Nakulokho u-Adv uMkhwebane ugejile
Kwabaningi ikakhulukazi abathintekayo lokhu kuzoqhamuka njengento ethusayo. INkatolo Enkulu yasePitoli isichithe isincomo kanye nawo wonke uMbiko woMvikeli WoMphakathi u-Adv uBusisiwe Mkhwebana odabeni oluthinta umufi uSindiso Magaqa.
Ngenyanga uNcwaba wezi-2018 uMvikeli WoMphakathi emuva kophenyo wakhipha isincomo esithi iSouth African Police Service (SAPS) ayihlinzekele abanye ofakazi ngabaqaphi. Labo fakazi kwabe kunguMnu uThabiso Zulu kanye noMnu uLesley Stuta nababengofakazi ophenyweni lwakhe mayelana nenkohlakalo eyabe ibikwa kuMasipala uMzimkhulu kanye nasecaleni lokubulawa kukaMagaqa owathelwa ngethala lezinhlamvu.
Embikweni wakhe uMvikeli WoMphakathi wasola uNgqongqoshe uCele ngokwehlukela ukuvikela ofakazi laba. Usho nokusho ukuthi ukudonda ekuqhamukeni nezinhlelo zokuvikela ofakazi kwabe kuwubudedengu njengoba ofakazi babephila ngokwesatshiswa nangaphansi kwezimo eziyingozi. Ngesikhathi lo Mbiko uphuma kwaba kuningi ukugxekwa kwabeSAPS nabasolwa ngokwehluleka ukwenza umsebenzi wabo.
Ngakolunye uhlangothi abeSAPS babemile ekutheni okufunwa kubo akuwona umsebenzi wabo ngqo. Amukela isinqumo senkantolo uCele ucashunwe ethi: “Izinto ziguqukile, umbutho wesiphoyisa (SAPS) wabonakala umsulwa wabuye wabuyelwa nayisithunzi nobuqotho, ikakhulukazi kulokhu lapho uMbiko woMvikeli WoMphakathi wahungula ukubona komphakathi kube ngathi amaphoyisa abehudula izinyawo ekuvikeleni izingede.” Uqhube wathi: “Bekuveli kucaca ukuthi yize ukuvikeleka kofakazi kusemqoka, kodwa kuwumsebenzi weNational Prosecution Authority (NPA) njengoba kubalula kusho uMthetho Wokuvikela Ofakazi (Witness Protection Act).
Kufanele ngabe ubekwazi lokhu uMvikeli WoMphakathi,” kusho uCele. UNgqongqoshe ucele iHhovisi loMvikeli WoMphakathi ukuba lithathe izinyathelo ezifanele kulokho akutholile (uMvikeli WoMphakathi) ikakhulukazi okumayelana nezinhlaka zikaHulumeni. Lokhu kwakamuva kwandisa izinkulumo zokuthi u-Adv uMkhwebane umsebenzi ungaphezu kwakhe.