UMnyango uthembisa ukulekelela osomabhizinisi
Njengoba siphothula inyanga uNhlaba, singuMnyango sifisa ukuncoma zonke izisebenzi ngokuzikhandla kwabo ukwakha isifundazwe esiyisikhondlakhondla kwezomnotho.
Ngomhla zi-2 kuNhlangulana, ngizobe ngethula inkulumo njengoba kuzobe kuhleli iPhalamende. Enkulumeni yami engizoyethula ntambama emveni kwehora lesithathu izogxila kakhulu ekufukuleni umnotho wesifundazwe kanye nasekudaleni amathuba emisebenzi.
Siyazi ukuthi ukhuvethe selwenze umonakalo omkhulu ikakhulukazi kulabo abangosomabhizinisi abasafufusa. NgoLwesibili ngizochaza kabanzi ngezinhlelo zokufukula osomabhizinisi. Ngifisa abafundi beBAYEDE bathumele konke abafisa ukuthi ngikusho enkulumeni. Imininingwane ithi nomusa. dube-ncube@kznedtea.gov.za noma ngoWhatsApp 079 955 6665.
Kuzokhumbulela ukuthi ngomhla zingama-27 kuMbasa, usuku lwenkululeko ngakhipha isitatimende lapho engaveza khona ukuthi ngaphandle komnotho, akufanele sizitshele ukuthi sikhululekile ngempela.
SinguMnyango sikholelwa ukuthi isifo ukhuvethe kufanele sisisebenzise ukufukula osomabhizinisi abasafufusa. Iqiniso lithi, njengoba ukuhwebelana kwamazwe ngamazwe kuphazamisekile, kufanele sikhande izimboni zethu sizithuthukise. Kungaba yiphutha elikhulu ukuthi siqhubeke silinde amazwe angaphandle ukuthi asenzele izimfonyo yize kunomama bemifelandawonye abatshengisa ukuba nekhono.
Kuyajabulisa ukubona omama bekhipha amakhono benza izimfonyo. Lokhu kwakha isithombe esihle esitshengisayo ukuthi sonke fanele sithi mazidle ekhaya. Singumnyango sihamba phambili nezinhlelo zokuxhasa imifelendawonye ikakhulukazi leyo esazisayo ukuthi isithole izicelo eziningi ezivela ezinkampanini ezifuna ukuthungelwa izimfonyo nezinye izimpahla.
Olunye udaba olubalulekile yilolu lwamaSpaza Shop. Ngizomemezela ngesonto elizayo izinhlelo esinazo ukuxhasa abadayisi bethu. Sithi fanele siqinisekise ukuthi sibanikeza amandla okuncintisa nezitolo ezinkulu. Siyakugxeka ukunyuswa kwamanani okudla yizitolo ezinkulu yize sonke sazi ukuthi abantu bahlezi emakhaya abasebenzi ngenxa yokhuvethe.
Ngaphandle kokuthi izitolo eziningi sizithathele ingalo yomthetho, ngenxa yokunyusa amanani, sithathe isinqumo sokuthi sixhase abalimi abasebenza komasipala abahlukahlukene.
Ngosuku lwenkululeko, savakashela kuMasipala iHarry Gwala lapho esathula khona uhlelo lokusiza abalimi ikakhulukazi omama kanye nentsha. Loluxhaso luhlanganisa
1. Amaloli ali-15 e-Isuzu angamafriji,
2. Amaveni angama-4 x 4 e-Isuzu ali-10
3. Kanye nezinqola ezimasondosondo ezili-10
Zonke lezi zinto esengizibalile ezokusiza abalimi bethu ukuthi ukudla abakukhiqizayo kufinyelele ezitolo.
SinguHulumeni sisebenzisana namaDistrict Development Agency ama-5 ukuqinisekisa ukuthi ezinyangeni ezintathu kuthengwa ukudla okukhiqizwa abalimi bethu abasafufusa.
Iyizi-R44 000 000 esiyibeke eceleni ukuxhasa lolu hlelo.
Okunye futhi okubaluleke kakhulu ukuthi sesithole izimakethe lapho lokhu kudla okudayiswa khona njalo ngesonto. Lokhu kuhlanganisa izibhedlela ezingama-27 kanye nesitolo esikhulu uBoxer.
SinguMnyango siyazigqaja ngale mifelandawonye yaseHarry Gwala egxile kwezolimo, okuyilena:
Zamo Biyase, PTY UbuhleBamaqadi Women Coop Sivukile isizwe women Coop Isivunosethu Women Coop Inkokhelo Women Coop Abomkhuleko Coop
Ilibo Lethu Women Coop Inkazimulo Yamakhosikazi Coop Intuthuko Women Coop