KWEZINYE IZINGXENYE
EzaseBrazil:
Izwe iBrazil libukeka lingena kwelinye isonto lobumnyama njengoba izibalo zabantu abanegciwane leCorona likhula ngezinkulungwane. NgoMsombuluko uMnyango Wezempilo ubike ukuthi sekuqinisekiswe abantu abazi-11 687 emahoreni angama-24 okwakuchaza ukuthi isibalo sabantu abanaleli gciwane base bebalelwa ezi-374 800 kuthi abangaphezu kwezi-23 400 base bebulewe yilo leli gciwane.
Ngempelasonto edlule kwavela ngezibalo zeJohn Hopkins Univeristy ukuthi iBrazil yase isithathile isikhala seRussia ekubeni yizwe elinezibalo eziningi zabantu abanaleli gciwane emuva kwelase-United States of America (USA).
EzaseChina:
Umkhuzi wezezimpi eChina, uMnu uChen Daixiang, ugcizelele iqhaza lePeople’s Liberation Army (PLA) ekuqinisekiseni ukubuswa kahle kwedolobha iHong Kong.
UDaixiang emuva kokuba iChina iveze ukuthi ihlela ukwethula umthetho omusha wokuphepha kazwelonke osongela inkululeko yeningi kuleli dolobha kanye nenkululeko yezombusazwe. “Amasosha azimisele, futhi kunesiqiniseko sokuthi azowuvikela umbuso wezwe nentshisekelo yentuthuko kanye nokuchuma kwesikhathi eside kwedolobha iHong Kong,” kusho Daixiang.
Cishe yonke imnyango esemthethweni eHong Kong ikhiphe izitatimende zokusekelwa komthetho ohlongozwayo.
Umthetho ophakanyiswayo wokuphepha kuzwelonke, ovumela nokuthi abezokuphepha baseChina basebenze eHong Kong okokuqala ngqa, uholele ekutheni abaningi kuleli dolobha bahlalele ovalweni lokuthi amalungu ePLA angafakwa emigwaqeni uma imibhikisho enodlame iqhubeka.
EChina imithetho yezokuphepha kazwelonke ijwayele ukukhomba ngqo izishoshovu zamalungelo abantu, abameli, izintatheli kanye nabakhankasela intando yeningi.
EzaseGhana:
UMengameli waseGhana, uMnu uNana Akufo-Addo, umemezele ukuthi abantu ababalelwa emakhulwini abasebenza ezimbonini zokulungisa izinhlanzi eGhana batholwe negciwane iCorona.
Okunye okuvelile ukuthi zonke lezi zisebenzi ezingama-533 zithelelwe ngaleli gciwane umuntu oyedwa kule mboni edolobheni iTema.
UMengameli akazange anikeze eminye imininingwane mayelana nokusebenza noma izinyathelo okufanele zithathwe ngalesi simo.
Ezase-Australia:
Ummeli wase-Australia utholakale ukuthi unegciwane iCorona emveni kokukhwehlela ePhalamende okugcine sekuholela ekutheni angayiqedi inkulumo yakhe wase eyohlolwa.
Ezase-Ecuador:
Bekugcwele imigwaqo kuphikiswana nemikhawulo ebekiwe ukuze kuliwe negciwane leCorona ezweni iEcuador. Ababhikishi bakhombise ulaka lwabo ngendlela uhulumeni aphendule ngayo isimo somnotho ngesikhathi leliya zwe libhekene nobhubhane. Amakhulu abantu ahlangana emadolobheni amakhulu aleliya zwe lapho amasha esondelene naphezu kwemithetho eyayibekiwe yokuthi abantu bangasondelani kakhulu.
Ababhikishi kubikwa ukuba bebeholwa izinyunyana zezisebenzi nezinhlangano zenhlalo (Social Organisation).