EMKHANDLWINI I-ZDM Isilonda sisola imbilapho
Kukhonjwa umvuka wendulo wobuholi beNkatha N abezindaba ba n o kuse benzi seka
Akukuningi okuyimfihlo ngoMkhandlu iZululand. Kusuka ekuqhubushaneni kosopolitiki okungamakhansela. Ukuthinteka kwezikhulu zikaMasipala ezindabeni nasembangweni yosopolitiki kanye nakulezo zenkohlakalo kanye nezinsolo zokusetshenziswa kwabemithombo yabezindaba yizinhlangothi ezibangayo. Ukuphuma kombiko wophenyo lwakamuva ongamakhasi angama-387 uqhubeke kulo ukhondolo ngalo Mkhandlu oholwa yiqembu i-Inkatha Freedom Party (IFP) ngaphansi kobuholi bukaMfundisi uThulasizwe Buthelezi.
Lo mbiko owaziwa ngokuthi yiForensic Investigation Report Into Allegations Of Maladministartion, Fraud and Corruption At Zululand District
Municipality, uhlanganiswe yinkampani yabameli abazinze eThekwini, iMdledle Incoporated. Abameli laba baqokwe nguMnyango Wokubusa Ngokubambisana Nezindaba Zomdabu oholwa nguMhlonishwa uHlomuka kulandelwa iSigaba 106 (1)(b) soMthetho Wezinhlelo Zikamasipala uNombolo 32 wezi-2000 [Municipal Systems Act (Act 32 of 2000)]. Umbiko lona uphothulwe ngenyanga eyedlule khona lapho wedluliselwa kwabathintekayo kuMasipala nobekulindeleke ukuthi bazikholise bese benza lokho okube yizincomo noma baqhamuke nesinye isixazululo.
Ngakosopoliti kulo Mkhandlu kade ulindiwe ngezizathu ezahlukene nokho. Kubo kukhona abebewubabele ngoba benesifiso sokuthi ulahle iMeya ngecala elithinta ukungaphathi kahle kanye nenkohlakalo. Kulokhu yize amaqembu aphikisayo angakufihlanga lokhu esikhathini esedlule, ingxenye ethize yamakhansela e-IFP ibisekhaleni lalo mkhankaso. Kubo bekuwumvuka wendulo njengoba selokhu iMeya uButhelezi yaqokwa bekunezinkulumo zokuthi “ifakwe” esikhundleni ngenxa yokuhlobana nokusondelana nobengumholi weqembu, uMntwana wakwaPhindangene. Kulaba uMfu uButhelezi weqa abaningi ngokwabo okwabe kumele bathathe ngenxa yolwazi lwabo nesikhathi eside kuHulumeni Wendawo. Leli phephandaba labika kabanzi ngalokhu esikhathini esedlule.
Okunye esolwa ngakho iMeya uButhelezi nokuseyisilonda yindlela okuthiwa yachutha ngayo lowo owayeyiMeneja uMnu uNkosi nayimanje udaba lwakhe olusesezinkantolo kanti futhi beliseqhulwini nakubaphenyi.
Ngakolunye uhlangothi bekukhona abebefisa ukuthi umbiko uvune iMeya ngoba bekholwa wukuthi uma kube njalo kuyobe kuphela isahluko salabo ababasola ngokungafuni ukwedlula nokwamukela izinqumo zeqembu elakhipha iNkosi yaseMbongombongweni, eyabe iyiMeya ngemuva kukaMfundisi uButhelezi kanjalo nokukhishwa kukaMnu uNkwanyana obenguSomlomo. Leli phephandaba selingakuqinisekisa ukuthi lokwehlukana akukho kuphela kulabo abaseMkhandlwini kepha kwenabele nakwezinye izinhlaka zeqembu kuye kufike ngisho ebuholini obuphezulu nabo okusolwa wukuthi kuye kwezela.
Omunye okhulume naleli phephandaba nongahambisani neMeya uButhelezi nocele ukuba igama lingadalulwa uthe: “Sibhekile phela ukuthi iqembu lizothini ngoba nanku umbiko. Kanti kuxoshwa abanjani ingani yaxoshwa iMeya uMathaba kwaNongoma kwalandwa uMncwango, yaxoshwa iNkosi uButhelezi, waxoshwa uMatshinga ebaQulusini nangu noJerry (obeyiMeya ebaQulusini) bonke laba kwakunezinsolo nemibiko. Lona ongaxoshwa ngonjani?” kubuza umthombo.
