Okwenzeke kuNgobe akungasusi amehlo kokumele kwenziwe
Ukucophelela ekuthatheni nasekukhipheni imiphumela kuzobaluleka ngalesi sikhathi
Udaba lokuhlolwa kanye nokutholakala kwemishanguzo yokwelapha ukhuvethe lukhulunywa cishe kuzo zonke izinhlokodolobha zamazwe. Lumqoka ngoba ukutholakala kwesixazululo kungabangula amazwe iva njengoba ukhuvethe luguqule indlela yokuphila kubantu nohulumeni. Ngokubambisana namazwe iWorld Health Organisation ( WHO) igqugquzela ukuthi abantu abahlolwe ngobuningi ukuze kungagcini ngokuvikela kepha kutholwe isixazululo. Nesilomo somsakazi wo-Ukhozi FM uTshathugodo Ngobe senze lokho ngenhloso yokuzivikela nomndeni waso. Uye endaweni ayithemba nakubantu abathembayo. Uthi akukho obekusolisa kepha izindaba azitholile zimshiye ethukile ngoba isikhungo sidalule ukuthi utholwe yigciwane.
Njengephephandaba sibe ngabanye bokuqala ukuthola uhlangothi lukaNgobe. Okumangazile ukuthi ngisho enengcindezi ubekholelwa kodokotela, ezimisele ukulandela yonke imithetho elandelwa asebehaqwe yilo mkhuhlane.
NgoLwesithathu emuva kokuthola ukuthi uhlabekile kuqhamuke isixoliso isikhungo sithi senze iphutha. Nembala lona kube umlilo obhubhise konke ukwethenjwa kohlelo lokuhlola abantu. Lobu budedengu buzokwenza kube wumqansa ukukholwa eminye imiphumela njengoba sekukhona nemibuzo ethi “engabe bangaki” okwenzeka iphutha. Siyethemba ukuthi lokhu kuzolungiswa kakhulukazi uMnyango Wezempilo okumele uqale ngokubheka ukuthi sona lesi sikhungo sinawo yini amaphepha aqondile nokuthi ngabe yiphutha elamukelekile yini leli noma wubudedengu obunqunu.
Asifisi kube nesivumelwano sangasese kepha uNgobe uyobe udodile uma ebagijimisa izinkantolo abesikhungo ukuze izwe lazi ukuthi amaphutha anjengalawa anemiphumela. Siyacabanga nje ukwethuka kwamalungu omndeni wakhe nalabo asebenza nabo, sizibuze ukuthi konje wona amalungelo abo akuphi uma kunje. Siyafisa kungasuki ukuthi sibhekene nesifo okumele sisinqobe ukuze sonke siphephe. Asiqhubeke sihlolwe ukuze sazi isimo sethu nohulumeni akafake abafana ukuze bavele obala labo abagila lama lumbo kuNgobe nakwabanye.