Ukufriza ukudla kungakusiza ngezindlela eziningi
Ukufriza ukudla kungaba umkhuba ongenza impilo ibe lula ngendlela eyisimanga. Ngiyakhumbula ukuqala kwami ukuzijwayeza lo mkhuba, ngabona umehluko oyisimanga. Ziningi-ke izizathu ezingasiholela ekutheni siqale imikhuba ethize. Mina nje ngaqala ukuzifundisa ukufriza ukudla ngenkathi ngizithwele okokuqala, ezinyangeni zokugcina. Ngalesi sikhathi, ngangikhathala ngendlela eyisimanga, ngakho ngangingenawo umfutho nogqozi lokuma eziko isikhathi eside ngilungisa ukudla.
Ngakho, ngafunda ukuthi njalo uma ngizizwa nginomfutho wokupheka ngilisebenzise lelo thuba ngokuthi ngipheke kube kuningi ukudla ukuze kusale ngikufake kufriza. Ngalezi zikhathi ngangiqiniseka ukuthi ngipheka izinhlobo ezahlukene zokudla engizokugcina kufriza. Lokhu kwakungisiza kakhulu, ikakhulu ngezikhathi lapho ngangingeke ngempela ngikwazi ukupheka. Lona, kwaba umkhuba engiqhubeka nawo empilweni yami, angizange ngiwuyeke. Ifriza yami ihlale inokudla nje okugcinwe ezitsheni kulinde izinsuku ezithize. Ngafunda ngisho ukufriza izinkwa neziphuma kube ngathi ziqeda ukubhakwa uma sezincibikalile.
Kuningi okuguqukile ezimpilweni zethu ngenxa yalolu khuvethe olusihlasele kulesi sikhathi. Abaningi bazithola besebenzela emakhaya baphinde babe ngothishela ezinganeni zabo. Konke lokhu kungagcina kudla isikhathi, sithole sekunzima ukupheka nsuku zonke.
Mhlawumbe lesi kungaba yisona sikhathi sokuthi siqale sizijwayeze umkhuba wokupheka kakhulu bese siyafriza. Okuhle ngalokhu kudla ukuthi wena nomndeni wakho nisazodla ukudla okuphekwe ekhaya, hhayi okuthengwe esitolo. Nanka amasu angakulekelela ukuthi lo mkhuba ube yimpumelelo:
1. Qinisekisa ukuthi ifriza yakho inendawo eyanele
Uma ifriza isekhishini lakho kuyi yona kuphela onayo, qinisekisa ukuthi uyihlela ngendlela ezokwenza wazi ukuthi singakanani isikhala onaso ongasisebenzisela ukubeka kuso izitsha zakho ezinokudla. Lokhu kuzokusiza nasekutheni ihlale iqoqekile ifriza yakho. Uma unenye ifriza ekhaya (mhlawumbe ehlala egalaji lezimoto), ungasebenzisa yona ukugcina lokhu kudla.
2. Indlela yokupakisha ukudla kwakho
Qinisekisa ukuthi izitsha ozisebenzisayo zilungele ukuba kufriza. Izitsha ziyabhalwa uma zilungele ifriza, umshini wokuwasha izitsha, uhhavini noma imicrowave. Funda imibhalo ukuze ungatholi usuqhunyelwa yizitsha zakho kufriza. Lezi zitsha zingaba uplastiki okanye ingilazi.
Mina ngivamisile ukusebenzisa izikhwama zeplastiki ezinokusaziphu uma ngizofaka izinto ezifana namaqebelengwane kanye namamafini. Kuba lula ukuzipakisha. Okufana namasobho, izitshulu, uphuthu nokunye, ngikufaka ezitsheni zengilazi noma zikaplastiki. Okunye engakubona kuwusizo ukuthi ngifake amalebula ngaphandle kwezitsha noma izikhwama ukuze ngingahlupheki uma sengifuna ukukhipha ukudla ngaphandle.
3. Isikali sokudla uma ufriza
Kubalulekile ukuthi ufake isikali esizokwenela wonke umuntu uma sekudliwa - ungafaki kube kuningi kakhulu ukudla esitsheni. Ukudla okuncane kuyashesha ukuncibilika (uma kuqhathaniswa nokuningi) kanti kusheshe kufudumale futhi uma ukufaka kumicrowave.
Ukufaka ukudla okungekuningi esitsheni kuzovikela ukuthi kusale. Akulungile ukubuyisela ukudla kufriza emva kokukuncibikalisa kanti kungenzeka ungabi nagqozi lokudla ukudla okufanayo nangakusasa. Ngale ndlela, wonga ukudla kwakho.
