Intsha mayisukumele okwesikhathi sayo ngesibindi
Umbhali uthi intsha ngonyaka wezi-2020 nayo ingakwazi ukuletha isixazululo kuzinselelo zanamuhla
Ukuzikhathaza ngemibuzo enzulu ngekusasa yokuthi lobanjani, lizokwakhiwa kanjani nokuthi yiziphi izigaba zomphakathi eziyodidiyelwa futhi zigqugquzelwe ukuze zikwazi ukusiholela kuleli kusasa esilifunayo nelisifanele kubeka intsha ophondweni olucijile emizamweni yanoma yisiphi isizwe.
Ngokusemthethweni, lokhu kwenza ukuthi nanoma yisiphi isizwe esidembeselaukuzicijela ikusasa laso kanye nenqubekelaphambili kwaso sizibeke engcupheni yokushabalala. Yingakho zonke izizwe nezinhlaka zomphakathi, ngisho namaqembu ezombusazwe, bephokophelela ukuhlumelelisa intsha njengesisizukulwane esisakhulayo.
Lesi yisifundo izwe lakithi elasifunda kanzima ngokubaluleka kwentsha emzabalazweni wenkululeko, ikakhulukazi ngenxa yeqhaza izizukulwana ezahlukene zentsha ezalibamba. Singakusho ngokungananazi ukuthi kwakukaningi lapho umzabalazo wenkululeko wawungabhekana nezingqinamba ezazingeke zixazululeke ukuba intsha yayingazange ikuthathele ezandleni zayo ukuguqula isimo.
Kujwayelekile ukuthi abantu abaningi iqhaza lentsha baliphelelisele kuphela ngosuku lomhla zili-16 kuNhlangulana ngowe-1976, bakubeke sengathi laqala futhi laphelela ngalelo langa.
Abantu abaningi babuye benze iphutha lokuqhathanisa intsha yanamuhla neyangale minyaka eseyadlulayo, bakubeke sengathi intsha yanamuhla yayiyokwehluleka ukwenza imigilingwane eyenziwa yintsha yangowe-1940 kuze kufike kowe-1980, futhi kube sengathi intsha yangaleyo minyaka yayizokwenza okwehlukile ukuba yayizithola iphila kule minyaka yanamuhla.
Iqhaza lezizukulwana ezahlukene zabasha kumele zibhekelwe ngokwezikhathi abazalwe, bakhulela nabaphila kuzo kanye namalungiselelo enziwe okubacijela iqhaza okumele balibambe ngomuso. Intsha yangezikhathi zowe-1980 yabamba iqhaza eledlulele emlandweni, ngesikhathi esasinesankahlu kunazo zonke emlandweni wezwe lakithi, lapho kwafanela abaningi balahlakelwe yimfundo baze banikele nangempilo yabo uqobo, esikhathini lapho inqubo yengcindezelo yafika ingasakwazi ukusibusa, yaze yaphoqeleka ukugoba uphondo makuphela eyawe-1980.
Ngalokhu siqonde ukuthi intsha yanamuhla nayo ingakwazi ukuzibonakalisa uma sibheka izinselelo zanamuhla, ikakhulukazi lapho sibhekene nenqubo yokugodlwa komnotho yidlanzana labamhlophe besilisa, abaphethe umnotho ababewuzuze ngendluzula nangendlela engenabulungiswa.
Bagodle zonke izizinda zomnotho, okuhlanganisa nomhlaba onothile, ezezimbiwa, ezolimo, izimboni kanye nezezimali, okuhlanganisa namabhange wonke esinawo ezweni. Baze banqwahe naneBhangengodla okuyilo elishaya imithetho ngemigomo ethize yezimali.
Kufanelekile-ke uma sibuka lesi simo esibhekene naso namuhla, kubalulwa nalesi esengisibale ngaphezulu, kuhlangene nokuthi umnotho wezwe lakithi kanye nezwekazi i-Afrika lonkana untengantenga kakhulu futhi sekuphele iminyaka ecishe ibe yishumi usolokhu ungakhuli, lokho osekudlondlobalise ubuphofu namazinga okungalingani.
