IWHO ngaphansi kwengcindezi
Iyaqhubeka nokuba yibhola lomqakiswano wepolitiki iWHO. Le nhlangano eyasungulwa ngonyaka we-1948 ibhekele ezempilo emhlabeni. Muva nje iphansi kwengcindezi njengoba kunabayisolayo entshonalanga ngokwehluleka ukuqapha ukusabalala kokhuvethe kusuka ngoZibandlela nyakenye. Kukhona abathi isishiphi somnumzane sisulelwa kubafokazana ngoba ohola le nhlangano kungowase-Afrika, uDkt uTedros Adhanom Ghebreyesus. Akuqali ukuba le nhlangano isolwe ngoba nangesikhathi umhlaba uvika iswime flue ngowezi-2009 nangesikhathi uvika i-Ebola ngowezi-2014 kwaba khona ukukhononda. Amazwe ase-Afrika nangekho entshonalanga ayivikele iWHO ethi ijijimezwa ngoba ukufa kuthinte izikhondlakhodla. NeNingizimu Afrika imvikele uGhebreyesus yathi wenza umsebenzi oncomekayo. Naye ubukeka engaphazanyiswa yizinkulumo njengoba kunalokho unxusa ukubambisana kwamazwe ekulwisaneni nokhuvethe nathi uma kungenzeki njalo kungase kube nenhlekelele.