KWEZINYE IZINGXENYE
E-El Salvador: UMengameli uNayib Bukele kuleli sonto ubike ukuthi usebenzisa ikhambi iHydroxychloroquine, okuyikhambi lokulwa nomalaleveva. Leli khambi like lagqugquzelwa nguMengameli wase-United States of America (USA) njengelokulwa negciwane iCorona yize ochwepheshe bezempilo bengabaze ukusebenza kwalo futhi baxwayisa ngemiphumela emibi neyingozi yokulisebenzisa.
IWorld Health Organization (WHO) yamisa ukuhlolwa kwaleli khambi njengesikhali sokulwa negciwane iCorona emuva kokuba kuvele imibiko yokuthi iziguli ezineCorona ezelashwa ngalo zingase zibe sengcupheni ephezulu. Izwe iSalvador libika ukuthi abantu abayizi-2 109 babenegciwane iCorona kuthi abangama-37 lababulala.
E-United States of America:
UMengameli uDonald Trump ubike ukuthi izwe lakhe lizoqeda ubudlelwano balo neWorld Health Organisation (WHO) okuyinto abekade esonga ngayo kulokhu kwaqala ubhubhane lweCorona, kodwa lesi senzo sakhe sithole ukugxekwa emhlabeni jikelele. Ebeka isizathu salesi sehlukaniso uMnu uTrump, uthe: “Ngoba behlulekile ukwenza izinguquko eziceliwe futhi ezidingakalayo kakhulu.” UTrump uphinde wathi: “Umhlaba udinga izimpendulo kuChina mayelana negciwane iCorona.”
E-Europe: Ukuphikisana okukhona mayelana noxhaso lokululamisa i-European Union ngokwezomnotho sekudonse ukungezwani phakathi kwamazwe ampofu kanye nalawo abalwa njengokuthi anamandla kwezomnotho, okungase kuholele ekubambezelekeni kokubuya kwezomnotho kulesi sifunda futhi kuzokwenza kube khona ukukhombisana amandla ezepolitki kanye nezimali okungahle kuhlukanise phakathi le nhlangano.
EGermany: Izwe iGermany selibuyise ngokusemthethweni abezenkolo zamaJuda kwezempi (military rabbis), okokuqala kusukela iqembu lamaNazi labavimba ukuba bangene kwezempi ngonyaka we-1930. UNgqongqoshe Wezokuvikela Annegret Kramp-Karrenbauer uthe lokhu kungukubuyela emasikweni kanye nokulwa nokucwasa kwamaJuda emiphakathini.
Ezakwa-Israel: UNdunankulu wakwaIsrael, uMnu uBenjamin Netanyahu, ufike eNkantolo yesifunda iJerusalem emangalelwe ngamacala abekwe wona njengoba kwakuqhubeka necala lenkohlakalo. Amacala amathathu aveza izinsolo ezehlukile zokuthi uNetanyahu wayenza okungalungile.
Ubhekene necala lokufumbathisa namathathu enkohliso kanye nokuphula ukwethenjwa. Lokhu kungokokuqala ngqa ukuthi uNdunankulu osesihlalweni avele enkantolo njengommangalelwa.
E-United Kingdom: Umbuso wase-UK uhlangane ngokunikeza ngamalungelo amakhulu okuvakasha kubahlali abathile baseHong Kong uma uHulumeni waseChina ungaguquli isinqumo mayelana nomthetho owushayile. Uma lokhu kufezeka kungenza kube lula ukuthi lezi zakhamuzi zifake izicelo zokuba yizakhamuzi zase-UK.
Lolu hlelo luzosebenza kubahlali baseHong Kong kuphela abanamadokhumenti abizwa ngeBritish National Overseas (BNO) Passport, eyanikwa izakhamuzi ezaziyibhalisele ngaphambi kokuba iBritain ibuyisele iHong Kong kuChina ngonyaka we-1997.