Wakhomoza i-Afrika ngengoma uBadarou
Njengoba kule nyanga sisemgubhweni weNyanga Ye-Afrika kuningi okuxukuze ugebhezi lwami. Yize leli zwekazi lingasalanga ekugaselweni ukhuvethe, olufike lwanezelelela kwezinye izinkinga, kuningi nokho okungenza ngizigqaje ngokuba ngumAfrika. Yize “izazi” zaseNtshonalanga zisafuna ukuthi sizibukele phansi kodwa amakhono yinto okungabuzwa ukuthi saphiwa ngoPhezulu.
Ngisho nangezikhathi zobandlululo, amaciko amaningi akuleli akhombisa umhlaba ngeziphiwo zawo. Izingoma aziqhulula ngaleziya zikhathi zidlise ngomlayezo oshubile nobumtoti, nanamhlanje zisaduma kunanele izihosha nezintaba zakuleli naphesheya.
Elinye lamanoni engilikhumbulile elisihloko sithi So Why nelingena onyakeni wama-23 laqanjwa ngowe-1997.
Lalibhubha emazweni ase-Afrika abantu bebulana ngokubuzwe. I-International Committee of the
Red Cross, ebhekene nokuvikela abahlukunyezwa udlame emazweni ahlukene, yaxhumana nendoda thizeni yaseBenin kodwa esizinze eFrance.
IRed Cross yanxusa uWally Badarou ukuba aqhamuke neculo elalizothumela umyalezo wokuthi abantu base-Afrika mabayeke ukubhuqabhuqana bodwa.
Nebala “umthakathi wezindaba” kwakungathi wayevele evivile njengoba kwangenwa kugijinywa eStudio Feber eParis, eFrance. UBadarou wahlanganisa abaculi abahlabahlosile basemazweni ase-Afrika ahlukene. Kuyacaca ukuthi wenza ucwaningo olunzulu ngoba laba baculi banezindimbane zabalandeli cishe amagumbi wonke omhlaba.
Umyalezo owawuzothunyelwa kule ngoma wawuzofinyelela ngokushesha mhlawumbe nomehluko ubonakale.
Lapha kithi wapika uJabu Khanyile. Walanda uYoussou
N’dou waseSenegal, uPapa
Wemba wase-DR Congo kanti “indoda engaziwa” uLagbaja waseNigeria necilongo lakhe noLourdes Van Dunem wase-Angola abasalanga ngaphandle.
Okuhlalukayo ukuthi uBadarou laba baculi akabanqindanga amandla nokukhululeka ekuhlanganiseni leli culo. UKhanyile uyivula eyidudula ngesiZulu ethi “Ngibathe ngicel’uxolo ngithol’inzondo” bese kuthi ekuhambeni kwengoma afake isiNgisi.
UWemba uxhuma ngesiLingala nesiSwahili, uNdou uqhamuka nesiWolof esitholakala ngakubo naseGambia naseMauritania.
ULourdes, ofaniswa nelinye iqhawekazi laseCape Verde uCesaria Evora, ushaya isiQuimbundo sangakubo bese kuthi uLagbaja axebule olwangakubo isiYoruba nesi-Ibo. Kuyacaca ukuthi uBadarou, abanye abambiza ngoQuincy Jones wase-Afrika, wancela ulwazi ezingwazini ezinjengoMirriam Makeba, uJoe Cocke noSalif Keita njengoba akwazi ukuhlanganisa lolu nqambothi.
ULucky Dube wagcina exinekile ukuyoqopha estudiyo kodwa uneqhaza alibambayo sekwenziwa idokhumentari yalo msebenzi. Ukuhlanganisa kukaBadarou lo msebenzi kungafaniswa nokwenziwa isishoshovu samalungelo abantu nomculi uHarry Belafonte nemeneja kaLionel Richie uKen Kragen.
Lezi zinsizwa zaqhamuka nombono wokusungula inhlangano engenzi nzuzo i-USA for Africa (United Support of Artists for Africa) ngowe-1985.
Inhloso enkulu kwakuwukulwa nobubha nendlala eyayihlasele e-Afrika nakwezinye izindawo e-USA.
ULionel noMichael Jackson babhala ngokuhlanganyela inoni iWe Are The World kanti imali eyenziwa yanikelwa ezikhwameni ezahlukene ukuphonsa esivivaneni.
Phakathi kwabaculi abafaka isandla ngokucula kubalwa uStevie Wonder, uPaul Simon, uKenny Rogers, uJames Ingram, uTina Turner, uBilly Joel, uDiana Ross, uDionne Warwick, uWillie Nelson, u-Al Jarreau, uBruce Springsteen, uSteve Perry, uDaryl Hall, uCyndi Lauper, uBob Dylan, uRay Charles, uJohnny, uLa Toya Jackson, uBette Midler, uJohn Oates, uJeffrey Osborne, iThe Pointer Sisters, uSmokey Robinson nabanye.
Singaze sikhohlwe, nakuyo le ngoma yeUSA for Africa, kunohide lwabaculi ozimpande zabo ziseAfrika.