IChina isikhombise izinhloso zokuqinisa isandla ukubhekana nezinkinga eziseHong Kong.
Iqale phansi imibhikisho eHong Kong emva kokuthi iChina yethule umthetho omusha ozongamela ukuvikeleka kwezwe ozobhekana naso isifunda.
Lo mthetho wezokuvikela izwe wethulwe engqungqutheleni yeSishayamthetho sezwe yaminyaka yonke eBeijing ngesonto eledlule.
NgoLwesithathu, amaphoyisa eHong Kong athe abophe abantu abalinganiselwa emakhulwini amabili ngenxa yokwephula umthetho wokubuthana.
IBeijing ithi lo mthetho uzoqinisekisa ezokuphepha ezweni uphinde uvale amagebe ezinhlakeni zezomthetho eHong Kong.
UNgqongqoshe Wezangaphandle uWang Yi uthe: “Ukusungula kuphinde kuthuthukiswe izinhlaka zomthetho zaseHong Kong ukuze kuvikeleke izwe sekube yinto ephambili futhi nephuthumayo.”
Wengeze ngokuthi umthetho uzobhekana nezenzo kuphela ezibeka engcupheni ukuvikeleka kwezwe.
Ngokombiko wabezindaba eHong Kong, iBeijing inwebe umbalo womthetho ukufaka izinhlangano kanye nabantu abasolwa ngokubeka engcupheni ukuvikeleka kwezwe.
Lo mthetho ulandela imibhikisho enodlame edonse cishe unyaka wonke ondlule eHong Kong kwakhinyabezeka ukusebenza kuleliya dolobha.
Umholi waseHong Kong uCarrie Lam, nokhungethwe izinkinga, umthetho omusha ophakanyiswe iBeijing ngeke ulimaze umgomo we-”One Country, Two Systems.”
“Lesi sinyathelo sizoqinisekisa ukusebenza kwawo umgomo we-’One Country, Two Systems,’ ngokwenza ngcono imithetho ephathelene nezomthetho,” kusho uLam khathi ekhuluma nabezindaba.
Ophethe ezokuvikeleka eHong Kong uJohn Lee uthe lo mthetho uzosiza ukubhekana nobushokobezi osebusabalala njengoba nodlame selugcwele yonke indawo.
“Ubushokobezi buyanda edolobheni nokuzolimaza. Izingqapheli zaseChina ezeseka uHulumeni zithi umthetho omusha uyadingeka. Zithi uzosiza ukusibuyisela esimweni lesi nesifunda, nesizibusayo ngemthetho yaso kodwa sibe siyingxenye ye-China ngokwe-“One Country, Two Systems.”
Ephawula kwelinye lamaphephandaba ombuso, uSolwazi wezomthetho eNyuvesi yaseHong Kong, u-Albert Chen Hung-yee uthe iChina ayigxambukeli ekuphatheni kulesi sifunda, esola iHong Kong ngokwehluleka ukubeka imithetho efanele. Isinyathelo seBeijing siphinde sithumele umyalezo kumazwe aseNtshonalanga ukuthi iChina ayizimisele ukuyekelela imibhikisho yaseHong Kong iqhubeke ngokungenamkhawulo.
UNgqongqoshe Wezangaphandle uWang Yi unxuse amazwe omhlaba ukuthi angagxambukeli odabeni lwaseHong Kong.
UMongameli waseMelika uDonald Trump wexwayise ngokuthi i-United States of America izothathela izinyathelo uma iwubeka lo mthetho.
Kubonakala ngathi iChina ithathe lesi sinqumo ngesikhathi esihle kuyona ngoba amazwe amaningi asematasa nobhubhane iCOVID-19. Kuzocaca nokho ukuthi yiziphi izinyathelo abazozithatela iChina, uma bezokwazi.
IJapan nayo izwakalise ukukhathazeka ngesimo saseHong Kong.
Ngesonto, izinkumbi zabantu zigcwale imigwaqo zibhikisha maphakathi nedolobha ukuphikisana nalo mthetho. Ukwamukelwa komthetho engqungqutheleni kusho ukuqala kohlelo lokuwubeka ngokusemthethweni.