Bayabuya eChina
Iyaphela inkumbulo yasekhaya kuzakhamuzi zaseNingizimu Afrika ezizinze eChina njengoba maduze bezobuyela emakhaya emuva kokuvalelwa ukhuvethe.
Njengoba iChina ingakaxegisi imigomo yabantu bokufika abangenayo nabaphumayo kuleli lizwe, abantu baseNingizimu Afrika abafuna ukubuyela ekhaya kulindeleke ukuthi bathole indiza ezobathwala kule nyanga.
Sekuphele izinyanga ezimbili abantu abahambela amazwe ngamazwe, okubalwa nalabo abanamaVisa aseChina, bevaliwe ukungena kuleli lizwe ngenxa yokusabalala kwesifo esiwubhubhane seCoronavirus emhlabeni. ISouth African Embassy ithe isihlanganise uhla lwabantu asebezwakalise ukuthi bafuna ukubuyiselwa eNingizimu Afrika.
Labo abafuna ukubuyela ekhaya bazozithwala bona izindleko zohambo olubheke eNingizimu Afrika.
ISouth African Airways (SAA) ihlela indiza ezothwala labo abazobuyiselwa ekhaya, ngokusho kweSouth African Embassy.
Kulindeleke ukuthi bakhokhe izi-R22 500 abagibeli baku-Economy Class, kuthi abakuBusiness Class bakhokhe izi-R42 000 kulolu hambo olubheke ekhaya.
Usuku olusaphakanyisiwe lokubuyiswa kwabo umhla zili-17 kuNhlangulana wezi2020 kanti kuhlelwe ukuthi indiza isukele eBeijing ilibangise eGoli.
Ngokwesitatimende esifakwe kusizindalwebu, iSouth African Airways ithole imvume yokundizela emadolobheni ayishumi kule nyanga ilande abantu baseNingizimu Afrika. Izindiza ezizokhishwa zizolibangisa eBeijing, eBrisbane, eDubai, eBahrain, eMoscow, eHanoi, eFrankfurt, eBuenos Aires, eSao Paolo naseBangkok.
Zonke lezi zindiza zizobe zilande abantu baseNingizimu Afrika kusukela ziyisi-6 kuya zili-17 kuNhlangulana nonyaka. Abagibeli bazokhokha phakathi kwezi-R15 000 nezi-R22 000 ku-Economy Class, kuthi abahamba ngeBusiness Class bakhokhe phakathi kwezi-R35 000 nezi-R42 000.
NgoMbasa, izindlu zenxusa eBeijing zakhipha isimemezelo esifanayo, nalapho kwabikwa khona ukuthi inkampani iCathay Pacific iyona eyayizothatha uhambo oluya eNingizimu Afrika.
Indiza yabe izosukela eShanghai ngesikhathi enye izosukela eHong Kong.
IBeijing ivale ukungena kwabantu abavela ngaphandle ngokunjalo nezindiza emva kokwanda kokusabalala kwesifo iCovid-19.
Yize kunjalo, izinkampani zezindiza zamazwe omhlaba seziqalile ukulungiselela ukuvulwa kwemizila yaseChina.
Ngokombiko weForbes, izinkampani zaseSouth Korea, zase-USA, zaseTurkey nezaseQatar ziphakathi kwalezo ezizoqala zindizele eChina kule nyanga.
Kusenjalo, iFlight Global ibika ukuthi uhambo ngezindiza ngaphakathi eChina lukhombisa ukuthuthuka emva kobhubhane lokhuvethe oluhlalise abantu nezindiza phansi.
Nokho izibalo zabandizayo kusalindeleke ukuthi zibephansi kuleli hlobo njengoba imboni yezindiza isaqhubeka ukuzwela imithelela yalesi sifo.
Amadolobha afana neBeijing awakakukhuthazi ukundizela emadolobheni akude nayo phakathi eChina njengoba imigomo yokunqanda ukusabalala kweCoronavirus isaqinisiwe.
Uma ufuna ukuya ezindaweni ezikude kumele uthole imvume, kanti uma usubuya ufakwa kuQuarantine izinsuku ezili-14 uphinde uhlolwe.
Yize seziphansi kakhulu izibalo zabanalesi sifo eChina, izinga lokuqwasha lisephezulu, ikakhulukazi njengoba kukekwabonakala ukukhuphuka kwezibalo zabantu abavela ngaphandle abafika naleli gciwane kwamanye amadolobha okubalwa kuwo nayo inhlokodolobha iBeijing.
Balinganiselwa ema-419 abantu asebetholwe beneCoronavirus eBeijing, nalapho abali-174 kungabantu abangene naso isifo bevela emazweni angaphandle, ngokusho kwezibalo zoMnyango Wezempilo kuMasipala wedolobha.