IQHINGASU: Uncike ngabenkolo uTrump
Kuwo wonke amazwe amakholwa ayinoma yiyiphi inkolo maningi. NaseUnited States of America (USA) yikubo kwawo njengoba ilaka lawo limqoka uma kunemikhankaso yesikhundla sikaMengameli. Kwabaningi kubukeka kuyilesi sizathu esenze uMengameli uTrump ngempelasonto kungalindele muntu wamemezela ukuthi izindawo zokukhonzela azivulwe .
Lokhu ukwenze ngale kwemiyalelo yososayensi abamelulekayo ngokusabalala nokunqandwa kokhuvethe. “Ababusi badinga ukwenza okufanelekile futhi bavumele zonke lezi zindawo ezisemqoka eziyisidingo sokholo ukuba zivulwe njengamanje,” kusho uTrump esitatimendeni ngoLwesihlanu. “Uma bengakwenzi lokho ngizobaphoqa ababusi,” kusho uTrump.
Okube sobala kulesi simemezelo yikuthi uMengameli uTrump usenze ukufaka ababusi bezifundazwe obekusobala ukuthi kokuningi kabavumelani naye. Yikho ethe angamemezela nje ukuthi akuvulwe izindawo zokukhonzela wabe esejikijela ngelokuthi uma ababusi laba bephikisana nalokho noma bengakwenzi yena njengoMengameli uzosebenzisa amandla akhe ukubaphoqa.
Udaba lokuvulwa kwezindawio zokukhonzela luyinzukazikeyi kuleliya lizwe njengoba kunjalo nakwamanye amazwe. Indaba isesibalweni samakholwa ahlangana endaweni eyodwa esondelene. Ezifundeni ezifana neTexas lapho abalandela inkolo kakhulu bekhona uTrump uyinoni ngakho ngesikhathi ememezela amehlo athe nje kubaholi bezenkolo kule ndawo. Omunye wabaholi uMnu uRobert Jeffress webandla elikhulukazi iFirst Baptist Church eDallas, uthe elakhe ibandla lizovula ngenyanga ezayo hhayi ngokushesha njengoba kusho uTrump.
Amakholwa ezinkolo ezinabantu abaningi emhlabeni njengamaKhrestu namaSulumane baphoqeleke ukuthi bahlehlise izinkonzo ezimqoka ezifana nePhasika kumaKhrestu nohambo lwaseMecca kumaSulumane. Lesi simo sesidale ukomela izinkonzo kanye nezinkulumo ezithi ohulumeni bamazwe ngokuvala izinkonzo bancisha izakhamiuzi ithuba lokuqhamuka noma ukukhulekela isixazululo kulolu khuvethe.
UTrump nongungqondongqondo kwezokuxhumana ubukeka ethathe isinqumo sokusebenzisa lesi simo ukuzakhela abalandeli. Wazile-ke ukuthi ongaphikisana nalokhu kungenzeka athathwe njengomcindezeli wezenkolo nokuyinto engaba yiphutha kupolitiki yase-USA. Olwenkolo kuleliya lizwe lucishe lufane nelungelo lokuba nesibhamu nokuthi ingasuka nje kuhlukane izwe phakathi.