UMBONO NGEKUSASA LESIBHAKELA KULELI
Isibhakela eNingizimu Afrika angeke siphinde sifane njengasekuqaleni uma seludlulile ubhubhane ukhuvethe, ngokubona kukaLoyiso Mtya.
UMtya wake waba umqondisi kuBoxing South Africa (BSA) iminyaka eminingi kanti ngaphambi kwalokho wayengusomankomane, waba imeneja kanti waba umsakazi walo mdlalo.
Ubecelwe ukuphefumula njengomuntu osehambe ibanga elide nezamankomane njengoba ezemidlalo zivaliwe ngenxa yaleli gciwane.
“Sikhuluma nje, iningi labadlali likhala liyazithulisa ngokubhuntsha kwemiqhudelwano eminingi ebese bechithe isikhathi esiningi nemali kwenziwa amalungiselelo. Ukhumbule ukuthi kubhuntsha lezi zimpi vele ziyindlala izimpi ezweni ngenxa yezingqinamba eziningi. Njengamanje akekho onempendulo eqondile ukuthi isimo sizobuyela nini kwebesethembisa,” kusho uMtya obekhuluma ekwakhe eMdantsane e-Eastern Cape.
Eqhuba uthe: “Iqiniso lisobala angeke izinto zisafana nasekuqaleni uma sesidlule kulolu khuvethe. Mhlawumbe akusungulwe into efana namaBaby Champs lapho kuzoqhathwa labo asebelwe izimpi ezintathu bodwana kuthi lapho abanezimpi eziyishumi nangaphezulu balwe bodwa. Lokhu kungasiza ekuvundululeni ikhono elinganakekile futhi kuzobe kuxosha ikati eziko kubadlali. Ngesikhathi ngisekwaBSA amaBaby Champs athela izithelo ezibonakalayo njengoba namhlanje sinoThabiso Mchunu, uBongani Mwelase, uGideon Buthelezi noNkululeko Mhlongo bavundululeka kulolu hlelo njengoba sebenqobe izicoco eziningi okubalwa kuzo ezakuleli nezomhlaba.”
Mayelana nokuhlolwa kwabadlali, uMtya ongomunye wabaqeqeshi bakaZolani Tete obengumpetha weWBO Bantamweight, uthe kumele iBSA iphumele obala ifundise abantu ubungozi nokubaluleka kokuhlolwa.
“Esengikuqaphelile ukuthi ukuqhelelana (Social distancing) abanye abakwenzi kwazise kulukhuni ngoba umqeqeshi nosomankomane kumele basebenzisane eduze. Kumele ukuhlolwa kwenziwe ngaphambi kokuzivocavoca. Mhlawumbe umuntu angasuka ejimini engenaso isifo agibele itekisi afike asithole ekhaya. Uma abantu bengahlolwa ngaphambi kokuthi bazivocavoce bangasizakala uma kukhona othelelekile bese enxuswa ukuyolashelwa ekhaya noma ndawane thizeni.”
Abanye osomankomane asebecabanga ukuthi angeke bayithole imali yokwehlisa umthwalo ekhishwe uMnyango
Wezemidlalo Nezokungcebeleka kuzwelonke sebephakamise ukuthi uHulumeni alekelele ophromotha ngokuxhasa izimpi.
Bathi yize bekuqonda ukungahlangani kwabantu abaningi ukuvikela lesi sifo, babona kungaba ngcono ukuba izimpi ziphasiswe bese zingavunyelwa izihlwele.
Bangama-700 abadlali ababhalisiwe kwaBSA kanti abangama-50 abesifazane. Balinganiselwa ema-30 abadlali, abaqeqeshi nezikhulu ezingaphansi kweBSA abakwazile ukuhlomula kule mali ekhishwe ngoba izimpi zabo zibhuntshe ngenxa yeCovid-19.
“Siyakuqonda ukuthi ophromotha bazolimala emaphaketheni kwazise akukho mali abazoyenza ngabantu abazongena bezobuka kodwa okubuhlungu ukuthi nathi siyalimala njengoba singalwi nje.
Uma sizoqhathwa kukhona okuncane esizokuthola sikubeke etafuleni emakhaya. Iningi lethu alisebenzi lethembele emalini yesibhakela,” babhale kanje ekhasini leFacebook elidume ngokudingida ezamankomane.