Usefuna ukugijima ku-Absa uHlomuka
Umqhudelwano womkhumulajezi ongaphansi kwePremier Soccer League (PSL) iNedbank Cup, ungothandwa abantu abaningi njengoba unikeza ithuba amaqembu angaziwa ukuba agijime namaqembu amakhulu agijima ku-Absa Premiership.
Okuhlezi kulindelekile ukuthi iqembu elincane lehlule elikhulu, lezi zigameko sezenzeke isikhathi eside eminyakeni edlule. Isigameko kodwa okuze kube inamhlanje okusakhulunywa ngaso ilapho khona iqembu lakuGladAfrica Championship iTS Galaxy lehlula iKaizer Chiefs kowamanqamu ngegoli elilodwa eqandeni.
Lokhu kwenzeka eMoses Mabhida Stadium, lapho uSnethemba “Snebenebe” Ngidi aba ngomunye wabadlali abazifaka emlandweni wokuba ingxenye yeqembu lokuqala eliqhamuka esigabeni esingaphansi kwe-Absa Premiership ukunqoba le nkomishi.
Kodwa konke lokhu sekuwumlando. IBAYEDE ibinengxoxo ekhethekile noNgidi owathusa abaningi eshiya iTS Galaxy emva nje kokunqoba iNedbank Cup. “Akukhona ukuthi ngahluleka kuTS Galaxy kodwa ngashiyiswa izinkinga ezithize. Ekuqaleni kwesizini ngidlale eqenjini eligijima ku-ABC Motsepe KwaZulu-Natal iGreenWood Park Friends, manje ngisabambe umoya eqenjini laseMpumalanga eligijima khona ku-ABC Motsepe iPassion FC,” kusho uNgidi.
Lo mdlali oneminyaka yobudala engama-27, uthe okuyibo ababongayo ngokumgqugquzela ekutheni aze abe lapho ekhona wumndeni wakhe, abangani kanye nabaqeqeshi ababehlezi bebona ikhono kuyena.
Waqala unobhutshuzwayo eneminyaka yobudala eyisi-6, ufunde eNdabazezwe Primary School, iTholamandla Senior Primary, iFoundation Primary, iJakaranda Primary waqeda eRosina Sediba High School.
Uthe ukuhlehla kwenqama ukulanda kwayo amandla, okusho ukuthi kuningi abantu okumele bakulindele kuyena.
“Iminyaka isangivumela, ngisenawo amasizini cishe amahlanu ukuthi ngiqhubeke nokuzibonakalisa.
Ngesizini ezayo ngifuna ukuzibona ngigijima ku-Absa Premiership,” kusho uNgidi. Ukhulele kuSupersport United, wadlalela neVasco Da Gama eyayigijima kuNational First Division (NFD) esiyaziwa ngeGladAfrica Championship.
IVasco Da Gama manje isibizwa ngeStellenbosch egijima ku-Absa Premiership.
Yize iNedbank Cup kuyiwona mqhudelwano omkhulu aseke awudlala kodwa miningi eminye aseke ayidlala ehlonishwayo kuleli.
Ngonyaka wezi-2008 wadlala iNike Cup Championship, i-U/17 Lagos International Championship ngowezi-2010, eTeslim Balogun Stadium, eLagos, eNigeria. Wakhethwa njengomdlali owavelela waphinde wathola indondo yokuvalela amagoli amaningi, abayisi-6.
Eminye imiqhudelwano owe-U/19 Bayhill Tournament, iCoca Cola, iFIFA Tounrnament U/12, i-Engen, iKay Motsepe League, iFuture Championship neVodacom Cup.
Uke wadlalela neqembu lesizwe labaneminyaka engama-20, wadlala kuCOSAFA U20 Youth Championship.
Lo mdlali ozifela ngoCristiano “CR7” Ronaldo, njengoba kukhona ukhuvethe (Covid-19) indlela azigcina ngayo ukuba abesesimeni somdlali ukuthi aziqeqeshe yedwa.