Kuseyicala ukuba ngowoHlanga emhlabeni
Ngesikhathi umhlaba ubhekene nobhubhane lwegciwane iCorona kukhona isilwane esingavumi ukuhlonipha lesi simo noma ukucasha ngenxa yalesi simo.
Lesi silwane kuwukucwasa kwabantu boHlanga emazweni aphesheya ikakhulukazi e-United States of America (USA).
Ezweni i-USA sekwaba injwayelo ukuba kube namacala abhekena namaphoyisa ngesihluku asikhombisa kwaboHlanga bakhona (African Americans) kodwa kulokhu okwenzeke kuleli sonto kubikwa ukuthi kuqale edolobheni iMinneapolis lapho kuphume umbiko wokuthi kukhona ikhasimende elizame ukusebenzisa imali engama-$20 ewumgunyathi ukuzama ukuthenga esitolo.
Amaphoyisa amthola umsolwa emotweni yakhe, ase ebika ukuthi wayephuze uphuzo oludakayo futhi wayewagolozela uma amaphoyisa efuna ukwenza umsebenzi wawo. Kodwa okuvelayo kuvidiyo eyimizuzu eli10kubonakala umsolwa ecindezelwe emgwaqeni yiphoyisa ngedolo emqaleni, kuphinde kuzwakale umsolwa ethi “Ngicela ningangibulali” kube ilapho abathwebuli bevidiyo sebecela amaphoyisa ukuba asuse idolo emqaleni wakhe ngoba umsolwa wayengasanyakazi futhi eseqala nokuphuma igazi.
Ukunganyakazi komsolwa kwenze kwabizwa abosizo lokuqala abamthathile washonela esibhedlela.Okuvela lapha ukuthi ukucwasana kwamanye amazwe kusadlangile futhi ngisho abomthetho nabo bayazibandakanya ekucindezeleni ezinye izinhlanga. Lesi sigameko sokubulawa kowoHlanga e-USA akusona esokuqala ngoba sekwaze kwaba netemu elithi “Black Lives Matter” elizama ukulwa nokucindezelwa kwaboHlanga ngabezomthetho, kodwa lesi sigameko akubukeki kungesokugcina futhi. Okuthuse kakhulu ngalesi sigameko ukuthi ngesikhathi umhlaba usebunzimeni bokulwa nokubhebhetheka kwegciwane iCorona, lapho abantu bamazwe kufanele babe munye ukuze kunqotshwe leli gciwane, isilwane sokucwasana sisabusa kubantu. Okwenzeke kuleli sonto akukhona okuhlukile kepha kuyisikhumbuzo sokuthi izinkulumo zingasho ukuthi izwe lidlulile ekucwaseni ngokwebala kodwa lowo osuke esho njalo usuke ekhulumela yena nabathile kodwa kuba khona idlanzana elizongavumelani nombono wabo okugcina sekuholela ezigamekweni ezinje.