Kukhona amazwe alwa nezinkunzi ezimbili nkathi yinye
Kusukela ngosuku lokuqala ngomhla zili-14 kuNhlolanja mhla kuphuma umbiko wokuthi ukhuvethe seluhlasele nase-Afrika kwasheshe kwacaca ukuthi kunamazwe ayozithola elwa nezinkunzi ezimbili. Lezi zinkunzi kungaba izingqinamba ebezikhona.
Kusukela ngosuku lokuqala ngomhla zili-14 kuNhlolanja mhla kuphuma umbiko wokuthi ukhuvethe seluhlasele nase-Afrika kwasheshe kwacaca ukuthi kunamazwe ayozithola elwa nezinkunzi ezimbili. Lezi zinkunzi kungaba izingqinamba ebezikhona kulelo lizwe kodwa osekumele ziqhudelane nokhuvethe ezinhlelweni zikaHulumeni noma ukuqubuka kwezinye zidalwa ukuthi amehlo kaHulumeni nezinhlaka zawo azobe ebhekiswe kukhuvethe noma ukuthikameza izinhlelo ebesezimiselwe ukuthola izisombululo kokuthile.
ENingizimu ne-Afrika, iMozambique isalokhu ibhekene nesimo esibucayi ngenxa yokugasela kontamolukhuni esifundazweni iCabo Delgado. Leli lizwe, nalo elibalwa namanye asejube amasosha ukuba aseke imizamo yokulwa nokhuvethe, selizithola kumele liyiphake eCabo Delgado ngoba abavukelimbuso bengazibelikle phansi.
Okwenza isimo sibemazonzo ukuthi lesi sifundazwe esiwumgogodla womnotho ezweni, kuphinde kube yiso esinenani eliphezulu kulabo asebengenwe yilesi sifo ngoba kuthiwa amaphesenti angama-70 alabo asebebambekile eMozambique aqhamuka eCabo Delgado. Ukushuba kwesimo eMozambique kudale ukuthi amazwe angomakhelwane okubalwa iTanzania neZimbabwe azibophezele ukuthi azongenelela ekusekeni leli lizwe ukulwa nabavukelimbuso. IMozambique ayiyodwa emazweni azithola esengcindezini enjengalena.
Emaphethelweni kaNdasa ukuhlasela kweBoko Haram eChad kwaba undabuzekwayo ngoba kwakuqala ngqa ukuthi inani lamasosha aseChad abulawe ngehlandla elilodwa lokuhlasela yileli qembu licishe lifinyelele ekhulwini (100).
IBoko Haram nayo yagasela eChad ngesikhathi uHulumeni esaqala ukuzihlela ngokuthi uzobhekana kanjani nokhuvethe.
ENyakatho ne-Afrika, abavukelimbuso beholwa ngowayengumkhuzi wezempi phambilini uJenene Haftar, basebenzisa intuba yokuthi amazwe amaningi, ikakhulukazi awaseNyakatho azibandakanya nokwenzekayo eLibya ayesabhekene nokhuvethe, baqinisa ukuhlasela iNhlokodolobha iTripoli namaphethelo lapho kuzinze khona uHulumeni wesikhashana. Ukungaphezi kukaHafter lokuhlasela kuze kwaphoqa iKomidi le-African Union (AU) elibhekene neyaseLibya eliholwa uMengameli waseCongo Brazaville, ukuthi libambe umhlangano ophuthumayo mhla zingama-20 kuNhlaba, ukuze lena kaHaftar yokuzama ukuguqisa uHulumeni isimo sivele sisibi ingalungiswa ngaliphi. Nase Somalia, i-Al-Shabaab ayizibekile phansi ngokuhlasela izakhiwo zikaHulumeni kanye neze-African Mission in Somalia
(AMISOM) nokunciphisa amathuba okuthi uHulumeni ovele ebhekene nokuningi akwazi ukumelana nokhuvethe olubhebhethekayo ezweni. Zonke lezi zigameko zenzeka emveni kokuba uNobhala Jikelele weNhlangano yamazwe omhlaba, u-António Guterres, enxuse amazwe nabavukelimbuso ukuthi mayike ihlale phansi ibambe umthetho ikakhulukazi ngalesi sikhathi umhlaba usingethwe yilo mkhuhlane.
Ngaphandle kwalezi zimpi zombangazwe esezibaliwe, enye yezinkuzi okubhekenwe nayo kuso lesi sikhathi sokhuvethe isikhonyane esihlasele kumazwe aseMpumalanga ne-Afrika. Lesi sikhonyane, esagasela ekuqaleni kwalo nyaka sidalwa uzamcolo owawungajwayelekile, sesishaye ibhuqe kwezolimo kumazwe anjengeDjibouti, i-Eritrea, i-Ethiopia, iKenya, iSomalia, iSouth Sudan, ne-Uganda.
Sebebalelwa kwabevile ezigidini ezingama-24 okuthiwa bazoswela ukudla ngenxa yalesi sikhonyane. La mazwe angamanye abalwa nalawo inani lalabo asebengenwe ukhuvethe landa, okufaka ingcindezi emizamweni ekhona yohulumeni ukubhekana ngokulingene nazo zonke lezi zinkinga eseziqubukile. Lesi sifundazwe sivamile ukuhlaselwa ngokuthile okudalwa ukuguquka kwesimo sezulu njengoba kuzokhunjulwa ukuthi kuze kwasungulwa i-Inter-Governmental Authority on
(IGAD) ngowe-1986, kwakungahloswe kugwema zimpi zambango, kepha kwakuphokophelelwe ukukhalima ubhubhane olwaludalwe yisomiso esasidlangile kula mazwe ngaleyo minyaka. Kuqubuka ukhuvethe nje, amanye ala mazwe ayingxenye ye-IGAD abekade esenezinhlelo nazo ezidinga imali yokuthi kunqontshwe lesi sikhonyane, manje sekumele athayisele kwanakho. Phezu kwalokho, ezinye zezinhlaka zikaHulumeni kula mazwe zikhonondela ukuthi eminye yemigomo emisiwe ngokhuvethe ayenzi lula ukuqhubeka nezinhlelo zokulwa nesikhonyane.
Bese kuthi, eDemocratic Republic of Congo (DRC), kuthe kusakhulunywa ngokuqubuka kokhuvethe kwase kuvela imibiko yokuthi isifundazwe sase mpumalanga yezwe, okuphinde kube yiso esisanezimpi eziningi zombango, sekuphinde kwavela asebengenwe yiEbola.
Kulo leli sonto, uNgqongqoshe wezempilo waseDRC ukuqinisekisile ukuthi uHulumeni usezilungiselela ukuyobhekana ne-Ebola njengesimo esiphuthumayo ezindaweni ezithize. Izigameko ezifana nezibaliwe okumele zikhombise labo abathanda ukusheshe bagxeke izinye zezinqumo ezithathwa amazwe ase-Afrika uma ebhekene nezimo ezifana nokhuvethe ukuthi kuyenzeka ezwenikazi, njengokwamanye amazwe ukuthi okuningi okusuke kubhekenwe nakho kuye kwehlule amandla.