4. Ungakhohlwa yibhulakufesi namasneksi
Abantu abaningi bacabangela kakhulu isidlo sakusihlwa uma bezogcina ukudla kufriza. Isidlo sasekuseni kanye nokokubamba umoya nakho kubalulekile. Ngenxa yokuthi isikhathi sasekuseni kuvamise ukuthi kube yisona esimatasa lapho kuvukwa kulungiselwa ukuqala usuku, kuzokusiza ukonga isikhathi ekulungiseni ukudla.
Zinike isikhathi uthole ukuthi ikuphi ukudla okulungele ukufakwa kufriza. Nginesiqiniseko sokuthi ayikho into engathokozisa umndeni wakho ukudlula lapho becabanga ukuthi bazodla isinkwa nebhotela, babone kufika ukudla ngepuleti, okuphekwe ekhaya nokushisa bhe – uyoba yiqhawe langempela emehlweni abo. Ngiyethemba la masu azokusiza ukuthi wenze impilo yakho ibe lula ekhishini.
Kulesi siqephu sanamuhla, sizocobelana ngendlelakwenza yamaCinnamon Rolls alula. Abaningi banokungazethembi ekwenzeni lolu hlobo lwamakhekhe. Abukeka enzima ukuwenza, kodwa iqiniso ukuthi alula ngendlela eyisimanga. Emva kwanamuhla ngiyethemba sibaningi esizozinika isikhathi sizenzele amaCinnamon Rolls ethu, esikhundleni sokuwathenga esitolo. Ngingajabula ukuzwa ukuthi kuhambe kanjani, ngiphinde ngibone nezithombe. Ungangithumela i-imeyli ku szungu@ nkzgroup.co.za.
AmaCinnamon rolls Izithako
Ama-345g (izinkomishi ezimbili namakota amathathu enkomishi kaflawa wamakhekhe
Ama-50g kashukela omhlophe
Ithispuni elilodwa (1) likasawoti
Iphakethe elilodwa (1) leyeast
Ingxenye yenkomishi (1/2) yobisi
Ikota yenkomishi (1/4) yamanzi Izipuni zokudla ezintathu (3) zebhotela elincibilikisiwe
Iqanda elilodwa
Okufakwa kuroli (Filling)
Ama-45g webhotela elithanjisiwe Isipuni sokudla esisodwa (1) seGround Cinnamon Ama-50g kashukela omhlophe noma onsundu
Indlelakwenza
Endishini enkulu, sefa uflawa bese ufaka ushukela, usawoti kanye ne-yeast. Hlanganisa ubeke eceleni.
Kwenye indishi, hlanganisa ubisi, amanzi kanye nebhotela. Fundumeza le ngxube kumicrowave. Qinisekisa ukuthi ingashisi kodwa ifudumale (kubaluleke kakhulu lokhu).
Faka iqanda uhlanganise bese uqulela izithako ezimanzi kwezomile. Hlanganisa inhlama ngesandla.
Vuvuzela uflawa omncane lapho ozosebenzela khona. Beka inhlama yakho bese uyaqhubeka uyixove ngesandla imizuzu ecishe ibe mithathu.
Faka inhlama yakho endishini enindwe kancane ngebhotela (noma iNon Stick Spray) bese uyibeka ukuze ikhukhumale (imizuzu ecishe ibe lishumi).
Ngesikhathi usalindile, lungisa ifilling yakho.
Endishini encane, hlanganisa ushukela neCinnamon.
Phinda uvuvuzele uflawa lapho usebenzela khona bese wendlala inhlama yakho. Ninda inhlama yakho ngebhotela elithambile, bese uvuvuzela ingxube kashukela neCinnamon ngaphezulu.
Cindezela inhlama kakhulu ngerola (bona isithombe ngezansi)
Sika inhlama yakho izingcezu ezilinganayo, bese uzihlela epanini lokubhaka.
Vala ipani lapho ngeCling Wrap ulibeke endaweni efudumele (mina ngiyibeka phandle elangeni) imizuzu ecishe ibe ngamashumi ayisishiyagalolunye (90) ukuze ikhukhumale.
Emva kwemizuzu ecishe ibe ngamashumi amathathu ulindile, shisisa uhhavini ngokuwubeka ku-190°C.
Uma isikhukhumele ngokwanele inhlama yakho, faka ipani kuhhavini ubhake imizuzu ecishe ibe kwengamashumi amabili nanhlanu.
Khipha umbhako wakho uwubeke ngaphandle. Uma uthanda ukufaka okuthile phezu kwama rolls akho, ungahlanganisa ushukela osampuphu (icing sugar), ivannila essence kanye nobisi bese uvuvuzela phezu kwama rolls afudumele.