Ukuhamba kukagesi kususe uthuthuva
Kuphoqe ukuthi amalungu omphakathi aze agcwale umgwaqo ukuze kubuye ugesi ophele kusukela ngoLwesibili ngezikhathi zehora lesithathu ntambama waze wabuya ngezintatha zangoLwesine.
Lokhu bekwenzeka emarobhothini amakhulu emgwaqeni uDumisani Makhaye uma usuzongenela KwaMashu. Izindawo ekade ziphelelwe ugesi iseSiyanda A kuze kuyofika eSiyanda C, isendaweni okuthiwa iseBhakidada. Zonke lezi zindawo zihlala aboHlanga.
Okukhalisa kakhulu umphakathi ukuthi abatshelwanga ukuthi kuzoba nokuphela kukagesi. Umphakathi ngendlela uboyiyona ubungena ndaba ukuthi uphula umthetho kaHulumeni wokuthi abantu bangeqi kwabangama-50 ndawonye, kusukela kusabalale igciwane lansondo ukhuvethe (Covid-19).
IBAYEDE ikhulume nelinye ilungu lomphakathi uMnu uMandlakhe Nkosi, ngokuthi ukuphela kukagesi ngabe kumshaye kanjani.
“Njengoba ubona iminyaka ihambile amakhaza ayazwela kakhulu, njengoba bekuphele ugesi nje angingene kakhulu njengoba bengingalitholi itiye, ngaphandle kwalokho indlu uma ingenagesi iyabanda nje.
NgoLwesithathu bekumele ngiyolanda imishanguzo yami emtholampilo kodwa angibange ngisaya, bekubanda bengingeke ngigeze ngamanzi abandayo njengoba ngibuye ngibe nenkinga yamathambo bekuzobe ngiyazibulala. Kungani sibaluleke ngoba kumele sivote kuphela, emva kwalokho bese siba izinto nje ezingena msebenzi,” kusho uNkosi.
Umphakathi uqale ukubhikisha ngoLwesibili phakathi kwamabili waqhubeka emini ngoLwesithathu wahlehliswa ngamaphoyisa ngezinhlamvu zenjoloba. Ukuhamba kosuku ungabuyi ugesi kuwucasule kakhulu kwathi ebusuku waya khona emarobhothini akuDumisani Makhaye nalapho amaphoyisa abehlome ngakho konke ukuzivikela.
Ukube ebengekho amaphoyisa ngabe asikho isakhiwo samabhasi eGo Durban, njengoba mphakathi ubulibeka ngembaba elokuthi uma ungabulala sona uzokwazi ukunakwa.
Kulezi zindawo ebeziphelelwe wugesi kwezinye izinsuku kunokuphela amanzi usuku lonke ngaphandle kwesexayiso.
IBAYEDE iphinde yakhuluma nelinye ilungu lomphakathi uMnu uJabulani Mkhize. “Uma ungaya eMhlanga ukhona ugesi, wawuphela khona ngoba kukhona iloadshedding. Thina asaziwa nokuthi siyini, ukube asiphumanga sagcwala umgwaqo ngabe awubuyanga ugesi.
Njengoba ngibamba amatoho kunzima ukuthi ngizondle, lokhu kudla okuhlala efrijini okunye kwakho ngikhuluma nje konakele.
Bekungcono ukuthi siyasazi isizathu ebesenza ungabi bikho ugesi,” kusho uMkhize.
Amaphoyisa aze afutha ngesisi esikhalisa unyembezi nesenze abantu babaleka kwazise siyingozi.
Obekuyingozi kakhulu ukuthi abedubula abantu phakathi nezindlu kakhulukazi eSiyanda A.
Ziningi izndawo ezingaphansi koMkandlu weTheku osekuqubuke izikhalo ngenxa yokuhamba kukagesi izakhamuzi zingazelele.
Nangalo uLwesithathu kunezindawo ezisentshonalanga yeTheku okuze kwalalwa ugesi ungabonwa.
Lesi simo sikhathaza ngoba senzeka ngalesi sikhathi kuqala ubusika amakhaza eshubisa umkantsha kunjalo negciwane leCorona lidlangile.