Iyaqala ukunyuka inqola yomnotho ngelizayo
NgoMsombuluko umnotho “uyavulwa”. Ngalesi sikhathi kulindeleke ukuthi abantu abayizigidi eziyisi-8 babe yingxenye yomnotho. Lokhu ngokusho kukaHulumeni yindlela yokuzama ukufukula umnotho osudlakazwe wukhuvethe. Lokhu kuvulwa nokugeleza komnotho kuyisiqalo sikaHulumeni sokubuyisa izicubu, ukuze kuqalwe ukusebenzela ukubuyisa isikweletu esithathwe ku-International Monitory Fund (IMF). Ngakolunye uhlangothi uHulumeni uzama ukuma ukumba umgodi. Kuningi akwenzile ukuvikela izakhamuzi kanye nezinkampani ekutheni zingamuki ngalesi sikhathi. Kodwa ayikho into yamahhala. Sekumele manje izwe likhokhe ukuze impilo iqhubeke.
Konke okwenzekile nokusazokwenzeka kukhomba ukuthi lo nyaka kuyomele kube khona izinto esizikhohlwayo. Enye nje wukunyuka komnotho. Ngeke kwenzeke futhi lokhu kuzosikhuba kokunye okuningi ebese sikuhlelile njengezwe. Kuyimanje izikhulu zoMnyango Wezezimali azilali njengoba zihlela kabusha isabelomali ukuze sibe ngesibhekene nokhuvethe. Okusho ukuthi bazothatha lapha, bathasisele lapha, kuyekwe lapha kuphinde kuvalwe laphaya. Lona ngumdlalo odinga ubuchule neqiniso. Iqiniso lapha kumele lethulwe ezakhamuzini ukuthi njengoba umnotho wakuleli nowamazwe nje ungemuhle kukhona okuyomele njengezwe sikuswele. Ukuthi zonke izakhamizi zazi ukuthi kukhona izinhlelo ezingahle zingabe zisenzeka.
Okunye okumele kwenzeke wukwamukela kwezakhamizi ukuthi uHulumeni wethu ngeke akwenze konke yedwa lokhu. Empeleni lohulumeni ukuze kufukulwe umnotho kuomele imiphakathi nayo ibambe lapho ingabamba khona. Olunye uhlaka lukaHulumeni okumele ngalesi sikhathi libuke futhi lenze izinto ngokwehlukile nguHulumeni wendawo. Ingani yilapha kunenkinga khona. Yilapho imithombo yokwazi ukuthi abantu bathini nokuthi bafunani itholakala khona. Nakhona kulezi zinsuku kuyagijinywa kuqedelwa isabelomali. Ngesifanayo naseminyangweni ezifundazweni. Wonke umuntu kumele amukele ukuthi izinto zizokwenzeka ngendlela eyahlukile. Umasipala wakho kungenzeka ungabe usalakha ihholo leli obulethembisile ngoba imali isihambe yayothenga izivikeli ukuze abantu bangabulawa wukhuvethe.
Yize sinalezi zingqinanamba ukuncintisana ngeke kuphele. Ngakho ababusi baleli lizwe kumele bazibambe ziqine ngoba kulawa mazwe ngaphandle akekho ofuna ukuminza ngakho inyoni izokwakhela ngamaqubu enye. Sekukhona lapho siyothi siyongqongqoza khona bafike balandule ngoba bengeke bakwazi ukuklezisa abangaphandle ekubeni abakwabo belambile. Nathi kuzoba khona okusiphoqayo ukuthi senze njalo nakwabaneye. – Umhleli