OMalume KwaZulu-Natal bavivela ukuvulwa kwezikole
Baqale ngokuhlanza izimoto abathutha ngazo izingane ngezibulalimagciwane
Imikhakha noma izimboni eziningi zizovuleleka ngoMsombuluko njengoba uMengameli wezwe, uMnu uCyril Ramaphosa, ebike ukuthi kuzoqala izinga lesi-3 lokuvalwa kwezwe.
Njengazo zonke izindawo ezisebenza ngomphakathi noma ngabantu uqobo, imboni yoMalume KwaZulu-Natal kuthe kuvula othisha noMalume izolo banquma ukubulala amagciwane ezimotweni abathutha ngazo izingane uma ziya esikoleni.
IKwaZulu-Natal Schooler Transport eyaziwa ngoMalume ewuphiko lwenhlangano iSantaco yakhiwa amaRegion ali-16, okungo soseshini abangama-217 oMalume.
UMgungundlovu Region wona uno-Association abangama-40, osebenza ngaphansi koMasipala abayisi-7 okuwuMsunduzi, Impendle, iRichmond, iHowick, iMooiriver, uMshwathi kanye noMkhambathi.
OnguSihlalo woMalume esifundeni uMgungundlovu, uMnu uPhendulani Ndlovu, echaza ngalesi senzo uthe: “Isifundazwe siqhamuke nohlelo lokuthi njengoba uHulumeni ememezele ukuthi izikole sezizovulwa, abenze isiqiniseko beyimboni ukuthi abathi beqamba bezothuthwa bathuthwe ngezimoto ezingenawo amagciwane ukuze bathi beqala ngoMsombuluko izimoto zibe ziphephile ezimpilweni zezingane.”
Uthe isifunda uMgungundlovu sihlukaniswe izigaba ezi-4 ngenxa yobubanzi baso.
Baqale ngezeGreater Edendale lapho kufike izimoto ezevile e-1000, e- Elandskop bahlangene neMpendle lapho kufuthwe izimoto ezingama-500, kwalandela iMooiriver lapho ihlangene neHowick zingama-350, bese iWartburg yahlangana noMkhambathi kanye noSwayimane lapho okufuthwe khona izimoto ezingama-250 ngesibulalimagciwane.
USihlalo echaza ngokwemigomo ebekwe uHulumeni yokulayisha isibalo esingama-70% uthe:“Angeke ngiqambe amanga ayikho inzuzo, empeleni kulolu hlobo lwethu lomsebenzi nakuba kuyibhizinisi njengoba noHulumeni engakasondeli ukuthi asilekelele okwamanje singabantu abafana nalabo abanikelayo, njengamanje sesinikela kakhulu njengoba sekumele silayishe izingane ezili-10 emotweni elayisha izingane ezili-15 lapho ngeke kuphele nenyanga ngoba uma unyusa imali kubazali nabo bakhala ngokuthi abaholi imali eningi kodwa siyathemba ukuthi ngelinye ilanga uHulumeni uyosikhumbula.”
Uqhube ngokuthi njengoba beqala belokhu bezihlela ufisa ukuthi ngalelo langa ayobakhumbula ngalo afike behlelekile beyimboni yoMalume.
“Ngithi angikusho lokhu, bakhona abafowethu abathutha izingane abaxhasiwe uHulumeni, kodwa bona kusuke kuyizingane ezingakwazi ukuzikhethela izikole, okuyilapho ingane ehamba ibanga elingamakhilomitha amane akusikhona ukuthi ukhethelwe ngumzali kepha isona sikole sokuqala esisondelene naye, lapho uHulumeni uke angenelele bese imoto ethutha loyo mtwana kube iyona ayixhasayo,” kusho yena.
Uqhube ngokuthi kowabo umsebenzi ilapho umzali ezikhethele yena ukuthi ingane yakhe ufuna iyofunda kusiphi isikole ngoba esikhonzile noma esibona singcono, ilaphoke uHulumeni engangeni khona.
“Emva kowe-1994 lapho abazali sebekwazi ukufundisa izingane zabo lapho bethanda khona, ilapho imboni yethu eyakheka khona. Nakhona ezindaweni zakobantu, bakhona bayasebenza emalokishini, ingakho ukade wagcina ukuzwa ukuthi ingane ishayiswe imoto kade iwela umgwaqo ngoba oMalume bayaziwelisa izingane umgwaqo,” kulanda umfoka
Gatsheni.
Uqhube ngokuthi abazali bayawuthanda umsebenzi wabo ngoba bayaqinisekisa ukuthi ingane bayishiya esangweni lasekhaya kanjalo nelase sikoleni.
“Abazali abasilahlanga ngisho kade sihamba nezingane zabo ngamaveni, okuyizimoto ezingakulungele ukulayisha izingane, manje sebesithanda kakhulu-ke njengoba sesenza lokho okushiwo umthetho ukuthi silayishe izingane ngamakhumbi,” kusho yena.
Uveze ukuthi nakule Region yabo kukhona labo abaxhaswe uHulumeni kepha kunephutha beyimboni ababona ukuthi uHulumeni uyalenza ngokuthi angasebenzisi labo abavele abasebenza ngezingane kepha afake ithenda igcine itholwa ngumuntu ongekho kule mboni.
“Okwamanje abafowethu inzuzo bayenza ngokuthi balayishe izingane ngokweqile, siyayikhuluma leyonto ukuthi sizokwenza kanjani ukuthi silayishe isibalo esifanele, okwesibili asifisi ukubona kukhona umuntu othutha izingane ngeveni njengoba ubona ukuthi mabili manje esinawo kulesi Sifunda abaningi sebenamakhumbi, okokugcina sifisa ukubona abantwana bethuthwa ngendlela esezingeni lomhlaba lapho khona umtwana ezokuthakasela ukuhlala emotweni aze ayofika esikoleni, angathi uyaqamba uyafika esikoleni umoya wakhe usuhluthukile kade enyathelwa ngomunye umtwana lapho sizokwazi ukubona izingane ziba nemiphumela emihle uma sekuphela unyaka,” kubeka uGatsheni ngamaphupho anawo ngemboni yoMalume.
Okwamanje abafowethu inzuzo bayenza ngokuthi balayishe izingane ngokweqile...