UMalema uthi bayamhlolela uMaDlamini
Ukukhuluma kwepolitiki kuthi asikho isitha kanjalo nomgani wangunaphakade. Lokhu kufakazeke izolo ngesikhathi loyo onguNgqongqoshe ka Cogta uDkt uMaDlamini Zuma etholwa ukwesekwa ngumholi weqembu lesithathu ngobukhuliu i-Economc Freedom Fighters ( EFF), uMnu uMalema.
Lo mholi uvikele uMaDlamini Zuma olakweni labantu ababhemayo nabamsola ngokuthi nguye osevimbe ukuthi ungavulwa ugwayi kuleli.
Abagxeki bakhe bathi ubavimba ukuthi bahwebe ngogwayi nje yingoba uhlelembela abahlobo bakhe ababala uMnu Adriano Mazzoti wenkampani I Carnilinx odube ngokuhweba ngogwayi ongekho emthethweni.
Kulokhu uMalema uthe bayamhlolela uMandlamini ngoba impi yakhe nalomkhuba wokubhema yindala ayiqali ngoba sekunokhuvethe nje.
“Lokhu okushiwo yintimbothi futhi akwamukelekile, “kusho uMalema. Uthe laba abahlasela uMaDlamini Zuma banezinhloso zabo, bamthela ngodaka nje yingoba bafuna ukumfakela isigcwagcwa. Uveze nokuthi empeleni abantu abayisa uhulumeni enkantolo yibo laba abahamba noMazzoti .
Uveze isithombe sokuthi iqhingasu lalaba abaninda uMaDlamini ngelokufadalalisa izinkampani ezincane kuchume izikhondlakhodla ezingaphansi kwe British American Tobacco ( BAT) nathi kubo njengoba kuvaliwe nje akudikizi nqulu ngoba uma kuvalwa kuleli bayahweba naseNamibia kepha laba abasakhasayo bahweba lapha kuphela.
UMaDlamini kanqali ukududulana nalaba bakagwayo kakhulukazi abe BAT njengoba esangugqongqoshe wezempilo baze badudulanela ezinkantolo yabaginga intombi yaseBulwer. Abanye ke bathi kulokhu abaphikisana naye bamsasazela ngabantu kanye namaqembu aphikisayo.
Nokho uMalema usigxekile wasibeka njengobuwula isenzo sikahulumeni sokuvula utshwala kepha avale ugwayi. Kulokhu uthi isayenzi ikhomba ukuthi yize ugwayi ungalungile emaphashini kepha abantu bafa kakhulu ngasetshwaleni nathe yibo okumele bubhekwe uma inhloso incike ekuphenduleni isayensi.
Kanti naye uMaDlamini kanyakazi ekutheni ugwayi uyinto elula engasabalalisa ukhuvethe ngoba umusa wabantu abawubhemayo uyingozi njengoba bekwazi ukushiyelana ngawo nje bebaningi.