Iqiniso lithi sigileka nje yintuthuko yethu
Umbhali uthi njengoba lingahambi nje igciwane intuthuko yiyo eligijimisayo kubhala uMfo wakwaNomajalimane
Kuleli sonto ngibe nethuba lokukhuluma ngobumqoka bosuku oselethiwa ngokuthi ngele-Afrika. Lo ngumhla zingama-25 kuNhlaba nosikhumbuza okukhulu ngathi nangomlando wethu. Ngeke-ke wabuka kabanzi nge-Afrika ungabukanga ngokwenzeka kwezinye izingxenye zomhlaba.
Ngenze njalo ukuze ngizifundise futhi ngizikholise ngesimomazwe. Ngibuke izinombolo ezikhula nsukuzaphuma zokutheleleka nokubulawa wukhuvethe lapha eNingizimu Afrika ngaziqhathanisa namanye amazwe asizungezile njengeLesotho.
Ngisuke lapho ngajubalala ngabuka izibalo zakwamanye amazwe nayilapho izwe okuthiwa yilo elizihola phambili ngakwezomnotho i-United States of America (USA) kutholakala ukuthi nakulo ukhuvethe siholwa yilo.
Ngibe sengiba nemibuzo ukuthi uma izwe elizihola phambili emhlabeni njenge-USA kanye nalelo elihamba phambili e-Afrika iNingizimu Afrika zingaphansi kwengcindezi pho silindeleni eLesotho naseSouth Sudan? Yini la mazwe angenangqalasizinda etheni namnotho kube sengathi angcono kanti kuhlale kuthiwa nxa izwe lihlupheka lisenkingeni.
Wona futhi amandla omqondo abe esengiweza angilunguzisa olwazini thizeni ngawo wonke lawa mazwe ngabe sengiphuma nempendulo cishe nami engethusile.
Le mpendulo ibithi kungenzeka ukuthi la mazwe aziwa njengezikhondlakhondla kokuthile adliwa ngokuthile okukuwo. Kuwumbono wami ukuthi intuthuko yethu, enhle futhi eqhubeka nokuba yinhle yiyo okungenzeka ukuthi iwumnkhonto noma ngithi ubuthi obusijuqayo bulapha kithi.
Ngikusho ngani lokhu? Izibalo ezikhona zikhomba ukuthi amadolobha amakhulu lapha eNingizimu Afrika yiwo ami kabi. Kunjalo eKapa, eTshwane, eGoli nalapha eThekwini. Yize kukhona kepha koNongoma naseHlanzeni kuphansi.
Umbuzo uthi kungenzeka kanjani lokhu?
Ongoti bayavumelana ukuthi umhlaba esiphila kuwo wehluke ngokuthi sekulula ukuxhumana nokungcono kunakuqala. Uma ujahe eGoli ikhona indiza.
Kanti kanjalo nokuxhumana kwemigwaqo sekulula ofuna ukuya eKapa nje ufaka uphethroli idume insimbi emasondomane iye iyombeka eKapa lodumo. Lokhu kuhle kukhomba intuthuko. Kepha nansi indaba lapho iqala khona.
Lokhu kuba lula yikho okwenza kube lula nokuthelelana. Osuka lapha eThekwini enegciwane eya eDubai angalifafaza yonke indlela lena lapho ibhanoyi lima khona naye ethintana nabantu khona.
Ubufakazi balokho busekutheni kuthe sizihlalele nje lapha kwelengabadi siziqhathela usizi lwethu kwabe sekubuya owakuleli obehambele phesheya wabuya eselithwele njengoba namuhla sekuthiwa isibalo lesi sesibikwa ezinkulungwaneni.
Useluleme lo owafika nalo uma sizwa kepha ukhuvethe lona luyagabavula lapha phandle.
Kwala sebethi bayalikaka lapha emijondolo yako-Alexandra eGoli naseKhayelisha eKapa.
Lifike kanjani? Loyo umbuzo ompendulo yayo ngingemangale uma kuyikuthi lifike nobephumele ngaphandle kule ndawo, wathi angabuya kanti usethwele isifo.
Kube njalo naseBrazil ukufa kuthole obesiza endlini ekuthatha kumqashi wakhe obehambele e-Italy.
Naye lo mqashi uhambe nje amahora angatheni ukusuka e-Italy eya eBrazil ngendizamshini elekelelwa yiyo intuthuko esinayo. Ukube bekukudala njengoba kwenzeka ngesikhathi kuhlasele umkhuhlane owaziwa ngeSpanish
Flu, mhlawumbe bekuzothatha izinyangana ukuba isifo sisabalale sinike nabemishanguzo ithuba lokuthaka.
Manje izinto ziyashesha, silala singenakho sivuke sinakho, kuhanjswe yithi belu.
Ekugcineni ngibe namahloni ukufika esiphethweni sokuthi sibulawa wubuhlakani bethu nokufisa ukube ngabe sizihlalela endaweni engenamigwaqo eshibilikayo namabhanoyi antweza emkhathini nezitimela ezisuka njengenhlamvu yesibhamu zifinyelele kwelinye ibanga ngoba ngabe abakwethu bayasinda kulolu laka lwesifo, pho-ke ngeke kwenzeke, iyosixaka le ntuthuko yethu ize isinike isixazululo kungekudala.