Umnotho wezwe lakithi nezwekazi i-Afrika yonkana usimamiswe izimbiwa nemikhakha yohwebo olusezingeni eliphansi, lapho okukhiqizwayo kungathuthukiswa kube sezingeni lapho singabamba iqhaza ohwebeni olusezingeni eliphakeme. Lokhu kwenza umnotho wethu weyame kakhulu ekuthengeni imikhiqizo yakwamanye amazwe, thina sibahwebele ngemikhiqizo esezingeni eliphansi futhi ebiza amanani aphansi, okwenza sincike kakhulu ezimakethe zomhlaba namanani anqunywa yizo.
Yingakho ubudlelwano be-Afrika namazwe omhlaba, ikakhulukazi i-USA, amazwe ase-Europe nase-East Asia buwubudlelwano obungalingani, lapho thina siqhubeka singabathengi bemikhiqizo yabo, amandla eRandi ehlala entengantenga nawo futhi sisolokhu singabakhapheyana nje kwezamandla omhlaba, ngokwezomnotho kanye nakwezombusazwe.
Ubudlelwano beNingizimu Afrika namazwe omhlaba buyisibuko sobudlelwano baboHlanga nabamhlophe ngaphakathi ezweni. Lo mashayabhuqe weCovid-19 uzosijulisa leso simo, usenze sibe simbi kakhulu.
Nakuba ekhona amathuba azovuleka okuthi abantu bakithi, ikakhulu abasha, babambe iqhaza emnothweni omusha osungulwa yilesi simo, kodwa anginalo ithemba elingako njengoba umnotho wakithi uqhoqhotshelwe yidlanzana labamhlophe futhi noHulumeni engabonakalisi isibindi sokufisa ukuguqula ukuphathwa komnotho nendlela okukhiqizwa ngayo. Kubonakala kunamathuba azovuleka ikakhulukazi kwezobuchwepheshe kodwa abaningi boHlanga basazontula izimali zokuvula amabhizinisi abo, bathole ubolekomali olushibhile nabangakwazi ukumelana nalo futhi kuvuleleke nemikhakha yokuthi bahwebe.
Kulapho-ke abantu abasha banamuhla kumele bazibonakalise amandla nobuqhawe babo, bekhumbula ukuthi akukho lutho aboHlanga abake baluzuza ngale komzabalazo.
Kulabo abesebecabanga ukuthi umzabalazo waphothulwa ngamhla sivotela uMadiba ngowe-1994, abacabanga ukuthi abamhlophe bazosiphenyela ngesihe amathuba okubamba iqhaza emnothweni, kumele balwembule lolo lwembu emiqondweni yabo.
Ukuze siguqule isimo saboHlanga bayeke ukuba abemukela izimpesheni nabahlale bekhangezile, abahlala befuna imisebenzi bengaqashwa, sibabeke ezingeni lokuba ngabakhiqizi bomnotho nabakhi bemisebenzi, kuzofanele abasha bangadembeseli nje, bathembele kuHulumeni nomusa wabamhlophe, asebebonisile ukuthi abanawo ngoba nabo bazicabangela bona nezingane zabo.
Nakulesi simo sokhuvethe, bebelokhu befake ingcindezi yokuthi makuvulwe ukuthengiswa kwamanzi amponjwana nogwayi nakuba uHulumeni ebekucacisile ukuthi lesi simo sizokwandisa amangwevu obhubhane kodwa ngoba nabo baqhutshwa yile nunu abayengamele, bebengasakwazi nokubekezela. Le nunu abayengamele ayikwazi ukucabangela impilo nentuthuko kawonke wonke.
Kumele intsha ibhukule, iqinise emfundweni, ibuye iqinise izinhlaka zabasha zokufaka ingcindezi yokuguqulwa kokuphathwa komnotho nokwabiwa komhlaba ukuze izizukulwane zangomuso zibe namathuba ahlukile. Abadala babonakala sebamukeleizimo njengoba zinje. Nale Fourth Industrial Revolution (4IR) okukhulunywa ngayo izoseqa emakhanda uma intsha yakithi, okuyiyo ezozuza lukhulu kuyo, ingabhukuli ifune amathuba angcono. Intsha yanamuhla iyafana ngesibindi nangomdlandla kwabayenduleleyo, okufanele mayikwenze ukusibonakalisa lesi sibindi sayo.