Uvukuze intshisekelo yokubhala uNzwakele
Ziyavela kancane izincwadi eziqophe umlando ngamaciko aseNingizimu Afrika.
Kungaba abaculi, abezemidlalo nabalingisi. Ababhali abanohlonze bavamise ukukhala ngokuthi amaciko akuleli awathandisisi ukugeqa amagula ngezindaba zawo zangasese.
Abanye bavika ngokuthi bambalwa ababhali kuleli abangakwazi ukubhala into ecacile ngabo.
Ngake ngaba nenhlanhla yokunqwamana nencwadi yokuqala ebhalwe ngempilo kaLucky Dube esihloko sithi, Crazy World: The Life & Career of Lucky Dube eyakhishwa yiReach Out Publishers ngowe-1997.
UGuy Henderson owayeyi-Executive
Accountant kwaGallo
Records waphinde waba yiTour Manager kaDube, nguye owabhala le ncwadi enamakhasi angama-232. Ngebhadi le ncwadi ayilutholanga udumo olwalutholwa yilo mculi esaphila esanganisa izihlwele emazweni aphesheya nase-Afrika.
Ngowezi-2005 kuthushuke uLenah Mochoele owayeyiTour Manager kaDube naye wabhala eyakhe esihloko sithi, Walking A Mile In Your Shoes: My Spiritual Journey With Lucky Dube. Lapha le ntokazi iveza okwenza basondelana kakhulu noDube ngale komsebenzi, okuwukukholwa.
UDube wayeyilungu lokuqina lamaNazaretha aseBuhleni adume ngelikaShembe.
Ekusebenzeni benqamula amazwe noDube udweba isithombe sokuthi lo mculi wayesebenzisa iphimbo lakhe nomlayezo ongathemelezi ukulwa nokucwaswa kwabantu bebodwa nokulwela ukuthi abantu balingane ngamalungelo.
Ubugebengu, obathatha impilo yakhe ngowezi-2007 ebanjwa inkunzi ngasemzini wakhe eGoli, ikhona ayecula kakhulu ngakho umfo kaDube ekhuza abantu ukuthi mabuphele kuhlalwe ngokuzwana.
Okunye okwembule inkungu umbhali ukuthi uDube wayefuna abantu baseAfrika bavuseleleke babuyele emasikweni abo bangenwe nawumoya wokukholwa.
Ngasekuqaleni kwencwadi umbhali akabushiyanga ubunzima bokukhula kwalo mculi esemncane esebenzela abelungu emapulazini angakubo eMpumalanga njengoba azalelwa e-Emerlo ngaphambi kokufudukela eNewcastle.
Kuvela isihluku abhekana naso lo mculi edephunwa izinja esasazelwe abelungu. Kubuye kuvele nokuthi abelungu bamshoka ngento kagesi ukubona ukuthi iyingozi kangakanani ngaphambi kokuthi bavumele izingane zabo zidlale ngayo.
Kodwa yize adlula ebunzimeni obunjalo, umfo kaDube akazange adikibale njengoba alifeza iphupho lakhe lokuba umculi womhlaba. Waqala ngesigqi sombhaqanga njengoba eshone esebalwa namanye amaqhawe eReggae.
Kuyacaca ukuthi likhulu ivuso uDube alishiya kumbhali njengoba ekuveza ukuthi kumele abantu bengahlukani nobudlelwano noMdali.
“Ezindaweni ebesigadula kuzona kwavuseleleka kimina ukuthi ngembathe usiko lwami ngibona indlela uLucky ayengayifihli ngayo imvelaphi yakhe njalo uma exoxa ngomsuka womculo wakhe. Okungikhanyele ukuthi amasiko ethu awanakwa kangako kwamanye amazwe yize equkethe ubuhlakani obuyinqaba futhi eyigugu kithi.
Bheka nje sihlonishwa umhlaba wonke ngenxa yokukhiqiza abantu abanjengoHugh Masekela, uCaiphus Semenya noMirriam Makeba. Kumele thina esisaphila sikugxishe ezingqondweni zentsha ubumqoka bamasiko. Ngokuqopha lokhu ngidlulisa kwabazolandela ukuze baqonde ukuthi bangobani futhi ibheke kuphi indlela esiyihambayo,” kubhala uMochoele.