma College of Education waqhuba izifundo zakhe emazingeni aphakeme e-University of KwaZulu-Natal. Akaze ayidlale iHockey empilweni yakhe kepha ngothando analo ngezemidlalo wasebenzisa khona ukufunda nokwazi ukuqeqesha abantwana ngomdlalo angakaze awudlale.
Uyilungu le-KZN Hockey Association, uphethe umkhakha wenkulisa KwaZulu-Natal. Uyi meneja yeKZN Provincial Team kuma-Inter Provincial Tournament.
Uphinde abe imeneja yeDragons ekuPremier Hockey League (PHL) edlalelwa eGoli yonke iminyaka nexhaswe iNational Sport and Recreation neSuperSport. Uphinde abe ilungu leNational Hockey Transformation Committee neleZero2Five Trust okuyinhlangano esiza abantulayo ngokubapha ukudla okondla umzimba.